Ekuma Nzambi keyambulwilanga akwa wisa babangika akaka?

Nkand’a Nzambi uyikanga nona ya akwa wisa ana babangikanga akaka. E nona kia Nabote kisonganga ziku kia diambu diadi.a Muna tandu kia 10 vitila tandu kieto, Akabi wa ntinu a Isaele wayambula vo nkaz’andi Izebele kavonda Nabote yo wan’andi kimana kavwa e mpatu andi a vinyo. (1 Ntinu 21:1-16; 2 Ntinu 9:26) Ekuma Nzambi kayambulwila vo Akabi kasadila wisa kiandi mu mpila yambi?

Yambula twabadika e kuma kia diambu diadi: Nzambi kalendi vuna ko. (Tito 1:2) Ediadi, nkia ngwizani dina yo mavangu mambi ma wantu? Kuna lubantiku lwa lusansu lwa wantu, Nzambi walukisa wantu mu kuma kia mfwilu wakunkolamena, i sia vo lufwa. Nze una Nzambi kavova, wantu befwanga tuka Adami yo Eva bankolamena muna mpatu a Edene. O muntu antete wafwa muna lusansu lwa wantu i Abele ona wavondwa kwa Kaini wa mpangi andi.—Etuku 2:16, 17; 4:8.

Tuka kolo kiakina, Nkand’a Nzambi uvovanga mu kuma kia lusansu lwa wantu vo: ‘Muntu oyalanga nkw’andi muna kumwesa e mpasi.’ (Kimpovi 8:9) Nga mvovo miami mia ziku? Yave walukisa nkangu a Isaele vo mpasi badi mweswa kwa ntinu miau yo kubafila mu kaza kwa Nzambi. (1 Samuele 8:11-18) Kana nkutu Solomo wa ntinu a ngangu, wakudikila mpaku a nkangu andi. (1 Ntinu 11:43; 12:3, 4) Ntinu miambi nze Akabi yau basakisa bangika nkangu. Badika ediadi: Kele vo Nzambi kavengomonanga mavangu mawonso mambi, nga kadi songa ko vo mvovo miandi mialuvunu?

Sungamena mpe vo Satana wavova vo wantu besadilanga Nzambi mu kuma kia loko. (Yobi 1:9, 10; 2:4) Kele vo Nzambi kataninanga selo yandi muna konso mpasi zikubabwilanga, nga kadi songa ko vo Satana ndungidi kakala yau? Kele vo Nzambi kavengomonanga mpasi zawonso, nga kadi songa ko vo mvuni? Lutaninu lwalu, lwadi fila ayingi mu kwikila vo wantu balenda kuyiyala mu mpila ambote kondwa kwa Nzambi. Kansi, Nkand’a Nzambi usonganga ziku vo wantu ke balendi kuyiyala yau kibeni ko. (Yeremiya 10:23) Kintinu kia Nzambi tuvwidi o mfunu kadi i kiau kaka kifokola e mpasi.

Nga diadi disonganga vo Nzambi kevanganga diambu ko mu kuma kia mpasi za wantu? Ve. Badika mambu mole kevanganga: Diantete, o senzekanga lubangamu. Muna bonga e nona, Nzambi wasenzeka ekani diambi dia Izebele mu kuma kia Nabote. I bosi, wasonga vo mavangu mama mambi kwa nyadi wa nkuma metukanga ona okuyiswekanga. (Yoane 14:30; 2 Korinto 11:14) Nkand’a Nzambi usonganga vo nyadi ndioyu i Satana wa Nkadi ampemba. Muna senzeka umpumbulu, lubangamu ye tuku diandi, Nzambi okutusadisanga mu kuyivevola muna mavangu mambi. Muna mpila yayi, Nzambi otaninanga zingu kieto kia kusentu.

Diazole, Nzambi okutuvananga vuvu kiasikila mu kuma kia mfoko a lubangamu. E mpila kasenzekela, fundisa yo tumba Akabi, Izebele ye yimpumbulu yakaka, ikutuvananga e vuvu vo o nsilu andi wa tumba yimpumbulu yawonso ulungana. (Nkunga 52:1-5) Nzambi osianga mpe nsilu vo ovevola awana bekunzolanga muna mpasi.b Nabote wa nkwa kwikizi yo wan’andi bezinga yo mona ntangwa ina Nzambi kesinga kitula ntoto se paradiso kondwa kwa lubangamu.—Nkunga 37:34.