Afundisi

19 Muna lumbu yayina, vava ke mwakala ntinu ko muna Isaele,+ Nlevi mosi wazingilanga kuna kwandá, kuna zunga kia miongo mia Eferaime,+ obongele nkento wa musi Beteleme+ a Yuda. 2 O nkento andi otele zumba, oyambwidi yakala diandi, ovutukidi kuna nzo a se diandi kuna Beteleme a Yuda. Okedi kûna ngonde yá. 3 I bosi, o nkaz’andi wele kunlanda muna kunleba kimana kavutuka; onete selo kiandi ye mabuluku mole. O nkento untambwidi muna nzo a se diandi. O se dia nkaz’andi vava kamwene, oyangalele. 4 O kô wandi wa se dia mwan’andumba, unlombele kakala yandi mu lumbu tatu; badidi, banuini, balele mûna.

5 Muna lumbu kiayá, vava basikamene muna mene-mene benda kwau, o se dia mwan’andumba ovovese kwa mwan’andi a longo vo: “Teka dia wakumik’e nitu, i bosi nukwenda kweno.” 6 Bavuende, badidi yo nua; i bosi o se dia mwan’andumba umvovese vo: “Dodokolo, leka o fuku wau, wayangidika ntim’aku.” 7 Vava katelamene kenda kwandi, o kô wandi undodokele diaka, muna kuma kiaki olele diaka mûna.

8 Muna lumbu kiatanu, vava kasikamene muna mene-mene kenda kwandi, o se dia mwan’andumba ovovele vo: “Dodokolo, teka dia wakumik’e nitu.” Banangini yavana kialembama mwini, yau awole bakwamanene dia. 9 Vava katelamene kenda yo nkaz’andi ye selo kiandi, o kô wandi, o se dia mwan’andumba, umvovese vo: “Tala, o kuma se kufwa. Leka kaka o fuku wau. O kuma kubwitidi. Leka kaka o fuku wau wayangidika ntim’aku, kimana o mbazi muna mene-mene nuenda kweno nualwaka kuna nzo eno.”* 10 Ozevo, o yakala kazolele leka diaka ko muna fuku wauna, otelamene, wele yakuna Yebuse, i sia vo, Yerusaleme.+ Wakala ye mabuluku mau mole yo nkaz’andi ye selo kiandi.

11 Vava bafinamene muna Yebuse, kuma se kufwa. E selo ovovese mfumu andi vo: “Wiza twakota mu mbanza yayi ya Aneyebuse twaleka mo.” 12 O mfumu andi umvovese vo: “Ka tulendi kota mu mbanza ya nzenza ko, ina ke ya Aneyisaele ko. Tuvioka kuna Ngibeya.”+ 13 Ovovese selo kiandi vo: “Ndolo kweto kuna Ngibeya yovo Rama, i kûna tuleka.”+ 14 Baviokele, bele kwau, e ntangwa iyantikidi dimuka vava bakedi lukufi ye Ngibeya ya Benyamini.

15 Bakotele muna Ngibeya baleka mûna. Bavuende vana yanzala kia mbanza, kansi ke vakala muntu ko kabatambula muna nzo andi baleka mûna.+ 16 Vava kuma kufwidi, vezidi yakala dia nunu otukidi muna salu kiandi kia kiana. Musi zunga kia miongo mia Eferaime,+ muna Ngibeya kazingilanga; kansi, esi mbanza yayina Anebenyamini.+ 17 Vava kasengola meso omwene munduti-a-nzila vana yanzala kia mbanza, unyuvuidi vo: “Akweyi otukidi, akweyi okwendanga?” 18 Ovutwidi vo: “Kuna Beteleme a Yuda tutukidi, kwanda tukwendanga, kuna zunga kia miongo mia Eferaime, i kûna yatuka. Kuna Beteleme a Yuda yayenda,+ owau ku nzo a Yave ikwendanga,* kansi kavena muntu ko untambwidi. 19 Tuna yo madia mafwana mu kuma kia mabuluku meto,+ mbolo+ ye vinyu mu kuma kiame, mu kuma kia nkento ye selo kieto. Ke tukondelo lekwa ko.” 20 O nunu ovovele vo: “Vuvama kwaku! Ikusadisa muna mawonso ovuidi o mfunu. Kansi kuleki va yanzala ko.” 21 Untwese kuna nzo andi, odikidi* mabuluku mandi. I bosi basukwidi malu, badidi yo nua.

22 Ekolo bamokenanga, ankaka muna yimpumbulu ya mbanza bazietele e nzo yo dodela kielo. Bavovese nunu ovuidi e nzo vo: “Vaikisa muntu wizidi mu nzo aku, twaleka yandi.”+ 23 Ozevo, mfumu a nzo ovaikidi, ubavovese vo: “E mpangi zame, ke nuvangi mbi ya mpila yayi ko. Dodokolo, wau vo muntu ndioyu nzenza mu nzo ame, ke nuvangi diambu diadi diansoni ko. 24 Mwan’ame ankento una vo mwenze yo nkento a muntu ndioyu, bena mwamu. Yambula yabavaikisa, nuabasakanena avo nuzolele.*+ Kansi ke nuvangi diambu diadi diansoni ko kwa muntu ndioyo.”

25 Kansi, ke bazolele kunwila ko, o muntu obongele nkento andi+ yo kumvaikisa kwa yau. Banlele mu kingolo yo kunsakanena mpimpa yawonso yakuna mene-mene. Vava kuma kwavunguka, banyambwidi. 26 Muna mene-mene, nkento olweke, obwidi vana mwelo a nzo a nunu muna mwakala mfumu andi, yavana kuma kwakia. 27 O mfumu andi osikamene muna mene-mene, oziwidi yelo ya nzo, ovaikidi kimana kenda kwandi, omwene nkaz’andi wabwa vana mwelo a nzo ye moko vana kaku kia mwelo. 28 Umvovese vo: “Telama, twenda kweto.” Kansi kamvene mvutu ko. I bosi, unsidi vana buluku, wele kuna nzo andi.

29 Vava kalwaka kuna nzo andi, obongele mbele, ozengonuene nkento andi mu tini 12, kîkwa mu kîkwa yo twika tini kimosi-kimosi muna konso zunga kia Isaele. 30 Awonso ana bamona diambu diadi bavovele vo: “E diambu diadi ke diasidi vangama ko ngatu moneka tuka muna lumbu kiavaika Aneyisaele muna nsi ya Engipito yamu unu kiaki. Nutoma dio yindula,* nuvuanda e mfulu+ yo kutuzayisa dina tufwete vanga.”