LONGI DIA 41
Adieyi Bibila Kivovanga mu Diambu Ditadidi Vukana?
Wantu ayingi nsoni bemonanga mu vovela diambu ditadidi vukana. Vava Bibila kivovelanga e diambu diadi, kivovelanga dio mu mpila yatoma kiá kansi kuna luzitu lwawonso. Dina Bibila kivovanga nluta dikututwasilanga, kadi e Bibila kwa Yave wa Mvangi eto kiatuka. Okutuvovesanga mana tulenda vanga muna kunyangidika ye mana malenda kutusadisa mu kala ye zingu kiakiese yakwele mvu.
1. Azeyi i ngindu za Yave mu diambu ditadidi vukana?
O vukana i lukau lwatuka kwa Yave. Ozolele vo yakala yo nkento ana bakazala bamona e kiese kia lukau lwalu. O lukau lwalu, ke luvananga kaka lau ko kwa akazi mu wuta wana, kansi lukubavananga mpe lau dia songaziana zola. Ekiaki i kuma Diambu dia Nzambi divovelanga vo: ‘Mwena kiese muna nkento a kitoko kiaku.’ (Ngana 5:18, 19) Yave ozolele vo akazi basongaziananga e kwikizi. Muna kuma kiaki, akazi bena vo Akristu ke bafwete tá zumba ko.—Tanga Ayibere 13:4.
2. Nki i mavangu ma zumba?
Bibila kikutuvovesanga vo: “Awana bekukivananga muna mavangu ma zumba . . . ke bevua Kintinu kia Nzambi ko.” (1 Korinto 6:9, 10) O mvovo wa Kingerekia wasadilwa muna Bibila mu yika mavangu ma zumba i pornei’a. O mvovo wau uyikanga (1) mvukana vana vena wantu ana ke bakazala ko,a (2) yakala ovukananga yo nkwandi yakala yovo nkento yo nkwandi nkento yo (3) vukana ye bulu. Vava ‘tukuyikenganga muna mavangu ma zumba,’ tuyangidikanga Yave ye dikututwasilanga nluta.—1 Tesalonika 4:3.
ZAYA DIAKA MANKAKA
Tala una olenda vengela mavangu ma zumba ye nluta olenda baka muna kwamanana ye fu yambote.
3. Tina mavangu ma zumba
Yosefe wa nkwa kwikizi wavanga e ngolo kimana kalembi tá zumba yo nkento wazola vo kavukana yandi. Tanga Tuku 39:1-12, i bosi, vana e mvutu za yuvu eyi:
Nkia diambu diafila Yosefe mu tina?—Tala tini kia 9.
Aweyi obenze, nga Yosefe nzengo zambote kabaka? Ekuma?
Aweyi matoko ye ndumba balenda tanginina mbandu a Yosefe yo tina mavangu ma zumba? Tala e VIDEO.
Yave ozolele vo twatina mavangu ma zumba. Tanga 1 Korinto 6:18, i bosi, vana e mvutu za yuvu eyi:
Nkia mambu malenda fila muntu mu bwa muna mavangu ma zumba?
Aweyi olenda tinina mavangu ma zumba?
4. Olenda yambula mavangu ma zumba
Ekuma dilenda kadila diampasi mu yambula mavangu ma zumba? Tala e VIDEO, i bosi, vana e mvutu za kiuvu kilende.
Nze una omwene muna video, vava mpangi kabakula vo e ngindu ye mavangu mandi malenda kumfila mu lembi songa kwikizi kwa nkaz’andi, adieyi kavanga?
Ezak’e ntangwa, kana nkutu Akristu ana bena ye kwikizi, divavanga vo bavanga e ngolo mu kwamanana kala ye ngindu zavelela. Nki kilenda kusadisa mu venga yindula mambu mambi? Tanga Filipi 4:8, i bosi, vana e mvutu za yuvu eyi:
Nkia mambu tufwete yindulanga?
