Yuvu Y’atangi

E mvovo mia Yesu muna Matai 19:10-12, nga misonganga vo awana basola zingu kia kimpumpa mu mpil’esivi batambulwila lukau lwalu?

▪ Badika dina diafila Yesu mu vovela diambu dia kimpumpa. Vava Afarisi bayiza kwa yandi yo kunyuvula diambu ditadidi vonda longo, Yesu wakiesesa nkanikinu a Yave mu kuma kia longo. Kana una vo Nsiku wavananga nswa kwa yakala mu soneka nkand’a luvambanu mu kuma kia nkaz’andi kele vo osolwele “owu wambi” muna yandi, ke diau ko diasikidiswa kuna lubantiku. (Nsi. 24:1, 2) I bosi, Yesu wavova vo: “Konso on’osindik’o nkaz’andi, ovo ke mu diambu dia zumba ko kasompa wakaka, zumba katele yandi.”—Mat. 19:3-9.

Vava bawa mvovo miami, alongoki bavova vo: “Ovo i diau didi e diambu dia yakala yo nkaz’andi, ozevo edi dia sompa ke diansongi ko.” Yesu wabavutula vo: “Awonso ke balendi tambula diambu diadi ko, awana kaka bavewa wo. Okala vo kadi, vena ye nzimba, zina zawutuka una tuka muna vumu ya ngwa zau: vena mpe ye nzimba, zina zavwa kitulwa se nzimba kwa wantu: vena mpe ye nzimba, zina zavwa kukitwila se nzimba muna diambu dia kintinu ki’ezulu. On’olenda wo tambula, mbula katambula wo.”—Mat. 19:10-12.

E nzimba zakieleka i awana bawutukila una yovo bakituka wo mu kuma kia sumbula. Kansi, vakala mpe y’awana bayikitula se nzimba. Kana una vo bafwana mu sompa, babak’e nzengo za kwamanana kala ampumpa “muna diambu dia kintinu ki’ezulu,” wau vo bakala ye volo. Nze Yesu, yau kibeni basola zingu kia kimpumpa kimana bayivana emvimba muna salu kia Kintinu. Ke bawutuka ye lukau lwa kimpumpa ko ngatu fwanukina lukau lwau. Yau kibeni batambulwila lukau lwa kimpumpa.

Muna kiesesa mvovo mia Yesu, Paulu wa ntumwa wasasila vo Akristu awonso, kiakala ampumpa yovo ana basompa, balenda kwau sadila Nzambi una ufwene, kansi ampumpa ana ‘basikidisa muna ntima’ miau e zingu kia kimpumpa, ‘diambote bavanga.’ Mu nkia mpila? Awana basompa bafwete vaulanga ntangwa yovo sadila ngolo zau muna yangidika yo lunga-lunga akazi au. Kuna diak’esambu, Akristu bena vo ampumpa, balenda kuyivana emvimba muna salu kia Mfumu kondwa kwa mvwangalakani. Bebadikilanga zingu kiau kia kimpumpa nze “lukau” lwatuka kwa Nzambi.—1 Kor. 7:7, 32-38.

Muna kuma kiaki, Nkand’a Nzambi uvovanga vo Nkristu ke tambulanga lukau lwa kimpumpa mu mpil’esivi ko. Kansi, yandi kibeni obakang’e nzengo za kwamanana kala mpumpa muna nungununa oma ma Kintinu kondwa mvwangalakani. Ekiaki i kuma kifilanga Akristu ayingi o unu mu bak’e nzengo muna ntima miau za kwamanana kala ampumpa. Diambote akaka bakasakesanga ampangi awaya.