Ntalu

6 Yave ovovese diaka Mose vo: 2 “Vovesa Aneyisaele vo: ‘Avo yakala yovo nkento osidi nsilu a mfunu wa zingila se Mvambuki+ kuna kwa Yave, 3 kafwete vavuka e vinyu yo malavu mawonso mankolwa. Kafwete nua vinagre ya uva ko yovo vinagre ya konso lekwa kikolesanga.+ Kafwete nua maza matukidi mu uva ko ngatu dia uva, kiakala yankunzu yovo yayuma. 4 E lumbu yawonso ya Kimvambuki kiandi kafwete dia konso lekwa ko kivangilu muna nsing’a vinyu, tuka muna uva yankunzu yamuna titi yandi.

5 “‘E lumbu yawonso ya nsilu a Kimvambuki kiandi, kuna ntu andi ke kufwete viokela mbele a vuayi* ko.+ Kafwete kwamanana wavauka, muna yambula vo e nsuki za ntu andi zakula yavana ilunga e lumbu yandi ya kukiyekola kwa Yave. 6 Kafwete finama* muntu* afwa ko muna lumbu yawonso kekwamanana wavambuka kuna kwa Yave. 7 Kana nkutu vo se diandi yovo ngudi andi yovo mpangi andi yovo nsang’andi ofwidi, kafwete kuyifunzula ko,+ kadi e nsuki za ntu andi i sinsu kia Kimvambuki kiandi.

8 “‘Oyandi wavauka kuna kwa Yave muna lumbu yawonso ya Kimvambuki kiandi. 9 Kansi, avo muntu ofwididi vana ndambu andi+ kuna kinsalukisa yo funzula e nsuki zisunzulanga o vambuka kwandi kuna kwa Nzambi,* kafwete vala o ntu andi+ muna lumbu kia luveleleso lwandi. Kafwete zo vala muna lumbu kiansambwadi. 10 Muna lumbu kianana, kafwete twasa mbwela zole yovo nsweswe miole mia mayembe kwa nganga vana mwelo a saba kia wananina. 11 O nganga otambika imosi se lukau lwa sumu, e yankaka se lukau lwa ngioka yo lomba luyambulwilu lwa sumu dia muntu,+ kadi osumukini wau kafinamene muntu* afwa. O mvambuki kafwete vaula o ntu andi muna lumbu kiokio. 12 Kafwete kuyivambula diaka kwa Yave muna vutukila e lumbu yandi ya Kimvambuki, otwasa mwan’a meme dia koko wa mvu mosi se lukau lwa kuzuka. Kansi, e lumbu ina yavita ke itangwa ko wau vo wafunzwidi e Kimvambuki kiandi.

13 “‘Owau i nsiku mu kuma kia Mvambuki: Vava kelungisa lumbu nana ya Kimvambuki+ kiandi, otwaswa vana mwelo a saba kia wananina. 14 Ivavana kesunzulwila lukau lwandi kwa Yave: mwan’a meme dia koko dialunga dia mvu mosi se lukau lwa ngioka,+ mwan’a meme ankento walunga wa mvu mosi se lukau lwa sumu,+ meme diakoko dialunga se kimenga kia ungudi,+ 15 mbangu a mbolo zina nga nlunga zakondwa mfuna, zavangilwa mu mfumfu yambote yasangwa o mazi; mbolo zababama zakondwa mfuna, zasangwa o mazi yo tukau twau twa mbwaza+ ye twa ndua.+ 16 O nganga osunzula e lekwa yayi vana ntadisi a Yave yo tambika lukau lwa sumu yo lukau lwa ngioka. 17 Otambika e meme dia koko se kimenga kia ungudi kwa Yave kumosi ye mbangu a mbolo zakondwa mfuna, o nganga osunzula mpe lukau lwa mbwaza+ yo lukau lwa ndua lwa meme diakoko.

18 “‘I bosi, o Mvambuki kafwete vala e nsuki za ntu andi*+ vana mwelo a saba kia wananina, obonga e nsuki za ntu andi zina zikolele muna kolo kia Kimvambuki kiandi yo sia zo vana tiya tuna kuna nsi a kimenga kia ungudi. 19 O nganga kafwete bonga e vembo diafukuswa+ dia meme dia koko, obonga muna mbangu mbolo imosi ina nga nlunga yakondwa mfuna ye mbolo imosi yababama yakondwa mfuna, osia zo vana moko ma Mvambuki vava kemana vala e sinsu kia Kimvambuki kiandi. 20 O nganga ozunganisa yo kuna ntwala y’oku nima nga lukau lwa zunganisa vana ntadisi a Yave.+ Ekiaki lekwa kiavauka kia nganga, kumosi ye tulu kia lukau lwa zunganisa yo kulu kwa lukau.+ I bosi, o Mvambuki olenda kwandi nua e vinyu.

21 “‘Owau i nsiku mu kuma kia Mvambuki+ ona osidi nsilu: Avo olenda vana lukau kwa Yave luviokele luna lulombwanga muna Kimvambuki kiandi yo sia nsilu muna diambu diadi, kafwete lungisa o nsilu andi mu kuma kia nsiku a Kimvambuki kiandi.’”

22 I bosi, Yave ovovese Mose vo: 23 “Zayisa Arone yo wan’andi vo: ‘I wau wuwu nusambulwila+ o nkangu a Isaele. Nubavovesa vo:

24 “Yambula Yave kanusambula+ yo kunulunga-lunga.

25 Yambula e ndose a Yave yakezima kwa yeno+ yo kunusonga e dienga.

26 Yambula Yave kanutadila kuna ngemba* yo kunuvana luvuvamu.’”+

27 Oyau bafwete yika e nkumbu ame muna nkangu a Isaele,+ kimana yabasambula.”+