O Kala mu Dibundu Nga Mfunu Dina?

Ingeta, kadi Nzambi ozolele vo wantu bakutakananga muna kunsambila. Bibila kivovanga vo: “Yambula twayinduziananga kimana twakasakesa o zola ye mavangu mambote kwa muntu yo nkwandi, ke tuyambula kutakana ko.”—Ayibere 10:24, 25, mvovo vana yand’a lukaya.

Yesu wasonga vo alandi andi mu dibundu diasikila bekala vava kavova vo: “Muna wau i bezayila o wantu awonso vo nu alongoki ame—avo nzolani nuna yau.” (Yoane 13:35) Muna songa o zola kwaku, alongoki a Kristu bafwete kutakananga kumosi ye akwau akwikizi. Bafwete kalanga muna nkutakani zasikidiswa yo kutakananga ntangwa zawonso muna sambila Nzambi. (1 Korinto 16:19) Yau awonso bafwete kalanga muna kintwadi kia wan’a ngudi omu nz’amvimba.—1 Petelo 2:17.

Mayingi mevavuanga ke kala kaka mu dibundu ko

Vava Bibila kivovanga vo wantu bafwete kutakana mu sambila Nzambi, ke disongele ko vo okala ye dibundu i diau kaka divavuanga lenda yangidika Nzambi. O muntu muna tondakana kwa Nzambi, e malongi ma dibundu mafwete soba emvimba e zingu kiandi kia lumbu ke lumbu. Muna bonga e nona, Bibila kivovanga vo: “E nsambila ina yavelela yo kondwa usafu vana ndose a Nzambi wa Se dieto i yayi: lunga-lunga wan’a nsona ye akento bafwilwa akala muna mpasi zau, yo kondwa e tona muna mambu ma nza.”—Yakobo 1:27.