Nkanda Utukidi Kuna Vula

Kwa Ateleki Azolwa:

Tuna ye kiese kiayingi kia mona e ndungunuka ya salu mu Angola mu mvu wau wa salu wa 2007! Mayingi tuvangidi. Muna ngonde ya Abidi, tezo kia 8.847 m’ateleki bakota mu salu kia mviti a nzila a ngonde ke ngonde ye kia mviti a nzila a nsadisi. Muna ngonde ya Mayu vioka 200.000 ma wantu twalongoka yau Nkand’a Nzambi muna nzo zau! Tuvingilanga vo akaka mu wantu awaya basadiswa mpasi vo beza mu nsambila a ludi ekolo “lumbu kianene kia Yave” ka kilweke ko.—Sef. 1:14.

Dialudi vo, twakala ye kiese kia kaya e Nsangu Zambote za Kintinu N.37, zisonganga vo “O Lufwasu lwa Nsambil’a Luvunu Lufinamene!.” Mu Angola yazi 2 ya mazunda ma finkanda-nkanda fiafi fiakaywa. Vana kati kw’awana basala e salu kiaki y’etima diawonso, vakala ye dumbelele kimosi kia mvu ntatu wavaikanga ye ngudi andi mu salu kia umbangi tuka kawutukila. Vava mase mandi bakubikanga e nsunzula, e dumbelele wawa e nsunzula yayi. Ekolo bavaika, yandi kanata kaka finkanda-nkanda ko, kansi wasunzula fio yo vana fio kwa wantu vana mielo mia nzo.

E nkubika ya tunga Maseka ma Kintinu itwese kala nluta kwa 573 za nkutakani mu nsi eto. Muna mvu wa salu uviokele, maseka 23 matungwa. E nkutakani 54 zikutakananga muna maseka mama ziyangalalanga wau vo bena ye fulu kiambote kia kutakenena. 208 za maseka ma Kintinu matungilu kala, ke kolo ko e salu kia tunga maseka kilwaka mpe muna mvivu miakaka.

Tuna ye kiese kia sala yeno kumosi mu salu kiaki kiamfunu ye tuzolele kunusanisina muna mawonso nwavanga muna nungununa e nsambila a ludi. Nutambula zola kweto kwa Kikristu.

Mpangi zeno,

Ku Vula dia Angola