Ekuma Tufwete ‘Kembelela Ya?’

1-3. (a) Nkia kolo wasonekwa o nkunga 147? (b) Adieyi tulenda longoka muna nkunga wa 147?

NKUMBU miayingi, tusanisinanga muntu mu kuma kia dina kavovele yovo vanga. Tuvuidi kuma yayingi mu sanisina yovo kembelela Yave wa Nzambi. Tukunkembelelanga mu kuma kia ulolo wa nkum’andi tumonanga muna nsem’andi. Tukunkembelelanga mpe mu kuma kia nzol’andi anene muna yeto wau katwika Mwan’andi kimana kafwa se kimenga kia lukûlu.

² Vava tutanganga o Nkunga 147, tubakulanga vo nsoneki a nkunga wau luzolo lwa kembelela Yave kakala lwau. Wakasakesa mpe ankaka bakembelela Nzambi kumosi yo yandi.—Tanga Nkunga 147:1, 7, 12.

³ Ke tuzeye ko kana nani wasoneka o nkunga 147. Kansi, nanga o nsoneki a nkunga wau wazinga muna kolo kina Aneyisaele bavutuka kuna Yerusaleme vava Yave kabavevola muna kinkole kuna Babele. (Nkunga 147:2) I bosi, ntozi a nkunga wakembelela Yave wau vo nkangu a Nzambi wavua diaka e lau dia kunsambila muna nsi au ya kivuila. O ntozi a nkunga kuma yayingi kayika ifwete kutufila mu kembelela Yave. Nkia kuma? Nkia kuma una yau mu yimbila vo “Aleluya!” yovo “Kembelela Ya”?—Nkunga 147:1.

 4. Vava Kurese wa ntinu kakûla Aneyisaele, aweyi bamona? Ekuma?

⁴ Yindula una Aneyisaele bamona vava bakala muna kinkole kuna Babele. Awana babanata kuna Babele babasevanga yo kubavovesa vo: ‘Nutuyimbidila umosi muna nkunga mia Zione.’ Kansi, Ayuda ke bakala yo luzolo lwa yimbila ko kadi e Yerusaleme yakala vo i tuku dia kiese kiau, yafwaswa. (Nkunga 137:1-3, 6) Mpasi bamonanga muna ntima, lufiaulwisu bavuanga o mfunu. Kansi, nze una wasakulwa muna diambu dia Nzambi, Yave wasadisa nkangu andi. Mu nkia mpila? O Kurese wa ntinu a Parasa wasunda Babele yo vova mu kuma kia Yave vo: “Kakunkanikina yantungila nzo muna Yerusaleme.” Kurese wavovesa mpe Aneyisaele vo: “Konso ona vovo nwina wa nkangu andi, o Yave wa Nzambi kakala yandi, katomboka.” (2 Tusansu 36:23) E mvovo miami miafiaulwisa kikilu Aneyisaele bakala kuna Babele.

 5. Adieyi ntozi a nkunga kavova mu kuma kia nkum’a Yave wa kutuwuka?

⁵ Yave kafiaulwisa kaka nkangu a Isaele ko kansi wafiaulwisa mpe konso Nyisaele. I diau mpe Yave kevanganga kwa yeto o unu. O ntozi a nkunga wasoneka vo Nzambi ‘osasula ana babudikwa ntima, yo kanga ndwadi zau.’ (Nkunga 147:3) Vava tuyelanga yovo kendalala, tufwete kalanga ye ziku vo Yave okutulunga-lunga. Yave una ye luzolo lwa kutufiaulwisa yo wuka e ndwadi zeto. (Nkunga 34:18; Yesaya 57:15) Okutuvananga ngangu yo nkuma kimana twalenda sunda konso diambu tunwananga diau.—Yakobo 1:5.

 6. Aweyi olenda vuila nluta muna mvovo mia ntozi a nkunga mina muna nkunga 147:4? (Tala e fwaniswa kuna lubantiku lwa longi.)

