Sunda Fu kia Sakanena Kiyakala Yovo Kikento

E fu kia sakanena kiyakala yovo kikento fu ki’eloko, ngindu za muntu kiyivisanga yo kendeleka Nzambi.a O muntu osakanenanga kiyakala yovo kikento kiandi muntu akaka kelengokelanga moyo mu vava lungisa e nsatu za vukana nitu. Ke badikilanga mvukana za nitu ko vo vangu dia songaziana o zola muna longo, kansi obadikilanga dio nze vangu dia muena kiese kia kolo kiandwelo yo vevola e nsatu za vukana nitu. Luvevoko lwalu lwa kolo kiandwelo kaka. Vana fulu kia fwasa eketo diambi dia yikwa ya nitu nze “zumba, nsafu, [mvukana za nitu za lembi songa] vengenene,” e fu kia sakanena kiyakala yovo kikento kiwokesanga eketo diadi.—Kolosai 3:5.

Paulu wa ntumwa wasoneka vo: “Azolwa, mbula twayikiànzisa muna nsafu wawonso wa nitu yo mwanda, tuzikul’o velela muna vumi wa Nzambi.” (2 Korinto 7:1) Avo diampasi dikalanga mu lemvokela e nkanikinu wau, ku dimbula vuvu ko. O Yave nsadisi ye ‘nloloki.’ (Nkunga 86:5; Luka 11:9-13) Kanele vo ezak’e ntangwa lenda bwa diaka muna vangu diadi, kuyiyelesa ko. E ngolo ovanganga mu yambula fu kiaki zisonganga vo kani diambote una diau. Sungamena mpe vo “Nzambi osundidi ntima mieto, o mambu mawonso ozeye mo.” (1 Yoane 3:20) O Nzambi ke talanga kaka masumu meto ko; kansi makani ma ntima ketalanga. E diadi dikumfilanga mu wa sambu ye ndodokela zeto. Nze mwana ovavanga lusadisu kwa se diandi muna ntangw’a mpasi, kuyoyi ko muna kuyisakidika yo samba kwa Nzambi. Yave okusambula ye ntona zavelela. (Nkunga 51:1-12, 17; Yesaya 1:18) Kansi, fwete vanga ngolo muna sadila mana olombanga muna sambu yaku. Kasikil’owu, ofwete venga tala yovo tanga mavangu mawonso ma zumba kumosi mpe ye yikundi yambi.b

Avo fu kia sakanena kiyakala yovo kikento kiakinu, lomba lusadisu kwa yitu una vo Nkristu yovo mpangi wazikuka muna mwanda yovo kwa nkundi.c—Ngana 1:8, 9; 1 Tesalonika 5:14; Tito 2:3-5.