Mu Nkia Mpila Yesu Yo Nzambi Benena Mosi?

Yesu wizidi mu Yerusaleme muna Lambu dia Lusunzulu lwa Tempelo (yovo Hanuka). O nkinzi wau ukembelwanga muna sunzula tempelo muna nkumbu anzole. Vioka tandu kimosi, Antíoco wa Ntinu a yá wa Suria, watunga ziku vana tandu a ziku diampwena dia tempelo a Nzambi. Kuna kwalanda, o wan’a ngang’ambuta mosi wa Nyuda, bakutumuna Yerusaleme yo sunzula diaka e tempelo kwa Yave. Tuka wauna, konso mvu Ayuda bevanganga nkinzi mu lumbu kia 25 mu ngonde a Kisileu, o kinzi wau ulwakanga yamuna ngonde a Novemba ye lubantiku lwa Desemba.

Eyayi i nsungi a kiozi. Yesu mu kangala kena muna tempelo vana yanzala kia vitu dia Solomo. Ayuda bezidi zunga Yesu, banyuvuidi vo: “Nkia kolo okututelames’o ntima? Avo ngeye i Kristu, toma wo kutusamunwina.” (Yoane 10:22-24) O Yesu nkia mvutu kekubavana? Ubavutwidi vo: “Yakunusamunwina wo, yeno ke nukwikila.” Yesu kabavovese vana vau ko vo yandi i Kristu, nze una kavovesa nkento wa musi Samaria vana sima kia maza. (Yoane 4:25, 26) Kansi ubasongele kana nani kena. Ubavovese vo: “Vava ke kiawutukidi Abarayama ko, omono yakikadila.”—Yoane 8:58.

Yesu ozolele vo, o nkangu wau kibeni wabakula vo yandi i Kristu. Batezanesa mavangu mandi ye mana masakulwa mu kuma kia Kristu. E kiaki i kuma kavoveselanga alongoki andi balembi zayisa o wantu vo yandi i Masia. Kansi owau, Yesu otomene zayisa kwa mbeni zandi Ayuda vo: “O mavangu mana ivangilanga muna nkumbu a Se diame, i mau mekunsilanga umbangi. Kansi yeno ke nukwikila.”—Yoane 10:25, 26.

Ekuma balembele kwikidila vo Yesu i Kristu? Yesu ovovele vo: “Kansi yeno ke nukwikila, e kuma kadi, ke nu mameme mame ko. O mameme mame mewanga nding’ame, omono nzeye mo, mekundandanga. Omono ikubavana moyo a mvu ya mvu, ke mekuyifwila ko yakwele mvu, ke vena ona okutumuna mo ko omu moko mame. O Se diame kina kampene kisundidi yawonso.” I bosi, Yesu ubasongele vo ngwizani ambote kena yau yo Se diandi, ovovele vo: “Omono yo Se diame tu mosi.” (Yoane 10:26-30) O Yesu ova ntoto kena, o Se diandi kuna zulu kekalanga, ozevo e mvovo mia Yesu ke misongele ko vo yandi yo Se diandi muntu mosi bena. Kansi kani dimosi bena diau, ntwadi bena.

E mvovo mia Yesu mifungisi Ayuda makasi, bantubidi matadi kimana bamvonda. Yesu kamwene wonga ko. Ubavovese vo: “Mavangu mayingi mambote ma Se diame yanusonga. Mu nkia vangu nukuntubila matadi?” Bamvutwidi vo: “Ke tukutubila matadi mu kuma kia vangu diambote ko, kansi muna ntianguna otiangwini Nzambi; kadi ongeye, u muntu, kansi uyikitwidi se nzambi.” (Yoane 10:31-33) Yesu kasidi vova ko vo yandi i nzambi. Kansi, ekuma bena kumvunina o mambu?

O Yesu edi kazolele vova vo, oyandi una yo nkuma una Ayuda bekwikilanga vo Nzambi kaka ofwete kala wau. Muna bong’e nona, Yesu edi kavova mu kuma kia “mameme”: “Omono ikubavana moyo a mvu ya mvu,” o wantu ke balendi wo vanga ko. (Yoane 10:28) Ayuda bavilakene vo Yesu otambulwidi vo, e wisa kena kiau Se diandi wamvana kio.

Muna zenga o mfundu au wa luvunu, Yesu ubayuvuidi vo: “Nga ke diasonama muna Nsiku eno ko vo [muna Nkunga 82:6], “Nu zinzambi”? Avo ntozi a nkunga wabayikila “nzambi” ana batumbwa kwa diambu dia Nzambi . . . Omono yavaulwa kwa Se yo tumwa ova nza, oyeno numpovese vo, ‘Otiangwini Nzambi,’ wau mpovele vo, ‘i Mwan’a Nzambi e’?”—Yoane 10:34-36.

Kieleka, e Sono iyikilanga nkutu afundisi bakondwa unsongi vo, “zinzambi.” Ozevo, ekuma Ayuda bena fundisila Yesu wau kavovele vo, “Mono i Mwan’a Nzambi”? Yesu ovovele diambu difwete kubakwikidisa: “Avo ndembele vanga mavangu ma Se diame, ke nukunkwikila ko. Kansi avo mvangidi mo, kanele vo nulembi kunkwikila, nukwikila o mavangu mama, kimana nwazaya yo toma visa vo o Se wina yame ntwadi, omono mpe ntwadi ngina yo Se.”—Yoane 10:37, 38.

Ayuda vava bawidi wo, bavavidi kanga Yesu, kansi otinini kwandi. Yesu okatukidi muna Yerusaleme wele kuna simu dia Nkoko a Yodani, kuna zunga kina Yoane kavubilanga wantu se mvu yá miviokele kala. Ke kwandá ko ye zunga kia sude kia Mbu a Ngalili.

E ndonga izidi kwa Yesu, bamvovese vo: “O Yoane kavanga nkutu sinsu ko, kansi mawonso kavova mu kuma kia muntu ndioyo, maludi.” (Yoane 10:41) Dianu vo, ayingi muna Ayuda bakwikidi muna Yesu.