Solomo wa Ntinu Angangu

SOLOMO mwana’toko kakala vava kayala se ntinu. Wazolanga Yave. Walemvokelanga malongi mambote ma Davidi w’es’andi. O Yave wayangalela Solomo. Omonekene kwa Solomo kuna ndozi o fuku umvovese vo: “Lomba eki ozolele.”

O Solomo umvutwidi vo: ‘Mono kimwana-mwana ngina; kizeye wo ko owu wa yadila. Vana kwa ntaudi aku ntima a zayi yafundisa nkangu aku mu mpil’ambote.’

Edi kalombele Solomo diyangidikidi Yave. Ikuma, umvovese vo: ‘Wau kina vo olombele ngangu kulombele lumbu yayingi ko, ngatu mavwa mayingi, ikuvana ngangu zisundidi, ke vekala muntu ofwanana yaku ngangu ko. Ikuvana mpe edi kulombele ko, mavwa yo zitu.’

Ke kolo ko, akento wole bezidi kwa ntinu ye diambu diampasi mu zenga. O nkento mosi ovovele vo, ‘omono yo nkento oyu, mu nzo mosi twina; ngutidi mwan’eyakala. Lumbu kina kietatu tuka yawutila, oyandi mpe owutidi mwan’eyakala. Mwan’andi ofwidi o fuku. Kansi, ekolo nkedi yaleka osidi mwan’andi afwa vana tulu kiame, obongele mwan’ame. Vava yasikama mbwene mwana kinga fwa kwandi. Kansi mbakwidi vo ke yandi i mwana yawuta ko.’

O nkento wakaka ovovele vo: “Ve kwandi, o mwan’amoyo i wame, o fwa i waku.” Nkento antete ovutwidi vo: “Ve! o fwa i mwan’aku, o mwan’amoyo i wame.” I wau bazonzelenge akento. Adieyi kevanga o Solomo?

Olombele vo bantwasila nsosolo, ovovele vo: “Nubula mwan’amoyo ova kati, vana kati kwa mosi yo kati kwa waka.”

O ngudi wa mwan’amoyo okazidi oku vo: ‘Vana mwan’amoyo kwa yandi, do, kumvondi nkutu ko.’ Kansi nkento wakaka ovovele vo: “Kekala wame ko yovo waku; umbula va kati.”

O Solomo ovovele vo: ‘Vana mwan’amoyo kwa nkento antete, kumvondi ko: kadi yandi i ngw’andi.’ O Solomo ozayidi wo kadi ngudi a mwan’amoyo unzolele kikilu, yamu tezo kia kumvana kwa muntu akaka mu lembi vondwa. Vava nkangu bawidi nzengo kazengele Solomo bayangalele kikilu mu kala ye ntinu angangu nze yandi.

Nzambi wasambula nkangu muna luyalu lwa Solomo. O ntoto wayimanga mbongo yayingi, masa, nsanda, uva, ye yakaka mpe. Wantu mvwatu miambote bavwatanga yo zingila muna nzo zambote. Awonso bakala ye lekwa yambote.