⁶ I bosi, ntozi a nkunga watala kuna zulu yo vova vo Yave ‘otanganga lutangu lua ntetembwa; oyikilanga zawonso muna nkumbu.’ (Nkunga 147:4) O ntozi a nkunga wamonanga e ntetembwa, kansi kazayanga ko lutangu lwa ntetembwa. O unu, akwa ngangu bevovanga vo vena ye mazunda ye mazunda (bilhões) ma ntetembwa muna buka kieto kia ntetembwa. Vena mpe ye ulolo (trilhões) wa buka ya ntetembwa omu nsema. O wantu ke balendi tanga ntetembwa zawonso ko, kansi o Mvangi olenda zo tanga. Kieleka, Nzambi otomene zaya konso ntetembwa, wavana nkutu e nkumbu kwa konso ntetembwa. (1 Korinto 15:41) O Nzambi ona ozeye fulu kina konso ntetembwa, uzeye mpe. Ozayanga vana wina, una omonanga ye dina ovuidi o mfunu.

7, 8. (a) Adieyi Yave kazeye mu kuma kieto? (b) Yika e nona kisonganga vo Yave nkwa nkenda.

⁷ Yave ozey’e mpasi onwananga zau, una ye nkuma wa kusadisa. (Tanga Nkunga 147:5.) Olenda banza vo e mpasi zaku ziviokele tezo ye kulenda zo zizidila ko. Nzambi ozeye e tezo kieto, ‘osungamenanga wo vo tu ntoto.’ (Nkunga 103:14) Wau vo tu wantu alembi lunga, tuvutukilanga vanga vilwa wau umosi ntangwa ke ntangwa. Ediadi dilenda kutukendeleka. Ezak’e ntangwa tukendalalanga kikilu mu kuma kia maka mambu twavova, mu kuma kia zolela yambi twakala yau yovo kimpala twamonanga! Yave kena ye lutovoko ko, kansi otoma bakulanga una tumonanga.—Yesaya 40:28.

⁸ Nga omonanga una koko kwa nkuma kwa Yave kukusadisilanga mu sunda e mpasi? (Yesaya 41:10, 13) I diau diavangama kwa mviti a nzila mosi una ye nkumbu Kyoko. Vava kafilwa ku zunga kiankaka, wakendalala kikilu. Kansi, aweyi mpangi Kyoko kazayila vo Yave wabakulanga e mpasi zandi? Muna nkutakani kayenda, mwakala ye wantu ayingi babakulanga e ntokani zandi. Mpangi Kyoko wamona nze vika sia vo Yave wamvovesanga vo: “Zola ikuzolanga, ke mu kuma kia sia ko vo u mviti a nzila, kansi mu kuma kia sia vo u mwan’ame ankento ye wakiyekola kwa mono. Nzolele vo wakala ye kiese nze mosi muna Mbangi zame!” Aweyi Yave kekusongelanga vo “umbakuzi wandi ke ulendi tezakana ko”?

9, 10. Nkia mpila isundidi o mfunu kekutusadisilanga o Yave? Yika e nona.

⁹ Yeto awonso madia, mvuatu ye nzo tuvuanga o mfunu. Nanga olenda tokana vo kukala ye madia mafwana ko. Kansi, Yave wavanga o ntoto kimana wayima madia mefwana awonso, kana nkutu mu kuma kia “wan’a ngono bekienganga.” (Tanga Nkunga 147:8, 9.) Wau vo Yave odikilanga e ngono, tulenda kala ye ziku vo olungisa e nsatu zeto za nitu.—Nkunga 37:25.

