Lungalala E Selo Kia Kwikizi!

Yesu osasidi vo “fikambi-kambi” kaka bakubikilwa e fulu muna Kintinu kia zulu. (Luka 12:32) Kansi, muna vua o nsendo wau ke diambu diakete ko. Yesu osongele vo, avo muntu ozolele vua e Kintinu, kafwete kala ye kadilu kiambote. 

Muna kuma kiaki, Yesu olongele alongoki andi bakala bakubama vava kevutuka. Ovovele vo: “Nuvuata yo kubama, nukwika e mini yeno, nukala nze wantu bevingilanga mfumu au otuka kuna nkinzi a longo, vava keluaka, kadodela, vana vau banziulwila. Akwa nsambu e ntaudi zina vo vava mfumu au kekwiza, ziwanwa vo mu yingila zina!”—Luka 12:35-37.

Alongoki babakwidi e kadilu kiambote kina o Yesu kavovele. E ntaudi zina o Yesu kavovele, bakubama bena, bevingilanga e mvutuk’a mfumu au. Yesu ovovele vo: “Avo wizidi mu ngingila ina yezole, kana nkutu ina yetatu, ubawene bakubama, ozevo akwa nsambu!”—Luka 12:38.

E mvovo miami mayingi misonganga, ke kala kaka nsadi a vema ko yovo selo. E ziku kia diambu diadi kimonekene muna mpila ina o Yesu wa Mwan’a muntu kayikotesele mu kingana kiaki. Ovovese alongoki andi vo: “Oyeno mpe se nukubama kweno, e kuma kadi, muna ntangwa nulembi yindula i kekwiz’o Mwan’a muntu.” (Luka 12:40) Disongele vo, vena ye lumbu kina o Yesu kekwiza. Ozolele vo alongoki andi, mu sungula “fikambi-kambi” bakala bakubama.

Petelo ozolele toma bakula e nsansa mvovo mia Yesu, unyuvuidi vo: “E Mfumu, nga yeto kaka otelele kingana kiaki, yovo kw’awonso?” Vana fulu kia vana e mvutu kwa Petelo, Yesu otele e kingana kiankaka, oku vo: “Nani kieleka i selo kiakwikizi yo lulungalalu, kina kisiwa kiyekwa kia ntaudi za nzo kwa mfumu andi, kabavananga madia muna ntangwa ifwene? Nkwa nsambu e ntaudi ina iwanuka kwa mfumu andi vo iwau ivanganga! Kieleka inuvovese wo vo, okumvana kiyekwa kia lunga-lunga salanganu yandi yawonso.”—Luka 12:41-44.

Muna kingana kiantete, o mfumu i Yesu wa Mwan’a muntu. Dialudi vo, “selo kia kwikizi” i akaka muna wantu bena muna buka kia “fikambi-kambi” ana bevewa e Kintinu. (Luka 12:32) O Yesu osongele vo, wantu akete kaka muna buka kiaki bevana kwa “ntaudi za nzo madia muna ntangwa ifwene.” Muna diadi, Petelo ye alongoki akaka ana Yesu kelonganga yo dikila muna mwanda, babakwidi vo vekala ye ntangwa ina Mwan’a muntu kekwiza. Muna ntangwa yayina vekala ye nkubika ya vana madia ma mwanda kwa “ntaudi za nzo” a Mfumu, i sia vo, alandi a Yesu.

Yesu osongele diaka e kuma alongoki andi bafwete lungalela yo sia e nsugididi muna fu yau. Kadi bafwana o vilakana yo lwaka nkutu muna tezo kia menga mpangi zau. Yesu ovovele vo: “Kansi avo e ntaudi yayina ovovele muna ntim’andi vo, ‘O mfumu ame zingila kezingila,’ kayantika wanda selo yamakala ye yamakento, yo dia, yo nua, yo kolwa, o mfumu a ntaudi yayina okwiza muna lumbu kalembi kumvingila, ye muna ola kalembi zaya, okuntumba tumbu kiangolo, yo kumvana e kunku kiandi vana vena minkondwa kwikizi.”—Luka 12:45, 46.

Yesu ovovele vo, “tiya ngizidi kwika ova nza.” Ovangidi wo wau kavovele mambu matwese ntantani zangolo, matomene senzeka malongi ma luvunu ye tusansu. Mavambwidi wantu badi kala ye ngwizani ambote, mavambwidi “o se yo mwan’andi ayakala, o mwan’ayakala yo se diandi, o ngudi yo mwan’andi ankento, o mwan’ankento yo ngudi andi, o ngudi a longo yo mwan’andi a longo, o mwan’a longo yo ngudi andi a longo.”—Luka 12:49, 53.

E mvovo mia Yesu mfunu kikilu mina, musungula kwa alongoki andi. I bosi, Yesu ovilukidi kwa nkangu. Wantu ayingi ke bakwikidi ko vo Yesu i Masia, muna kuma kiaki, ubavovese vo: “Avo numwene e tuti dikwizanga kuna weste, vana vau nuvovanga vo, ‘Mvula ikwizanga,’ i diau mpe divangamanga. Avo numwene tembwa kia sude kivekomokanga, nuvovanga vo, ‘Mbangazi ikwizanga,’ i diau mpe divangamanga. Akwa kivunina, oyeno nuzeye bakula e mpw’a nza ye zulu, kansi aweyi nulembele bakulwila kolo kiaki?” (Luka 12:54-56) Dimonekene vo ke bena bakubama ko.