Luvaiku

23 “Kumwangi* nsangu zaluvunu ko.+ Kuyikami muntu ambi ko muna sia kimbangi kia luvunu.+ 2 Kulandi ndonga ko muna vanga e mbi; vava osia kimbangi muna mfundu, kubendomoni ludi ko mu yikama e ndonga.* 3 Kusie mpambula ko muna mfundu mu lungisa o nsukami.+

4 “Avo owanane ye ngombe yovo buluku dia mbeni aku diyungananga, ofwete dio vutula kwa yandi.+ 5 Avo omwene buluku dia muntu okumenganga dibwidi kuna nsi a zitu kanete, kuyambula dio ko yo kwenda kwaku. Ofwete sadisa muntu ovuidi dio muna kutulula e bulu.+

6 “Kubendomona mfundu a nsukami ko una ova kati kweno.+

7 “Kuyikama mfundu a luvunu ko,* kuvondi munkondwa-kuma yo nsongi ko, kadi kiyikila muntu a mbi ko vo nsongi.*+

8 “Kutambula mbabu ko, kadi e mbabu meso ma nkwa ngangu ifukanga, ilenda mpe tekomona e mvovo mia muntu a nsongi.+

9 “Kubangiki nzenza ko. Yeno kibeni nuzeye e mpasi za kala nzenza,* kadi anzenza nuakala muna nsi ya Engipito.+

10 “Mu mvu sambanu nukuna ntoto eno yo kutika e mbongo ituka mo.+ 11 Kansi muna mvu wa nsambwadi ke nukuni wo ko, nuvundisa wo. Muna mpila yayi, asukami ova kati kweno bedia ina imena mo, ina besisa idiwa kwa bulu ya mfuta. I wau ovanga muna mpatu aku a vinyu ye muna mpatu aku a olive.

12 “Mu lumbu sambanu osala e salu kiaku; kansi muna lumbu kiansambwadi, kusadi konso salu ko, kimana e ngombe aku ye buluku diaku diavunda, o mwan’a ntaudi aku ankento yo nzenza vovo nuina bavutulwisa o nkuma.+

13 “Nutoma keba nualungisa mawonso inuvovese,+ ke nuyiki nkumbu za nzambi zankaka ko; e nkumbu zau ke ziwakani nkutu ko muna befo yeno.*+

14 “Nkumbu tatu nukumpangila o nkinzi muna mvu.+ 15 Nukembela o Nkinzi a Mbolo Zakondwa Mfuna.+ Lumbu nsambwadi odia e mbolo zakondwa mfuna wauna yakanikina, muna ntangwa yasikidiswa, muna ngonde ya Abibi,*+ kadi mu ngonde yoyo wavaika muna Engipito. Ke vena muntu ko okwiza vana ndose ame yo moko mankatu.+ 16 Nukembela mpe o Nkinzi a Ngionzeka* a mbongo antete ya salu yeno, ina nukunanga muna mpatu;+ nukembela o Nkinzi a Nkutika* kuna mfoko a mvu, vava nukutika e mbongo a salu yeno muna mpatu.+ 17 Nkumbu tatu muna mvu, o wan’aku amakala awonso bekwiza vana ndose a Yave wa Mfumu aludi.+

18 “Kutambika menga ma bulu kia kimenga kiame ko kumosi ye konso lekwa kiasiwa mfuna. E mazi ma bulu kia yimenga ya bulu metambikwanga muna nkinzi miame ke mafwete lundwa ko tuka fuku yamuna mene.

19 “Ofwete twasa muna nzo a Yave wa Nzambi aku+ eyi isundidi o wete muna mbongo antete ya ntoto aku.

“Kulambila mwan’a nkombo muna kimvumina kia ngudi andi ko.+

20 “Ivitisa mbasi kuna ntwal’aku+ kimana katanina muna nzila yo kukotesa vana fulu nkubikidi.+ 21 Nusia e sungididi muna yandi, nulemvokela e nding’andi. Ke nunkolamena ko, kadi ke loloka makuzuka meno ko,+ wau vo e nkumbu ame ina muna yandi. 22 Avo nulemvokela e nding’andi una ufwene yo vanga mawonso mpovele, ikala se mbeni a mbeni zeno yo telamena awana bekunutelamena. 23 Kadi o mbasi ame okala kuna ntwal’eno, okununata kuna kwa Aneyamore, Anekete, Aneperese, Anekenani, Anekivi ye Aneyebuse, ikubafwasa.+ 24 Ke nuvumbamena nzambi zau ko ngatu sadila zo,* ke nutanginina mavangu mau ko.+ Kansi, nufwasa zo yo wula malunzi mau mavauka.+ 25 Nufwete sadila Yave wa Nzambi eno,+ oyandi osambula madia meno* yo maza meno.+ Ivengomona e yimbevo ova kati kweno.+ 26 Akento omu nsi aku ke besulula ko ngatu kala sita,+ ikuvana zingu kiandá.*

27 “Vitila walwaka, oyau bemona wonga mu kuma kiame,+ ikotesa e mvuanga vana kati kwa nkangu miawonso onuana miau, itinisa e mbeni zaku zawonso ova ntadisi aku wau okubasunda.*+ 28 Vitila walwaka, itwika lukendalalu* kwa mbeni zaku,+ o lukendalalu lutinisa Anekivi, Anekenani ye Anekete ova ntadisi aku.+ 29 Kiyinganesa yau awonso oku ntwal’aku mu mvu mosi ko, kimana e nsi yalembi sala e nkatu, e bulu ya mfuta yawokela yo kuvang’e mbi.+ 30 Malembe-malembe ikubayinganesa, yavana owutana yo vua e nsi.+

31 “Isikidisa mwingilu aku tuka kuna Mbu Ambwaki yakuna mbu wa Afelesetia, tuka kuna makanga yakuna Nzadi;*+ kadi iyekola esi nsi yoyo vana moko maku, ongeye okubayinga oku ntwal’aku.+ 32 Kufwete kanga e kangu yo yau ko ngatu ye nzambi zau.+ 33 Ke bafwete zingila mu nsi eno ko, kimana balembi kunufila mu kunsumukina. Avo osadidi e nzambi zau, ediadi dikala se sokolo kwa ngeye.”+