Afundisi

11 Yefeta+ wa Mungiladi, kesa diangolo kakala; mwan’a nkembi* kakala, o Ngiladi i se dia Yefeta. 2 Kansi, nkaz’a Ngiladi mpe wanwutila wan’amakala. Vava wan’a nkaz’andi bakolele, bayingidi Yefeta, bamvovese vo: “Kukala ye vua ko omu nzo a se dieto, kadi u mwan’a nkento ankaka.” 3 Muna kuma kiaki, Yefeta otinini mpangi zandi, okedi kuna nsi a Tobe. Wantu ana bakondwa salu bayikamene Yefeta yo kunlanda.

4 Vava vavioka fikolo, Aneyamone banuanisi Isaele.+ 5 Vava Aneyamone banuanisa Isaele, akuluntu a Ngiladi bendele Yefeta kuna nsi a Tobe. 6 Bavovese Yefeta vo: “Wiza, wakala mfumu eto kimana twanuanisa Aneyamone.” 7 Yefeta ovovese akuluntu a Ngiladi vo: “Nga ke yeno ko nuansaula yo kunginga muna nzo a se diame?+ Ekuma nuizidi kwa mono wau nuina mu mpasi?” 8 Akuluntu a Ngiladi bavovese Yefeta vo: “I diau twizidi kwa ngeye. Avo wele yeto yo nuanisa Aneyamone, okala se mfidi eto muna nkangu awonso a Ngiladi.”+ 9 Yefeta ovovese akuluntu a Ngiladi vo: “Avo nungiambwidi yavutuka ngienda nuanisa Aneyamone, o Yave kabatufakesa ova ngina, mfidi eno kikilu ikala!” 10 Akuluntu a Ngiladi bavovese Yefeta vo: “Yambula Yave kakala se mbangi* vava twina. Kieleka, tuvanga una ovovele.” 11 Yefeta wele ye akuluntu a Ngiladi, o nkangu unkitwidi se mfidi au ye mfumu a makesa. Yefeta ovovele diaka mambu mandi mawonso vana ndose a Yave kuna Misepa.+

12 Yefeta otumini anati a nsangu kwa ntinu a Aneyamone,+ oku vo: “Nkia diambu una diau yo mono, wau wizidi nuanisa e nsi ame?” 13 O ntinu a Aneyamone ovovese anati a nsangu a Yefeta vo: “Kadi Isaele vava kavaika muna Engipito wabaka nsi ame,+ tuka kuna Arenone+ yakuna Yaboke, yakuna Yodani.+ Owau, vutula yo kuna luvuvamu.” 14 Yefeta otumini diaka anati a nsangu kwa ntinu a Aneyamone 15 bamvovese vo:

“I wau wuwu kavovele Yefeta: ‘Isaele kakutumuna nsi ya Anemoabe+ ko yovo nsi ya Aneyamone,+ 16 kadi vava bavaika muna Engipito, Isaele muna makanga baviokela yakuna Mbu Ambwaki+ yo lwaka kuna Kadese.+ 17 Isaele watuma diaka anati a nsangu kwa ntinu a Edome,+ oku vo: “Dodokolo, utuyambula twaviokela muna nsi aku,” kansi ntinu a Edome katonda ko. Bavovese diau dimosi kwa ntinu a Moabe,+ kabawila ko. I dianu Isaele kakadila muna Kadese.+ 18 I bosi baviokela muna makanga, yo zieta Edome+ ye nsi a Moabe. Baviokela kuna este a nsi a Moabe+ yo sikidisa ndo muna zunga kia Arenone; ke balwaka muna mwingilu a Moabe ko,+ kadi Arenone i mwingilu a Moabe.

