Daniele

6 Dareyuse wamona vo diambote katumbika akumbi 120 muna kintinu kiandi kiawonso.+ 2 Vakala ye mbanda-mbanda tatu babasunda e wisa, mosi muna yau i Daniele;+ akumbi+ batanga mbalu kwa yau kimana ntinu kalembi baka mfwilu. 3 Daniele waluta tunda ke mu mbanda-mbanda ye akumbi akaka ko, kadi mwand’ambote wakala yandi,+ o ntinu wazola kunsia va fulu kilutidi tundalala muna kintinu kiawonso.

4 Muna kolo kiakina, mbanda-mbanda ye akumbi bavavanga kuma kia fundila Daniele muna mambu ma kintinu, kansi ke balendanga solola kuma kia kumfundila ko yovo diambu diambi, kadi vuvu kabundwanga, kavezanga salu kiandi ko ngatu soloka vilwa muna yandi. 5 Wantu awaya bavovele vo: “Ke tulenda solola kuma ko tufundila Daniele, avo ke mu nsiku a Nzambi andi ko.”+

6 Ozevo, e mbanda-mbanda ye akumbi bele kwa ntinu muna buka, bamvovese vo: “E Dareyuse wa Ntinu, zinga yakwele mvu. 7 E mbanda-mbanda zawonso za kintinu, atwadisi, akumbi, aludiki ye nguvulu bakutakene, bawizane vo vasikidiswa nsiku a kintinu yo kanikina vo muna lumbu 30, konso ona ovanga ndomba kwa konso nzambi yovo muntu ankaka avo ke kwa ngeye ko, e ntinu, kafwete tubwa muna wulu dia nkosi.+ 8 Owau, e ntinu, sikidisa nsiku, wasia wo dimbu+ kimana walembi sobwa mun’owu wa nsiku a Amadai ye Aparasi, una ke ulendi sobwa ko.”+

9 Dianu vo Dareyuse wa Ntinu wasina nsiku ye nzengo.

10 Daniele vava kazaya wo vo nsiku usikidisu yo siwa dimbu, wele kuna nzo andi ina yakala ye zianela za suku diantandu zaziuka, zakala mantalani ye Yerusaleme.+ Ofukamene, osambidi yo kembelela Nzambi andi, nkumbu tatu muna lumbu, wauna kateka vanganga ntangwa zawonso. 11 Muna ntangwa yayina, wantu awaya bakotele yo solola Daniele ekolo kalombanga yo dodokela kimana kavua e dienga vana ndose a Nzambi andi.

12 Dianu vo bele vovesa ntinu, bansungamese nsiku wa kintinu, oku vo: “Nga kwasinini nzengo ko vo muna lumbu 30, konso ona ovanga ndomba kwa konso nzambi yovo kwa muntu ankaka avo ke kwa ngeye ko, e ntinu, kafwete tubwa muna wulu dia nkosi?” Ntinu ovutwidi vo: “E diambu diatoma sikidiswa mun’owu wa nsiku wa Amadai ye Aparasi owu ke ulendi vunzunua ko.”+ 13 Vana vau bavovese ntinu vo: “Daniele una vo mosi muna abakami a Yuda,+ ke kuzitisanga ko, e ntinu, ngatu zitisa nsiku una wasidi e dimbu, nkumbu tatu kesambanga muna konso lumbu.”+ 14 Vava ntinu kawidi diambu diadi, oyangamene ntima, oyindwidi e mpila kalenda vuluzila Daniele; yamuna ndimuk’a ntangwa, ovangidi mawonso muna kumvuluza. 15 I bosi wantu awaya bele kwa ntinu muna buka, bavovese ntinu vo: “Toma tala, e ntinu, muna nsiku a Amadai ye Aparasi, avo ntinu osikidisi nzengo yovo nsiku, ke ulendi sobwa ko.”+

16 Muna kuma kiaki, ntinu ovene nkanikinu, batwese Daniele yo kuntuba muna wulu dia nkosi.+ Ntinu ovovese Daniele vo: “O Nzambi aku ona otatamananga sadila okuvuluza.” 17 I bosi, batwese tadi, basidi dio muna nu’a wulu, o ntinu osidi dio dimbu kia mpeto andi ye dimbu kia mpeto y’akwa tunda andi kimana valembi sobwa diambu muna mambu mawonso ma Daniele.

18 I bosi, ntinu wele kuna lûmbu lwandi. Oviokese fuku wawonso lembi dia, kazolele wá miziki ko, kalendele leka ko.* 19 Vava kuma kwayantika vunguka, o ntinu otelamene, wele mu nzaki kuna wulu dia nkosi. 20 Vava kafinamene vana wulu, obokele Daniele ye nkenda zawonso. O ntinu oyuvuidi Daniele vo: “E Daniele, wa selo kia Nzambi amoyo, nga Nzambi aku ona otatamananga sadila olendele kuvuluza muna nkosi?” 21 Vana vau Daniele ovutwidi kwa ntinu vo: “E ntinu, zinga yakwele mvu. 22 O Nzambi ame otumini mbasi andi, okangidi e nua mia nkosi,+ ke zimpangidi diambu ko,+ kadi kisolokele ye kuma ko vana ndose andi; kivangidi kwame diambu diambi ko kwa ngeye, e ntinu.”

23 Ntinu oyangalele kikilu, okanikini vo batombola Daniele muna wulu. Vava Daniele katombolwa muna wulu, bamwene vo e nkosi ke zinlwekele ko, kadi obundidi vuvu kwa Nzambi andi.+

24 I bosi, ntinu ovene nkanikinu vo wantu ana bafunda Daniele batwaswa, batubilu muna wulu dia nkosi, kumosi yo wan’au ye akazi au. Una ke balwaka vana sina dia wulu ko, e nkosi zibabakidi yo kosomona e visi yau yawonso.+

25 Dareyuse wa ntinu osonekene nkanda kwa nkangu miawonso, zula ye ndinga zivovuanga muna nza yawonso:+ “Yambula luvuvamu lwakala yeno! 26 Nkanikini vo muna mvivu miawonso mia kintinu kiame, wantu bazakama ye wonga vana vena Nzambi a Daniele.+ Kadi yandi i Nzambi amoyo ozinganga yakwele mvu. E kintinu kiandi ke kifwaswa ko, e kimfumu kiandi kiakwele mvu.+ 27 Ovuluzanga, vevola+ yo vanga sinsu ye masivi kuna zulu yo va ntoto,+ kadi ovuluzi Daniele muna kandazi ya nkosi.”

28 Muna diadi, Daniele ovuatumukini muna kintinu kia Dareyuse+ ye muna kintinu kia Kurese wa Mparasa.+