Finama Nzambi

“Kimfumu Kiaku Kisikidiswa”

2 SAMUELE 7:1-16

LUSANSU lwa wantu lusonganga vo ayadi ayingi bekatulwanga vana kunda kiau. Akaka bekatulwanga vava nkangu usolanga nyadi wakaka, ayadi akaka mpe mu ngolo bekatulwanga vana kunda. Adieyi tuvova mu kuma kia Yesu Kristu una vo i Ntinu muna Kintinu kia Nzambi ki’ezulu? Nga vena ye diambu dilenda kunsimba mu lembi yala se Ntinu wasolwa kwa Nzambi? Tulenda solola e mvutu za yuvu yayi muna mvovo mia Yave kavovesa kwa Davidi wa Ntinu a Isaele yankulu miasonama muna 2 Samuele kapu kia 7.

Kuna lubantiku lwa kapu kiaki tulenda bakula vo Davidi nsoni kamona, wau vo ntinu kakala yo zingila muna nzo yambote, kansi e nkele a Nzambi mu saba yilundilwanga.a Davidi osongele luzolo lwandi mu tungila Yave e nzo yambote yovo tempelo. (Tini kia 2) Kansi Davidi ke yandi ko otungila Yave tempelo. Muna sadila Natani wa ngunza, Yave wavovesa Davidi vo mwan’andi osinga tunga tempelo.​—⁠Tini kia 4, 5, 12, 13.

Yave wayangalela luzolo lwambote kasonga o Davidi. Muna vana e mvutu kwa Davidi mu kuma kia vumi wandi yo lunganesa ungunza, a Nzambi wakanga ekangu ye Davidi wamvovesa vo osola muntu muna luvila lwandi ona oyala yakwele mvu. Natani wazayisa nsilu wau wa Nzambi kwa Davidi: “E nzo aku ye kimfumu kiaku kisikidiswa vovo wina yakwele mvu: e kunda kiaku kisikidiswa yakwele mvu.” (Tini kia 16) Nani ovinga mun’ekangu diadi, Ona oyala yakwele mvu? ​—⁠Nkunga 89:​20, 29, 34-36.

Yesu wa Nazarete wakala se mbongo a Davidi. Vava mbasi kasamuna luwutuku lwa Yesu, wavova vo: ‘Yave wa Nzambi okumvan’e kunda ki’es’andi Davidi: kayala muna nzo a Yakobo yakwele mvu; e kintinu kiandi ke kina nsuka ko.’ (Luka 1:​32, 33) Muna kuma kiaki, ekangu kakanga Yave yo Davidi, muna Yesu Kristu dialunganena. Ka solwa kwa wantu ko mu yala se ntinu, kansi Nzambi wamvana o nswa wayala yakwele mvu muna lungisa nsilu andi. Diambote twasungamena vo nsilu mia Nzambi mia ludi ye milungananga.​—⁠Yesaya 55:​10, 11.

Mambu mole mamfunu tulenda longoka muna 2 Samuele kapu kia 7. Diantete, tulenda kala ye ziku vo ka vena lekwa ko yovo muntu olenda sima Yesu Kristu kalembi yala. Muna kuma kiaki, tulenda kala mpe ye ziku vo olungisa ungunza wasakulwa mu kuma kia luyalu lwandi mu lungisa luzolo lwa Nzambi ova ntoto nze una lwavangamena kun’ezulu.​—⁠Matai 6:​9, 10.

Diazole, lusansu lwalu lutulongele elongi diamfunu mu kuma kia Yave. Lutusungamese vo Yave wamona yo yangalela luzolo lwambote kasonga o Davidi. Dialufiaulwisu mu zaya vo Yave oyangalelanga vumi tusonganga muna nsambil’andi. Ezak’e ntangwa, mambu mampasi mekutubwilanga nze mayela yovo kinunu, malenda kutusimba mu lembi lungisa mawonso tuzolele vanga muna salu kia Nzambi. Avo i wau, tulenda fiaulwiswa mu zaya vo Yave omonanga luzolo lwa ntima mieto yo vumi tusonganga muna nsambil’andi.

[Mvovo Vana Yand’a lukaya]