¹⁰ Edi disundidi o mfunu, Yave okutuvananga dina tuvuidi o mfunu kimana lukwikilu lweto lwakala lwakumama, okutuvananga mpe “luvuvamu lwa Nzambi luna luviokele umbakuzi wawonso.” (Filipi 4:6, 7) O mpangi Mutsuo yo nkaz’andi bamona una Yave kabasadisila. Vava sumbula kia mavuku mampwena kiabwa kuna Japão muna mvu wa 2011, fioti fiasala nga bafwa kele vo ke bamanta ku nludi a nzo ko. Muna lumbu kiakina, bavidisa lekwa yawonso bakala yau. Mu suku dia tombe ye nzizi baleka kuna banga (andar) kianzole kia nzo au. Muna mene, lekwa bavavanga kilenda kubakasakesa. E lekwa basolola i Anuário das Testemunhas de Jeová ya 2006. Vava mpangi Mutsuo kavilula lukaya, wamona o ntu a diambu: “Os Maiores Tsunamis já Registrados.” E kunku kiaki kivovelanga nzakam’a ntoto yavangama kuna mbanza Sumatra muna mvu wa 2004, eyi yavonda ulolo wa wantu yo fwasa lekwa lutila tembwa yangolo yawonso ibwidi kala. Mpangi Mutsuo yo nkento andi badila ekolo batanganga mana mabwila mpangi zau. Bamona vo Yave wabavana lukasakeso bavuanga kieleka o mfunu. Yave wabalunga-lunga mpe mu mpila zankaka. E mpangi zau muna zunga yankaka ya Japão babatwikila madia ye mvuatu. Kansi, edi dialuta kubakasakesa i ampangi ana bayiza kingulanga e nkutakani ana batwikwanga kwa nkubik’a Nzambi. Mpangi Mutsuo wavova vo: “Yamonanga vo Yave va ndambu a konso muntu mu yeto kakala yo kutulunga-lunga. Dialufiaulwisu kikilu diakala!” Entete, Nzambi okutuvananga ina tuvuidi o mfunu mu kumika lukwikilu lweto. I bosi, olungisanga e nsatu zeto za nitu.

11. Adieyi tufwete vanga muna vua nluta muna lusadisu lwa Nzambi?

¹¹ Yave ‘osikina alembami. Otoma kutuzolanga, wakubama kekalanga mu kutusadisa. (Nkunga 147:6a) Aweyi tulenda vuila nluta muna lusadisu lwandi? Tufwete kala ye ngwizani yambote yo yandi. Muna wo vanga, tufwete kala alembami. (Sefaniya 2:3) Alembami kwa Yave bebundanga e vuvu mu singika mawonso mambi yo fokola mpasi zau. Yave otoma kubayangalelanga.

12, 13. (a) Adieyi tufwete venga muna vua nluta muna lusadisu lwa Nzambi? (b) Nani keyangalelanga o Yave?

¹² Kuna diak’e sambu, Nzambi “okulula yimpumbulu vana ntoto.” (Nkunga 147:6b) Ke tuzolele ko vo ediadi diatubwila! Tuzolele vo Nzambi katusonganga o zola kwandi. Muna kuma kiaki, tufwete menganga mana Nzambi kemenganga. (Nkunga 97:10) Muna bonga e nona, tufwete menga mavangu ma zumba. Disongele vo tufwete venga konso diambu dilenda kutufila mu tá zumba, kumosi ye fu kia tala mavangu mansoni. (Nkunga 119:37; Matai 5:28) Ediadi dilenda kala diampasi, kansi Yave osinga kutusambula muna ngolo tuvanganga.

¹³ Ke tulendi sunda fu kiaki ko muna ngolo za yeto kibeni. Tufwete bundanga e vuvu muna Yave. Nga Nzambi oyangalala avo tubundidi e vuvu muna fulu ina wantu bevavilanga lusadisu? Ve, Yave “keyangalela ngolo za mvalu ko.” Nga tufwete bund’e vuvu muna ngolo za yeto kibeni yovo muna wantu ankaka? Yave ‘ke sivikanga malu mankuma ma muntu ko.’ (Nkunga 147:10) Kansi, tufwete kwamanana samba kwa Yave mu lomba lusadisu yo kundodokela vo katusadisa mu sunda konso lutovoko tuna lwau. Yave kesinga yoya ko wá sambu yeto. “O Yave omwene ana bekumvumina e kiese, ana besila walakazi wandi e vuvu.” (Nkunga 147:11) Wau vo Yave nkwa kwikizi ye okutuzolanga, tuzeye wo vo okwamanana kutusadisa mu sunda e zolela yeto yambi.

