Yesu Olongele Nkento Wa Musi Samaria

Wau batukidi muna Yuda yo kwenda kuna Ngalili, Yesu ye alongoki andi baviokele kuna node ya zunga kia Samaria. Bayoyele mu kuma kia mabibi ma diata. Muna midi, bavundidi vana mbela mbanz’a Sika, vana sima kiatimwa yovo kiasumbwa kwa Yakobo vioka tandu yayingi. Yamu unu, lukufi ye mbanz’a Nablus, vena ye sima kia mpila yayi.

Ekolo Yesu kevundanga vana ndambu a sima, alongoki andi bele sumba madia muna mbanza ina lukufi. Ekolo alongoki bena muna mbanza, nkento wa musi Nsamaria wizidi teka maza. Yesu umvovese vo: “Umpana maza yanua kwame.”—Yoane 4:7.

Ayuda ye Asamaria ke bewizananga ko mu kuma kia fu kia sia mpambula bekalanga kiau tuka kolo. O nkento osivikidi, unyuvuidi vo: “Ongeye u Nyuda, aweyi olombele maza kwa mono nkento a Nsamaria?” Yesu umvutwidi vo: “Kele vo wazaya o lukau lwangovo lwa Nzambi ye ndioyo uvovese vo, ‘Umpana maza yanua kwame,’ nga unlombele, oyandi wadi kuvana maza mamoyo.” O nkento umvovese vo: “E Mfumu, kuna ye lekwa kiatekela maza ko, e sima kiakobama. Ozevo, akweyi metuka maza mama mamoyo? Nga osundidi se dieto Yakobo, ona watuvana e sima, oyandi wanuina kio yo wan’andi ye twelezi yandi e?”—Yoane 4:9-12.

Yesu umvutwidi vo: “Konso ona onua maza mama vuina diaka kemona. Kansi ndiona onua maza mana ikumvana, kemona diaka vuina ko yakwele mvu, o maza mana ikumvana, mekituka se sima kia maza mefusukilanga muna yandi yo kumvana moyo a mvu ya mvu.” (Yoane 4:13, 14) Kieleka, kana una vo wayoya kena, Yesu osamwini kwa nkento wa musi Samaria e ludi kivananga moyo.

O nkento umvovese vo: “E Mfumu, umpana maza momo, kimana yalembi mona diaka vuina, ngatu ngizanga kaka okwaku yateka maza.” Owau Yesu osobele moko, umvovese vo: “Wenda bokela nkaz’aku, nwiza.” O nkento umvutwidi vo: “Kina ye yakala ko.” Nanga, o nkento osivikidi kikilu wau Yesu kamvovese vo: “Olungidi kwaku wau ovovele vo, ‘Kina ye yakala ko.’ Kadi akazi tanu wakala yau, ndiona una yandi owau, ke nkaz’aku ko.”—Yoane 4:15-18.

O nkento obakwidi mana Yesu kavovele, osivikidi yo vova vo: “E Mfumu, mbwene wo vo u ngunza.” Muna mvovo miami osongele vo, mambu ma mwanda kevuanga o mfunu. Mu nkia mpila? Ovovele diaka vo: “O mase meto [esi Samaria] vana mongo [a Ngerezimi, una lukufi], wau basambilanga, kansi oyeno [Ayuda] nuvovele vo o wantu kuna Yerusaleme bafwete sambidilanga.”—Yoane 4:19, 20.

Kansi, o Yesu muna songa vo e fulu kia sambidila ke kina mfunu ko, ovovele vo: “Ntangwa ikwiza, ke nusambila Se vana mongo wau ko ngatu kuna Yerusaleme.” I bosi, umvovese diaka vo: “E ntangwa ikwiza, i yau yiyi, ina vo asambidi aludi besambila o Se muna mwanda ye ludi, kadi o Se, wantu a mpila yayi kevavanga bansambila.”—Yoane 4:21, 23, 24.

E mpila asambidi kieleka besambidilanga o Se, i diau kevuanga mfunu, ke fulu kia sambidila ko. O nkento osivikidi kikilu, ovovele vo: “Nzeye wo vo Masia okwiza, ona oyikilwa vo Kristu. Avo wizidi, okutusamunwina mawonso.”—Yoane 4:25.

