Salu Kia Yesu Muna Ngalili Yawonso

Yesu ye alongoki andi salu kiayingi bakedi kiau muna Kafanau. Muna nkokela, esi Kafanau bantwasidi e mbevo kimana kabawuka. Yesu kena ye ntangwa yayingi ko yakala va fulu kia yandi kaka.

Muna mene-mene, Yesu osikamene, ovaikidi muna mbanza, wele vavi e fulu kalenda kala yandi mosi kaka kimana kasamba kwa Se diandi. Kansi, kolo kiakete kaka kakedi yandi mosi. Vava bamwene vo Yesu kena yau ko, “Simone ye awana bakedi yandi” bele kumvava. Wau vo mu nzo a Petelo kakele, nanga i kuma o Petelo kendele kumvavila.—Maku 1:36; Luka 4:38.

Wau bamwene Yesu, Petelo ovovele vo: “Awonso ngeye bevavanga.” (Maku 1:37) Kalukatikisu ko vo, esi Kafanau bazolele vo Yesu kakala kaka mûna. Kieleka, wau bayangalele mana kavavangidi, ‘ke bazolele ko katuka vana bena.’ (Luka 4:42) Ovanga masivi mawuka nga i salu kiantete o Yesu kayizila ova ntoto? Nga mu mbanza yayi kaka kefokolwela e salu kiandi? Adieyi Yesu kavovele mu kuma kia diambu diadi?

Yesu ovovese alongoki andi vo: “Twenda kweto muna fulu yankaka, muna mavata mafinamene, yalongela mpe mwamuna, kadi ekiaki i kuma yayizila.” Yesu ovovese mpe wantu ana bazolele vo kakala kaka yau: “Mfwete kwenda mpe muna mavata mankaka, yasamun’e nsangu zambote za Kintinu kia Nzambi, kadi i diau yatuminwa.”—Maku 1:38; Luka 4:43.

Dialudi, olonga oma ma Kintinu kia Nzambi i kuma kiantete o Yesu kayizila ova ntoto. E Kintinu kiaki i kivelelesa nkumbu a Se diandi yo sukisa emvimba e mpasi za wantu awonso. Masivi mawuka kavangidi Yesu i sinsu kisonganga vo Se diandi wantuma. Diau adimosi mpe diavangama muna tandu yavioka, Mose wavanga masivi mampwena masonganga vo Nzambi kikilu wantuma.—Luvaiku 4:1-9, 30, 31.

Muna kuma kiaki, Yesu ye alongoki andi yau yá bakatukidi muna Kafanau bele alongi muna mavata mankaka. Alongoki awaya i Petelo yo Andere wa mpangi andi, Yoane yo Yakobo wa mpangi andi. Lumingu lumosi luviokele tuka babokelelwa mu kangala yo Yesu mu samuna e nsangu zambote.

E nkangalu a Yesu y’alongoki awaya muna Ngalili utwese nluta miayingi. Kadi, mwawonso bawidi oma ma Yesu. “E nsangu zandi zimwanganene muna Suria yawonso,” muna mbanza kumi ziyikilwanga vo Dekapole ye kuna simu dia Nkoko a Yodani. (Matai 4:24, 25) E ndong’ayingi itukidi mu zunga yayina, ye awana batukidi muna Yuda, balende Yesu y’alongoki andi. Ayingi batwese mbevo zau. Yesu ka bafusulwisi nsoni ko, owukidi mbevo yo vaikisa mianda miambi kw’awana bena ye nkuya.