Lukau Lwampwena lwa Nzambi Ekuma Lusundidi e Ntalu?

Tukau twankaka tubadikilanga to vo twamfunu kadi nkwa wisa watuvana to yovo muntu ndiona tutoma zitisanga. Tukau twankaka kana una vo ke twafwa ntalu ayingi ko, tuyangalelanga to kadi yitu yeto batuvana to yovo akundi eto ana tubundanga vuvu. I diau diavangama muna lukau lwa Russell kwa Jordão. O lusansu lwalu luyikilu muna longi diviokele. Ekuma lusansu lwalu lwinina e ngwizani yo lukûlu?

Diantete, Nkand’a Nzambi uvovanga vo, “Nzambi watuma Mwan’andi mosi ova nza kimana twavuila moyo muna yandi.” (1 Yoane 4:9) E diambu diadi dikitulanga o lukûlu se lukau lwantalu kikilu. Ka vena muntu ko osundidi Nzambi muna wisa. Mu kuma kiandi, ntozi a Nkunga wa Nyibere wasoneka vo: “Bazaya wo vo nge kaka wina nkumbu a Yave, u Mpungu omu nza yawonso.” (Nkunga 83:18) Ke twafwana tambula lukau ko kwa mpungu-ngolo.

Dianzole, Nzambi i ‘Se dieto.’ (Yesaya 63:16) Mu nkia mpila? Kadi yandi watuvana o moyo. Vana tandu, Nzambi okutulunga-lunganga kuna walakazi wawonso nze una o se dianzodi kevanganga kwa wan’andi. Kuna nz’ankulu Nzambi wavova kwa nkangu andi Eferaime, oku vo: “O Eferaime nga i mwan’ame anzolw’e? nga i mwan’eyangi? . . . Ikumfwil’e nkenda, i Yave wau.” (Yeremiya 31:20) O Nzambi i wau mpe kemonanga mu kuma kia asambidi andi o unu. O Nzambi ke mvangi wa mpungu-ngolo kaka ko, kansi i Se dieto dia kwikizi ye Nkundi. Nga kukwikidi ko vo konso lukau kekutuvananga o Yave lwa ntalu kikilu?

O tukau twankaka twa ntalu, kadi twavaninua kuna zola ke kunkomekeno ko. O mvani amvevo kevavanga tambula mfutu ko muna wete kavangidi.

Nzambi watuvana o mwan’andi muna wete dieto ekuma kadi zola kekutuzolanga. Nkand’a Nzambi uvovanga vo: “Muna mpila yayi kwasengomokena o zola kwa Nzambi omu yeto, o Nzambi watuma Mwan’andi mosi.” Ekuma? “Kimana twavuila moyo muna yandi.” (1 Yoane 4:9) Nga Nzambi wakomekenwa mu vanga wo? Nkatu! “Lukûlu lwafutwa kwa Kristu Yesu” i sinsu kia “nkenda za Nzambi.”—Roma 3:24.

Ekuma o lukau lwa Nzambi lwinina se vangu dia “nkenda”? Nkand’a Nzambi uvovanga vo: “Nzambi watusonga o zola kwandi wau kayambula vo Kristu katufwila ekolo twakala asumuki.” (Roma 5:8) E nzol’amvevo yafila Nzambi mu vanga diambu mu kuma kia masumu ma wantu. Ka tufwanukini e nzola yayi ko, ke tuna mpe ye lekwa ko tulenda vutulwila Nzambi muna nzola katusonga. O lukau lwandi i nsisu kia nzol’ampwena muna lusansu lwa wantu.

Tukau twankaka twantalu, ekuma kadi tusunzulanga e diambu dina o mvani kavanga muna to vua. Avo muntu utuvene e lekwa kiandi kiantalu, tufwete toma kio yangalela mu kuma kia lekwa kina kayekola.

Nzambi ‘wavana Mwan’andi amosi.’ (Yoane 3:16) Kadi kutuvana mwan’andi anzolwa ko. Tuka kuna lubantiku vava o Yave kavanga o nsema, Yesu wasalanga kumosi yo Nzambi, wayikila Yesu vo.“eyangi diandi lumbu ya lumbu.” (Ngana 8:30) Yesu i ‘mwan’anzolwa’ a Nzambi ye “fwaniswa kia Nzambi olembi monekanga.” (Kolosai 1:13-15) Ke vena vangwa yole ko ya mianda ina ye ngwizani ambote nze Yave yo Yesu.

Kana una vo i wau, Nzambi “kavukisa nkutu Mwan’andi ko.” (Roma 8:32) Yave wete wayingi kavanga mu kuma kieto. Diampasi diakala kwa yandi muna vana mwan’andi se lukau.

Tukau twankaka twafunu kikilu, kadi tulungisanga e nsatu za muntu, musungula muna ntangw’ampasi. Yindula vo kimbevo una kiau, kansi kuna ye nzimbu ko. Vasolokele o muntu ufutidi e nzimbu muna mawuku maku, aweyi omona? O lukau lwalu lukuyangidika, ke wau ko e?

“Wauna wantu awonso befwilanga muna Adami, awonso muna Kristu mpe i bevuila moyo.” (1 Korinto 15:22) Wau vo tu mbongo Adami, yeto awonso “fwa tufwanga,” ke tuna yowu tuvulukila muna sumu yo lufwa ko, yovo muna ngolo za yeto kibeni ke tulendi vutulwisa ngwizani eto yo Nzambi ko yo lembi kondwa tumbu. Yeto kibeni ke tulendi kukivana moyo ko yovo vana “moyo” kwa muntu ankaka. Nkand’a Nzambi uvovanga vo: ‘Ke vena ona okûla mpangi andi ko, ngatu vana kwa Nzambi o lubakanisu luandi . . . Ke dilendakana ko.’ (Nkunga 49:7, 8) Lusadisu lwa Nzambi twavuanga o mfunu, kadi yeto wantu ke tulendi futa e ntalu ya lukûlu ko. Ke twakala ye vuvu kia vuluzwa ko.

Kuna zola kwawonso, Yave wafuta e nzimbu za “mawuku” twavuanga o mfunu, i sia vo, muna lusadisu lwa Yesu “wantu awonso bevuila moyo.” Aweyi lukûlu lwalungisila e diambu diadi? Muna Nkand’a Nzambi tutanganga vo, “O menga ma Yesu wa Mwan’andi mekutuvelelesa muna masumu mawonso.” Kieleka, o lukwikilu muna menga ma Yesu mana mabunguka lukutusadisanga muna lolokwa masumu yo vua moyo a mvu ya mvu. (1 Yoane 1:7; 5:13) O lukûlu adieyi luvanga mu kuma kia mpangi zeto ana bafwa? Nkand’a Nzambi edi uvovanga, “Wauna o lufwa lwayizila muna muntu mosi, o lufuluku lwa mafwa muna muntu mosi [Yesu] mpe lwayizila.”—1 Korinto 15:21.a

E kimenga kia Yesu i lukau lusundidi lwavaniwa kuna zola kwa mpungu-ngolo mu nza yawonso. Ke vena muntu ko wayekola lekwa kisundidi ntalu nze kina Yave wa Nzambi kayekola mu kuma kieto. Ke vena lukau lwankaka ko lwa lungisa e nsatu zeto avo ke kimenga kia Yesu ko kiatuvevola muna sumu yo lufwa. Kieleka, ke vena lukau ko lulenda tezaneswa yo lukûlu.