I bosi, Yesu umvovese ludi kiawonso vo: “I mono yuyu ivovananga yaku.” (Yoane 4:26) Yindula ediadi! Nkento ndioyo maza mandi kezidi teka muna midi, kansi Yesu umvovese vo yandi i Masia! Ediadi diamfunu kikilu, kadi Yesu kasidi dio zayisa kwa wantu ankaka ko vo, yandi i Masia.

Alongoki a Yesu batukidi kuna Sika ye madia mau. Bawene Yesu vana sima kia Yakobo vana bansisidinge, kansi owau nkento wa musi Nsamaria kemokenanga yandi. Vava balueke, nkento wa musi Nsamaria osisidi o mvungu andi a maza, wele vutuki muna mbanza.

Vava kalueke muna Sika, o nkento ozayisi kwa nkangu mana Yesu kamvovese. Ubavovese ye ziku kiawonso vo: “Nwiza tala muntu unsamunwini mawonso yavanga.” Nanga muna tunta e sungididi kia wantu, oyuvuidi vo: “Nga ke yandi ko i Kristu e?” (Yoane 4:29) Diadi i diambu disundidi o mfunu, kadi o wantu bevingilanga dio tuka muna lumbu ya Mose. (Nsiku 18:18) Dianu vo, o nkangu wawonso muna mbanza wizidi kwa Yesu kimana bakimwena.

Mu kolo kiaki, alongoki bavovese Yesu kadia madia bezidi mau. Kansi Yesu ubavutwidi vo: “Ngina ye madia i dia, mana nulembele zaya.” Alongoki bayuvuzianini vo: “Nga muntu untwasidi madia e?” Yesu ubavovese diambu dina ye nsas’a mpwena kuna kwa alongoki andi awonso, ovovele vo: “O madia mame i vanga luzolo lwa ndiona wantuma, yamanisa mpe salu kiandi.”—Yoane 4:32-34.

E salu kavovele o Yesu ke kia kutika mbongo ko, eki kisalwa vava kivioka tezo kia ngonde yá. Yesu salu kia kutika mbongo a mwanda kavovele, nze una usongele mvovo miandi: “Nusengola o meso nwatala e mpatu, zibweke, e nsungi a nkutika ifwene. O nsâdi otambwidi kala mfutu, okutikilanga e mbongo muna moyo a mvu ya mvu, kimana o nkuni yo nsâdi bakembela kumosi.”—Yoane 4:35, 36.

Nanga, Yesu obakwidi e nluta mia moko kiandi yo nkento wa musi Nsamaria. Muna kuma kia kimbangi kia nkento wa musi Nsamaria, ndonga muna Sika bakwikidi muna Yesu, kadi o nkento ubavovese vo: “Unsamunwini mawonso yavanga.” (Yoane 4:39) O wantu ana batukidi muna Sika yo kwiza ku sima, bavovese Yesu vo kakala yau kimana kabalonga mambu mayingi. Yesu otambulwidi e ndomb’au, onangini lumbu yole muna Samaria.

Vava esi Samaria bawidi malongi ma Yesu, ndonga bakwikidi muna yandi. Bavovele kwa nkento vo: “Ke tukwikidila kaka mu kuma kia dina ovovele ko; kadi yeto kibeni tukiwididi, tuzeye wo mpe vo muntu ndioyu i mvuluzi a nza kikilu.” (Yoane 4:42) Kieleka, o nkento wa Nsamaria mbandu ambote kasongele mu mpila tulenda sila umbangi mu kuma kia Kristu. Tufwete sadilanga e mvovo milenda tunda e sungididi kia wantu bekutuwanga kimana bavava zaya diaka mayingi.

Sungamena dio vo ngonde yá zisidi vitila e nsungi a nkutika yayantika. Nanga i nkutik’a bale, kadi i mbongo ikutikwanga muna nsungi a masanza muna zunga kia Samaria. Nanga mu ngonde a Novemba yovo Desemba. Ediadi disongele vo, kuna nim’a nduta ya mvu 30 wa tandu kieto, Yesu ye alongoki andi vioka ngonde nana bavangidi muna Yuda, belonganga yo vuba. Owau, bele kwau kuna vata diau, kuna Ngalili. Nkia mambu bewanana mau?