Petelo Ovakwidi Yesu Nkalu

Vava Yesu kakala ye ntumwa zandi muna suku dia ntandu, wabavovesa vo: ‘Yeno awonso omu fuku wau, tina nukuntina.’ Petelo wavova vo: ‘Mono kikutina ko. Kana nkutu vo awonso batinini, mono kilendi kutina ko.’ Kansi, Yesu wavovesa Petelo vo: ‘Vitila e nsusu yakokola, ovova mu nkumbu tatu vo kunzeye ko.’

Vava masoladi banata Yesu kuna nzo a Kayafa, ntumwa zayingi batina. Kansi, nzole muna yau balanda kumosi yo nkangu. Mosi muna yau i Petelo. Wayenda vana yanzala kia nzo a Kayafa yo yantika yotela vana tiya. Dumbelele kimosi wamona e ndose a Petelo yo vova vo: ‘Izeye. Kumosi wakedinge yo Yesu.’

Petelo wavova vo: ‘Ve, ke mono ko. Kizeye ko kana nkia diambu una vovela.’ Wayantika kwenda vana mwelo. Kansi vana vau, dumbelele kiankaka wamona Petelo yo vovesa nkangu vo: ‘O muntu ndioyo kumosi kakedi yo Yesu.’ Petelo wavova vo: ‘Kizeye nkutu Yesu ko.’ Muntu mosi wamvovesa vo: ‘Ngeye mpe u mosi muna yau. E mpil’aku ya vovela isongele kikilu vo u mwisi Ngalili, nze Yesu.’ Kansi, Petelo wadia ndofi oku vo: ‘Kinzeye kwame ko.’

Vana vau, e nsusu yakokola. Vava Petelo kamona Yesu waviluka yo kuntala, wasungamena mvovo mia Yesu, wavaika kuna mbazi yo bokomoka ye dilu.

Muna ntangwa yayina, afundisi babaka e nzengo za fundisila Yesu kuna nzo a Kayafa. Babaka kala e nzengo za vonda Yesu, kansi owau kuma bavavanga. Ke basolola diambu ko muna yandi. I bosi, Kayafa wayuvula Yesu vo: ‘Nga ngeye u Mwan’a Nzambi?’ Yesu wavova vo: ‘Ingete, i mono yuyu.’ Kayafa wavova vo: ‘Ka tuvuidi diaka mfunu wa kimbangi kiankaka ko. O lwalu lutiangu.’ Afundisi bavova vo: ‘O muntu ndioyo kafwete vondwa.’ Bantaulwila mete, bamfuka meso yo kumbunda e nkomi. Bavova vo: ‘Avo ngeye u ngunza, utuzayisa nani uwende.’

Vava kuma kwakiá, banata Yesu kuna mbazi a nkanu yo kunyuvula diaka vo: ‘Nga ngeye u Mwan’a Nzambi? Yesu wavutula vo: “Yeno kibeni nuvovele dio vo i Mwan’a Nzambi.” Vava bawá e mvovo miami, bambadikila vo ntianguni yo kwenda yandi kuna lumbu lwa Pontio Pilato wa nyadi a Roma. Adieyi diavangama? Yambula twazaya.