Aweyi e fu kia tanganga e Bibila yo kukivana emvimba muna salu kia Yave dilenda kutusadisila mu sunda e ntonta?
5. Yave watuvana nkanikinu muna wete dieto
Yave ozeye edi diambote kwa yeto. Okutuvovesanga dina tufwete vanga mu kwamanana kala ye fu yambote ye nluta tulenda baka. Tanga Ngana 7:7-27 yovo tala e VIDEO, i bosi, vana e mvutu za yuvu ilende.
Aweyi toko dimosi kayisila muna ntonta?—Tala Ngana 7:8, 9.
E sono kia Ngana 7:23, 26, kisonganga vo e mavangu ma zumba malenda twasa mfwilu miayingi. Avo tukedi twavelela, nkia mpasi tuvenga?
Aweyi kadilu kiavelela kilenda kutusadisila mu vua moyo a mvu ya mvu?
Wantu ankaka beyindulanga vo dina Bibila kivovanga mu kuma kia vangu dia vukana yakala yo yakala yovo nkento yo nkento diambi kibeni. Kansi, o Yave wa Nzambi a zola ozolele vo wantu awonso bakala ye zingu kiakiese yakwele mvu. Muna vua e nsambu zazi, tufwete lemvokelanga e nkanikinu miandi. Tanga 1 Korinto 6:9-11, i bosi, vana e mvutu za kiuvu eki:
Nga kuna kwa Nzambi e vangu dia vukana yakala yo yakala yovo nkento yo nkento, ikiau kaka i zolela kiambi tufwete venga?
Avo tuzolele yangidika Nzambi, yeto awonso nsobani tufwete vanga. Nkia nluta dilenda kututwasila? Tanga Nkunga 19:8, 11, i bosi, vana e mvutu za yuvu eyi:
Nga obenze vo e nkanikinu mia Yave mfunu mina? Ekuma?
Yave osadisanga wantu ayingi mu lemvokela e nsiku miandi mia nkal’ambote. Olenda mpe kusadisa
AVO MUNTU UVOVESE VO: “O wantu wole bezolananga avo bavukanene lembi teka kazala, ke diambi kwandi ko.”
Nkia diambu okumvovesa?
MAMBU MASINA MA LONGI DIADI
O vukana i lukau lwatuka kwa Yave. Ozolele vo yakala yo nkaz’andi bamona e kiese kia lukau lwalu.
Nkia Mambu Olongokele?
Nki i mavangu ma zumba?
Nkia mambu malenda kutusadisa mu venga mavangu ma zumba?
Olemvokela nsiku mia Yave mia nkal’ambote, nkia nluta dikututwasilanga?
TALA MPE OMA MALENDE
Tala e kuma Nzambi kazolele vo yakala yo nkento ana bazolele zinga ntwadi, bafwete kazala ntete.
“Adieyi Bibila Kivovanga mu Kuma kia Akazi Bezinganga Ntwadi Lembi Kazala?” (Longi dina muna jw.org)
Bibila kivovanga vo e vangu dia vukana yakala yo yakala yovo nkento yo nkento diambi. Nga diadi disongele vo tufwete menganga awana bekuyivananga muna vangu diadi?
“Nga Diambi mu Vukana Yakala yo Yakala Yovo Nkento yo Nkento?” (Longi dina muna jw.org)
Tala una e nsiku mia Nzambi mu diambu ditadidi vukana mikututaninanga.
Muna zaya una yakala dimosi kayambulwila e fu kia vukana ye akwandi akala muna yangidika Nzambi, tanga lusansu “Elas me Trataram com Dignidade.”
“A Bíblia Muda a Vida das Pessoas” (Eyingidilu dia 1 dia Abidi, 2011)
a Kumosi ye mpila zawonso za vukana zambi, nze vukana muna nua ye ku mpitu a nima yovo simba kiyakala yovo kinkento kia muntu una vo ke nkaz’aku ko.