Ngambiele Okingwidi Maria

Elisabete wakala ye yitu kimosi wayikilwanga vo Maria, wazingilanga muna mbanza Nazarete kuna Ngalili. Maria nzitikil’a Yosefe wa mvadi a nti kakala. Vava vumu kia Elisabete kialungisa ngonde sambanu, mbasi Ngambiele wamoneka kwa Maria. Wamvovesa vo: ‘Kiambote kiaku Maria. Yave usambwidi.’ Maria kabakula nsas’a mvovo mia Ngambiele ko. Muna kuma kiaki, wamvovesa vo: ‘Yimita oyimita yo wuta mwan’a yakala, ofwete kumvana e nkumbu a Yesu. Ntinu kesinga kala. E Kintinu kiandi kiyala yakwele mvu.’

Maria wavova vo: ‘Kansi, kizeye yakala ko. Aweyi iwutila mwana?’ Ngambiele wavova vo: ‘Mawonso kwa Yave malendakana. Mwand’avelela okwiza kwa ngeye, owuta mwan’a yakala. O Elisabete wa yitu kiaku wayimiti mpe.’ Maria wavova vo: ‘I ntaudi a Yave. Yambula diavangama nze una ovovele.’

Maria wayenda kuna mbanza yakala ku zunga kia miongo mu kingula Elisabete. Vava Maria kankayisa, o mwana wakala muna vumu kia Elisabete wanikuka. Elisabete wazala yo mwand’avelela. Wavova vo: ‘E Maria, Yave usambwidi.’ Lau diampwena ngina diau wau vo ngudi a Mfumu ame wizidi ku nzo ame.’ Maria wavova vo: ‘Nkembelele Yave ye nsi a ntim’ame wawonso.’ Maria ngonde tatu kakala yo Elisabete, i bosi wavutuka kuna Nazarete.

Vava Yosefe kazaya vo Maria oyimiti, wazola vambana yandi. Kansi, mbasi mosi wamoneka kwa yandi muna ndozi yo kumvovesa vo: ‘Kumoni wonga ko wa sompana yandi. Kavangidi diambu diambi ko.’ Muna kuma kiaki, Yosefe wabaka nkaz’andi Maria yo kwenda yandi kuna nzo.