“Nufokola e Salu kina Lwayantika”

 1. Adieyi Yave keyambulanga vo twavanga?

YAVE okutuyambulanga vo twasola una tunatina e zingu kieto. Okutulonganga mpe una tulenda bakila nzengo zambote ye okutusadisanga mu kala ye zingu kiambote vava tubakanga e nzengo zikunyangidikanga. (Nku. 119:173) Avo tusadidi malongi mena muna Diambu dia Nzambi, nzengo zambote tubaka.—Ayib. 5:14.

 2. Nkia mpasi tulenda wanana zau vava tubakanga e nzengo?

² Kansi, kana nkutu vava tubakanga e nzengo zambote dilenda kala diampasi mu fokola e salu twayantika. Badika e nona ilende: Mpangi mosi una vo nleke obakidi e nzengo za tanga e Bibila kiawonso. Muna tumingu twantete ovangidi mawonso muna tatidila e nzengo zandi, kansi kuna kulanda oyambuwidi o tanga. Mpangi ankento obakidi e nzengo za kituka mviti a nzila, kansi okwamanene ye kimbazi-mbazi. Buka kia akuluntu babakidi e nzengo za vungulanga ampangi muna nkutakani, kansi vava vaviokele ngonde zayingi ke bavangidi kwau diambu ko. Mambu mama maswaswana kansi ngwizani mena kadi ke batatididi e nzengo zau ko. Akristu a tandu kiantete ana bazingilanga kuna mbanz’a Korinto diambu diadi mpe bawanana diau. Yambula twavovela dina tulenda longoka muna mbandu au.

 3. Nkia nzengo babaka ampangi kuna Korinto? Adieyi diavangama?

³ Muna mvu wa 55 wa tandu kieto, ampangi kuna Korinto nzengo zamfunu babaka. Bawá vo ampangi kuna Yerusaleme ye Yuda banuananga ye mpasi mu kuma kia usukami ye bawá mpe vo e nkutakani zankaka bakubanga e nzimbu muna kubasadisa. O zola yo ntim’amvevo wafila ampangi kuna Korinto mu baka e nzengo za vana tukau kwa mpangi zazi yo yuvula Paulu una balenda sadisila. Paulu wavana tuludiku kwa nkutakani yo sola Tito muna tambula o tukau twau. (1 Kor. 16:1; 2 Kor. 8:6) Kansi, vava vavioka ngonde zayingi, Paulu wawá vo ampangi kuna Korinto ke bavana ko o tukau basila o nsilu. Muna kuma kiaki, nanga ke dialendakana ko mu twika e tukau twau kuna Yerusaleme kumosi ye tukau twa nkutakani zankaka.—2 Kor. 9:4, 5.

 4. Landila 2 Korinto 8:7, 10, 11, nkia lukasakeso Paulu kavana kwa ampangi kuna Korinto?

⁴ Ampangi kuna Korinto nzengo zambote babaka. Muna kuma kiaki, Paulu wabasanisina mu kuma kia lukwikilu lwau yo ntim’amvevo basonga. Kansi, Paulu wabakasakesa mpe mu fokola e salu kina bayantika. (Tanga 2 Korinto 8:7, 10, 11.) E mbandu au itulongele vo kana nkutu Akristu akwikizi balenda wanana ye nkakalakani muna vanga dina babakidi e nzengo.

 5. Nkia yuvu tubakila e mvutu mu longi diadi?

⁵ Nze ampangi kuna Korinto, tulenda wanana ye nkakalakani muna tatidila e nzengo tubakidi. Ekuma? Kadi wau vo tu wantu alembi lunga, tulenda kala ye kimolo muna lungisa e nzengo zeto yovo e mambu ma kinsalukisa malenda kutukakidila. (Kim. 9:11; Roma 7:18) Aweyi tulenda zayila kana vo tufwete soba e nzengo zina tubakidi kala? Adieyi dilenda kutusadisa mu fokola e salu kina tuyantikidi?

 6. Ekuma tusobelanga e nzengo zankaka tubakanga?

⁶ E nzengo zankaka zamfunu ke zifwete sobwa ko. Kasikil’owu, tutatidilanga e nzengo zeto za sadila Yave yo kwamanana kala ye kwikizi kwa akazi eto. (Mat. 16:24; 19:6) Kansi, vena ye nzengo zankaka zilenda sobwa. Ekuma? Kadi e mambu soba mesobanga. Nkia mambu malenda kutusadisa mu baka nzengo zambote?