14. Nkia ziku kakala kiau o ntozi a nkunga?

¹⁴ Yave osianga nsilu wa kutusadisa muna ntangw’a mpasi. Vava Aneyisaele bavutuka kuna Yerusaleme, o ntozi a nkunga wayika una Yave kabasadisila. O ntozi a nkunga wayimbila vo: “Kadi wasia mbindi za mavitu maku e ngwi; yo sambula wana vovo wina. Otwasa luvuvamu muna mvivu aku.” (Nkunga 147:13, 14) O zaya vo Yave wadi siamisa mavitu, diasadisa ntozi a nkunga mu kala wavuvama. Ediadi diankwikidisa vo Yave otanina nkangu andi.

15-17. (a) Aweyi tulenda mona mu kuma kia mpasi zeto? Aweyi Yave kesadilanga e Diambu diandi mu kutusadisa? (b) Yika e nona kisonganga una e diambu dia Nzambi ‘dizabuziokelanga’ mu kutusadisa.

¹⁵ Olenda telamwa moyo mu kuma kia mpasi onwananga zau, kansi Yave olenda kuvana e ngangu mu zizidila zo. O ntozi a nkunga wavova vo Nzambi “otwika mvovo andi ova nza; e diambu diandi dizabuzioka.” I bosi, o ntozi a nkunga wayika mvul’ampembe, kime, mvul’a matadi yo yuvula vo: “Nani ozizidila kiozi kiandi?” I bosi, wavova vo Yave “otwikidi diambu diandi, mazelokele.” (Nkunga 147:15-18) O Nzambi eto, ona ozeye mawonso, ona olenda vanga konso diambu, ona otuminanga mvul’a matadi ye mvul’ampembe, olenda kusadisa mu sunda konso diambu.

¹⁶ O unu, Yave osadilanga Diambu diandi, i sia vo, Nkand’a Nzambi muna kutufila. Ntozi a nkunga wavova vo e diambu dia Yave “dizabuzioka” muna kutusadisa. Nzambi okutufilanga mu nzila yambote ye muna ntangwa ifwene. Yindula e nluta ovuanga muna lusadisu lwa Nkand’a Nzambi, nkanda mivaikiswanga kwa “ntaudi akwikizi yo lulungalalu,” JW Broadcasting, jw.org, akuluntu ye mpangi zaku. (Matai 24:45) Nga omonanga muna zingu kiaku e mpila ina Yave kekufidilanga?

¹⁷ Mpangi ankento Simone wamona una e Diambu dia Nzambi diansadisila. Wakimuenanga vo kena mfunu ko yo yindula vo Yave kanzolanga ko. Kansi, vava kakalanga wakendalala, wasambanga kwa Yave muna kunlomba lusadisu. Wakwamanana mpe longoka Nkand’a Nzambi. Mpangi Simone wavova vo: “Kisidi bwilwa diambu ko dina yalembi muena nkum’a Yave yo luludiku lwandi.” Ediadi diansadisa mu kala ye ngindu zasikila.

18. Aweyi omonanga mu zaya vo Yave una yaku?

¹⁸ O ntozi a nkunga wazaya wo vo Yave wasola e zula kia Isaele muna zula yawonso ova nza kimana kiakala se nkangu andi. Zula kia Isaele kaka kiatambula e “diambu” dia Nzambi ye “mîna miandi.” (Tanga Nkunga 147:19, 20.) O unu, tuvuidi lau diampwena dia yikilwa muna nkumbu a Nzambi. Tuna ye kiese wau vo tunzeye, tuna ye Diambu diandi muna kutufila ye tulenda kala ye kikundi kiambote yo yandi. Nze nsoneki a Nkunga 147, kuma yayingi una yau mu ‘Kembelela Ya’ yo kasakesa akaka mu vanga diau dimosi.