19 “‘I bosi, Isaele watuma wantu kwa Sikone wa ntinu a Aneyamore, wa ntinu a Kesebone. Isaele umvovese vo: “Yambula, do, twaviokela mu nsi aku twenda kuna fulu kieto.”+ 20 Kansi Sikone wau kalembi bunda Isaele e vuvu kimana kaviokela muna zunga kiandi, okutakese nkangu andi, bele kiatama kuna Yaza yo nuanisa Isaele.+ 21 Yave wa Nzambi a Isaele oyekwele Sikone yo nkangu andi wawonso vana koko kwa Isaele, babatufakese. Isaele obakidi nsi yawonso ya Aneyamore ye nkangu a nsi yayina.+ 22 Babakidi mvivu wawonso wa Aneyamore tuka kuna Arenone yakuna Yaboke, tuka kuna makanga yakuna Yodani.+

23 “‘Yave wa Nzambi a Isaele yandi wayinga Aneyamore vana vena nkangu andi Isaele,+ owau ongeye ozolele kubayinga? 24 Ongeye, nga kutambulanga yawonso ko kekuvananga Kemose+ wa nzambi aku e? I dianu vo, awonso ana Yave wa Nzambi eto kayinga ova twina, oyeto mpe yinga tukubayinga.+ 25 Nga osundidi Balaki+ wa mwan’a Sipo wa ntinu a Moabe? Nga Balaki katantana yo Isaele ngatu kubanuanisa? 26 Isaele 300 za mvu kakala muna Kesebone ye mavata mandi,*+ muna Arowa ye mavata mandi, ye muna mbanza zawonso zakala vana kumu dia Arenone, ekuma walembi mo kutumuinina muna kolo kiakina?+ 27 Omono kisumukini ko, kansi ngeye kaka okumpanganga e mbi muna kundwanisa. O Yave wa Mfundisi,+ yambula kazenga diambu o unu vana vena nkangu a Isaele yo nkangu Amone.’”

28 Kansi o ntinu a Aneyamone kazola wá ko mambu mana Yefeta kantumina.

29 Mwand’a Yave wizidi muna Yefeta,+ oviokele muna Ngiladi yo Manase kimana kenda kuna Misepa a Ngiladi,+ tuka kuna Misepa a Ngiladi wele kuna kwa Aneyamone.

30 Yefeta osidi nsilu+ kwa Yave, oku vo: “Avo oyekwele Aneyamone ova moko mame, 31 vava ivutuka kuna luvuvamu muna nuana yo Aneyamone, konso ona ovaika muna nzo ame muna kunkika, wa Yave kekala,+ ikuntambika se lukau lwa ngioka.”+

32 Yefeta, wele nuana yo Aneyamone, Yave ubayekwele vana koko kwandi. 33 Ubatufakese e ntufakesa angolo, tuka kuna Arowa yakuna Miniti—mbanza 20—yakuna Abele-keramime. Dianu vo Aneyamone basakidikwa vana ndose a Aneyisaele.

34 I bosi, Yefeta olweke kuna nzo andi kuna Misepa,+ mwan’andi ankento ovaikidi ye fingoma-ngoma yo kina, muna kunkika. Yandi i mwan’andi mosi kaka. Kakala diaka yo mwan’ayakala ko ngatu mwan’ankento. 35 Vava kamona mwan’andi, Yefeta otiazwini e mvuatu miandi, ovovele vo: “Ekwe mwan’ame! Okosomwene ntim’ame,* kadi ngeye mbembwele. Nsilu nsidi* kwa Yave, kilendi vutuka manima ko.”+

36 Kansi, o mwana umvovese vo: “E tata, wau osidi nsilu kuna kwa Yave, umpanga dina osididi o nsilu,+ wau vo Yave olandidi e mbeni zaku e kunda, Aneyamone.” 37 Ovovese se diandi vo: “Edi kaka ndombele: Ungiambula ngonde zole, ngienda kangala muna miongo, yadidila kimwenze kiame, omono ye akwame.”*

38 Umvovese vo: “Wenda!” Unsindikidi kakala kûna ngonde zole, wele kuna miongo ye akwandi kimana kadila kimwenze kiandi. 39 Vava kialunga ngonde zole, ovutukidi kwa se diandi. I bosi Yefeta olungisi nsilu una kasia mu kuma kiandi.+ Kasidi leka yo yakala ko. Ediadi dikitukidi se fu* muna Isaele: 40 Wan’amakento a Isaele mvu ke mvu, bayendanga kingula mwan’ankento a Yefeta wa Mungiladi muna kunsanisina, lumbu yá muna mvu.