Nga Ozeye Nkumbu a Nzambi ye Osadilanga Yo?

Nga una yo nkundi ona kuzeye nkumbu ko? Nanga ve. Nkento mosi wa musi Bulgária oyikilwanga vo Irina wavova vo: “Kulendi finama Nzambi ona kuzeye nkumbu ko.” Nze una tumwene muna longi diantete, Nzambi ozolele vo wakala nkundi andi. Muna Bibila, Nzambi okuyisunzulanga vo: “Omono i Yave; eyayi i nkumbu ame.”—Yesaya 42:8.

O zaya yo sadila e nkumbu andi, nga mfunu kikilu dina kwa Yave? Badika edi: E nkumbu a Nzambi yasonama mu sono 4 ya Kiyibere iyikilwanga vo Tetragrama, e sono yayi imonekanga tezo kia nkumbu 7.000 muna Sono yantete ya nding’a Kiyibere. E nkumbu a Nzambi i yau isundidi yikwa muna Bibila ke mu nkumbu za wantu ankaka ko. E kiaki i ziku kisonganga vo Yave ozolele vo twazaya yo sadila e nkumbu andi.a

Wau vo Nzambi wavauka ye Mpungu-ngolo, ankaka beyindulanga vo ke dialuzitu ko mu sadila nkumbu andi. Kieleka, ke diambote ko mu sadila nkumbu a Nzambi mu mpila yambi, nze una kulendi vezela nkumbu a nkundi aku ko. Kansi, i luzolo lwa Yave vo awana bekunzolanga bazitisa yo zayisa nkumbu andi kw’ankaka. (Nkunga 69:30, 31; 96:2, 8) Sungamena vo Yesu walonga alandi andi basambanga vo: “E S’eto koko zulu, yambula nkumbu aku yazitiswa.” Tulenda zitisa nkumbu a Nzambi muna zayisa yo kw’ankaka. Avo tuvangidi wo, tufinama Nzambi.—Matai 6:9.

Bibila kivovanga vo Nzambi osianga sungididi kwa awana “bebadikanga [yovo zitisa] nkumbu andi.” (Malaki 3:16) Yave osianga nsilu mu kuma kia wantu awaya vo: ‘Ikubatanina wau bazeye nkumbu ame. Bekumbokela, ikubawila; ikala yau muna mpasi.’ (Nkunga 91:14, 15) O zaya yo sadila e nkumbu a Yave diamfunu muna kala ye ngwizani ambote yo yandi.