 7. Adieyi tufwete lombanga muna sambu? Ekuma?

⁷ Lombanga e ngangu muna sambu. Yave wavumunuina Yakobo mu soneka vo: “Avo mosi muna yeno okondelo ngangu, yambula kakwamanana lomba kwa Nzambi, ona ovaninanga kuna mvevo kw’awonso.” (Yak. 1:5) Yeto awonso ‘ke tuna ye ngangu’ ko za zaya mambu mawonso. Muna kuma kiaki, bunda Yave e vuvu avo zolele baka e nzengo ye avo zolele fimpulula e nzenzo zazi. Yave okusadisa mu baka e nzengo zambote.

 8. Adieyi tufwete vanga vitila twabaka e nzengo?

⁸ Toma vavululanga. Tanganga e Diambu dia Nzambi, nkanda mivaikiswanga muna nkubik’a Yave ye mokenanga yo wantu ana obundanga e vuvu. (Nga. 20:18) O vavulula mfunu kwina vitila wabaka e nzengo za soba e salu, yaluka yovo longoka e salu kilenda kusadisa mu kwamanana muna salu kia Yave.

 9. Ekuma tulenda kadila akwa ziku yeto kibeni?

⁹ Toma fimpanga e kuma kifididi mu baka e nzengo. Yave ke tokanenanga kaka e nzengo zeto ko, kansi e kuma tubakidi zo. (Nga. 16:2) Yave ozolele vo twakala akwa ziku muna mambu mawonso. Muna kuma kiaki, vava tubakanga e nzengo, tuzolanga mpe kala akwa ziku yeto kibeni kumosi ye ankaka. Avo ke tusongele ziku ko, diampasi dikala mu tatidila e nzengo zeto. Kasikil’owu, mpangi una vo nleke obakidi e nzengo za kituka mviti a nzila a ngonde ke ngonde. Kansi, kuna kulanda olenda wanana ye nkakalakani mu lungisa e ola yo vidisa e kiese kiandi muna salu kia umbangi. O nleke ndioyo nanga edi kayindulanga vo e kuma kiamfila mu kituka mviti a nzila i luzolo lwandi lwayangidika Yave. Kansi, nanga e kuma kiasikila kiamfila i luzolo lwayangidika mase mandi yovo muntu ankaka ketoma zolanga.

10. Adieyi dilenda fila muntu mu vanga e nsobani?

¹⁰ Yindula mpe e nona kia nlongoki a Bibila ozolele yambula nua fomo. Kuna lubantiku, olendele yambula nua fomo mu lumingu lwamvimba yovo mu tumingu tole, kansi muna mpasi. Kuna kulanda, ovutukidi yo diaka o nua. Kansi lumbu kimosi, onungini e fu kia nua fomo. O zola kwandi muna Yave ye tima dia kunyangidika dinsadisi mu yambula nua fomo.—Kol. 1:10; 3:23.

11. Ekuma tufwete kadila ye makani masikididi?

¹¹ Kala ye makani masikididi. Avo otomene sikidisa makani maku, diasazu dikala mu fokola kina oyantikidi. Muna bonga e nona, nanga wabaka e nzengo za tanga e Bibila lumbu yawonso. Avo kuvangidi nkubika yasikididi ko, nanga kulenda lungisa e kani diaku ko.b Nona kiankaka: Akuluntu a nkutakani mosi babakidi e nzengo za kingulanga ampangi muna nkutakani. Kansi, vava vaviokele ngonde zayingi ke balungisi ko e nzengo babakidi. Muna vua e nluta, akuluntu balenda kukiyuvula: “Nga tuzeye kala ampangi tufwete kingula? Nga twasikidisa kala e ntangwa ye ola tukubakingula?”

12. Adieyi ofwete vanga? Ekuma?

¹² Kala ye ngindu zasikila. Ke vena muntu ko una ye ntangwa, mavua ye ngolo muna vanga mambu mawonso kazolele. Muna kuma kiaki, kala ye ngindu zasikila yo kala mpe ye tezo. Avo divuilu o mfunu, nanga divava vo wasoba e nzengo zina ozeye vo kulenda zo lungisa ko. (Kim. 3:6) Owau dilenda kala vo ofimpulwidi e nzengo zaku, ovangidi e nsobani zivuilu o mfunu yo mona vo olenda zo lungisa. Badika mambu tanu malenda kusadisa mu fokola kina wayantika.

13. Aweyi olenda kadila ye nkuma wafwana muna lungisa nzengo zaku?

¹³ Lombanga o nkuma muna sambu. Nzambi olenda kuvana o “nkuma wa sala” yo lungisa e nzengo zaku. (Fili. 2:13) Lombanga o mwand’avelela a Yave muna kuvana nkuma ovuidi o mfunu. Kwamanana samba avo omwene vo e mvutu za sambu kiaku mu zingila zina. Nze una Yesu kavova: ‘Nukwamanana lomba [mwand’avelela], ozevo nuvewa wo.’—Luka 11:9, 13.

14. Aweyi o nkanikinu una muna Ngana 21:5 ulenda kusadisila mu lungisa e nzengo zaku?

¹⁴ Vanga e nkubika. (Tanga Ngana 21:5.) Muna fokola konso salu wayantika, ofwete kala ye nkubika yo vanga mana okubikidi. Diau dimosi mpe, vava obakanga e nzengo, ofwete soneka mambu masikididi ovanga muna lungisa zo. Vava vambula e salu yanene muna salu yakete, ediadi dikusadisa mu mona o lunungunuku lwaku. Paulu wakasakesa ampangi kuna Korinto vo ‘muna lumbu kiantete kia konso lumingu,’ balunda e nzimbu za tula muna nkela vana fulu kia vingila yo vanga e nkubidi-nkubidi vava kadi lwaka kûna. (1 Kor. 16:2) O vambula e salu yanene muna salu yakete dikusadisa mpe mu kulula e zitu diaku.

15. Avo nkubika ovangidi, adieyi ofwete vanga?

¹⁵ O soneka mana okubikidi, dikusadisa mu lungisa mo. (1 Kor. 14:40) Kasikil’owu, e buka kia akuluntu batambula o luludiku lwa sola nkuluntu mosi muna soneka konso nzengo bebaka. O nkuluntu ndioyo osoneka kana nani osolelo muna lungisa kiyekwa ye ntangwa kefokola kio. Vava akuluntu belandanga o luludiku lwalu, diasazu dikalanga muna lungisa e nzengo zau. (1 Kor. 9:26) Teza vanga diau dimosi muna mambu ma ngeye kibeni. Kasikil’owu, soneka mawonso ozolele vanga konso lumbu. I bosi, mu ndandani sola mana ofwete sia va fulu kiantete. Ediadi ke dikusadisa kaka ko mu fokola e salu kina oyantikidi, kansi mpe mu vanga mambu mayingi mu ntangwa yakete.

16. Adieyi tufwete vanga muna lungisa mana tukanini? Aweyi e sono kia Roma 12:11 kikutusadisilanga mu vanga wo?

¹⁶ Vanga e ngolo. O landa e nkubika ovangidi yo fokola yo, ngolo divavanga. (Tanga Roma 12:11.) Paulu wavovesa Timoteo vo ‘kakwamanana kuyivana’ yo “zindalala” muna kituka nlongi ambote. Tulenda sadila o luludiku lwalu lwa Paulu muna mambu mawonso tuzolele vanga muna salu kia Yave.—1 Tim. 4:13, 16.

17. E sono kia Efeso 5:15, 16, aweyi kilenda kutusadisila mu lungisa mana tukanini ovanga?

¹⁷ Toma sadila e ntangw’aku. (Tanga Efeso 5:15, 16.) Sola e ntangwa ozolele lungisa e nzengo obakidi yo tatidila zo. Kuvingidi e ntangwa yambote ko mu vanga wo, nanga e ntangwa yambote ke ilwaka ko. (Kim. 11:4) Keba walembi yambula vo mambu makondwa o mfunu mayiya e ntangwa ye ngolo wadi sadila muna mambu masundidi o mfunu. (Fili. 1:10) Avo dilendakana, sala e salu muna ola ina kukala ye mambu ko mana malenda kukakidila. Zayisa kwa akaka balembi kuvunzanesa muna ola yayi. Avo dilendakana kanga e telefone aku yo tanga kaka e-mail vava ofokola.c

18-19. Adieyi dilenda kusadisa mu tatidila e nzengo zaku kana nkutu vo owananene ye nkaku?

¹⁸ Sia e sungididi muna nluta. Tulenda tezanesa e nluta mia konso nzengo tubakidi yo lwaka kuna fulu tukanini. Avo ozolele lwaka kuna okanini, ofwete kwamanana o nkangalu kana nkutu vo e nzila yakangama ye divava vo wasoba e nzila yankaka. Diau dimosi mpe, avo tusidi e sungididi muna nluta mia nzengo zeto ke tuyoya vana vau ko avo tuwananene ye nkaku yovo soba e nzila.—Ngal. 6:9.

¹⁹ Ke diambu diakete ko mu baka nzengo zambote yo lungisa zo. Kansi muna lusadisu lwa Yave, olenda kala ye ngangu yo nkuma ovuidi o mfunu muna fokola e salu kina wayantika.