Aweyi Olenda Sadisila Nlongoki Kanungunuka Yamuna Luvubu?—Kunku Kiantete

 1. E sono kia 2 Korinto 3:1-3, aweyi kilenda kutusadisila mu yangalela e lau dia longoka e Bibila yo muntu yamuna luvubu? (Tala e foto dia fukwa.)

AWEYI omonanga avo nlongoki mosi a nkutakani aku ovubilu? Dialudi vo kiese omonanga. (Mat. 28:19) Kansi, avo ngeye walongoka yo muntu ndioyo, e kiese kiaku kiwokela kikilu. (1 Tes. 2:19, 20) Alongoki awaya bevubwanga bena se “nkand’a kimbangi,” ke kwa awana kaka ko belongokanga yau, kansi mpe kwa nkutakani yawonso.—Tanga 2 Korinto 3:1-3.

 2. (a) Nkia kiuvu kiamfunu tufwete kukiyuvula? Ekuma? (b) Nki i longi dia Bibila? (Tala e mvovo vana yand’a lukaya.)

² Diakiese mu zaya vo muna mvu yá miviokele, konso ngonde twafila e longi dia Bibilab kwa tezo kia 10 milhões dia wantu mu nza yawonso. Muna mvu miami, vioka 280.000 ma wantu bavubwa muna konso mvu. Aweyi tulenda sadisila e mafunda ye mafunda ma alongoki awaya a Bibila mu vubwa? Wau vo Yave osonganga luzindalalu muna vana e ntangwa ye lau kwa wantu mu kituka se alongoki a Kristu, oyeto mpe tuzolele vanga mawonso tulenda owau muna kubasadisa banungunuka mu nzaki yamuna luvubu. Kadi e ntangwa isidi yankufi.—1 Kor. 7:29a; 1 Pet. 4:7.

 3. Nkia mambu tufimpa mu longi diadi mu kuma kia fila e longi dia Bibila?

³ Wau vo diamfunu kikilu mu kitula wantu se alongoki owau, Selo Yambuta bayuvuidi kwa mpangi bevitang’o ntu muna mavula mu kuma kia mana tulenda vanga kimana alongoki ayingi a Bibila banungunuka yamuna luvubu. Mu longi diadi ye dina dilanda, tuzaya dina tulenda longoka muna mambu bavova aviti a nzila azikuka, misionario ye akengi a zunga.c (Nga. 11:14; 15:22) Oyau basasila dina alongi ye alongoki a Bibila balenda vanga kimana e longi diatwasa e nluta. Muna kuma kiaki, mu longi diadi mambu tanu tufimpa mana o nlongoki kafwete vanga muna nungunuka yamuna luvubu.

 4. Nkia diambu tufwete yindula mu kuma kia fila e longi diankufi dia Bibila vana mwelo a nzo a muntu?

⁴ Ayingi muna mpangi zeto belongokanga e Bibila yo wantu vana mielo mia nzo zau. Kana una vo eyayi i mpila yambote ya sikamesena o luzolo lwa muntu muna malongi ma Bibila, nkumbu miayingi e moko yayi yankufi ikalanga ye ke ivangamanga konso lumingu ko. Muna kwamanana sikamesa o luzolo lwa muntu, ateleki ankaka belombanga e número andi ya telefone. I bosi, o nteleki okumbokelanga yovo kuntwikila e sono kia Bibila muna mensagem. E moko yayi yankufi, ilenda kwamanana mu ngonde zayingi yo lembi kituka se longi dia Bibila dinungunukanga. Kansi yindula e diambu edi: Wau vo o nlongoki ndioyo ke vaulanga e ntangwa ayingi ko yo lembi vanga e ngolo muna longoka e Diambu dia Nzambi, nga nungunuka kenungunuka yo lwaka mu tezo kia kukiyekola kwa Yave yo vubwa? Nanga ke dilendakana ko.

 5. Aweyi tulenda sadila mana Yesu kavova muna Luka 14:27-33, muna sadisa alongoki eto a Bibila?

⁵ Lumbu kimosi, Yesu wasadila e nona muna songa dina muntu kafwete vanga muna kituka se nlongoki andi. Entete, wavovela o muntu wazola tunga e nzo yandá. Yesu wavova vo o muntu ndioyo kafwete “teka vuanda, kabadika e ntalu” muna zaya kana vo ofokola e nzo. I bosi, wavovela o ntinu wazola kwenda nuana e vita. O ntinu ndioyo kafwete “teka vuanda, mu badika” kana vo makesa mafwana kena mau muna sunda e vita. (Tanga Luka 14:27-33.) Diau dimosi mpe, Yesu wazaya wo vo ndiona ozolele kituka se nlongoki andi kafwete toma fimpa mana mevavuanga mu kala nlandi a Yesu. Muna kuma kiaki, tuzolele kasakesa o nlongoki a Bibila kalongokanga yeto konso lumingu. Aweyi tulenda wo vangila?

 6. Adieyi tulenda vanga kimana alongoki eto banungunuka?

⁶ Entete, lambula e moko ekolo ofilanga e longi vana mwelo a nzo a muntu. Nanga vana fulu kia tanga kaka sono kimosi, olenda tanga sono yole muna konso nkingula. Vava omona vo o muntu omokenanga yandi oyantikidi yangalela e moko yandá, olenda kunyuvula: “Nga vena ye fulu tulenda vuanda yo kwamanana mokena?” E mvutu zandi zisonga kana vo e longi dia Bibila mfunu kikilu dina kwa yandi yovo ve. I bosi, muna sadisa o nlongoki kanungunuka mu nzaki, nanga olenda kunyuvula: “Nga ozolele longoka nkumbu miole muna lumingu?” Kansi, mayingi mevavuanga ke longoka kaka nkumbu miole ko konso lumingu.

 7. Aweyi nlongi kalenda toma kubamena muna konso longi dia Bibila kefila?

⁷ Wau vo u nlongi, ofwete toma kubamanga muna konso longi dia Bibila ofila. Olenda yantikila muna tanga e longi yo sia e sungididi muna sono. Vava toma bakula e mambu masina mena muna longi. Fimpa e ntu a diambu a longi, ntu mia mambu miakete, yuvu, sono yasonekwa vo “tanga,” mafoto yovo fwaniswa ye video zilenda sadisa mu sasila e longi. I bosi, yindula o nlongoki aku. Yindula mpe una olenda sasila e longi ofila mu mpila yaleboka ye yatoma kiá kimana diakala diasazu kwa nlongoki mu bakula yo sadila mana kelongoka.—Nek. 8:8; Nga. 15:28a.

 8. E sono kia Kolosai 1:9, 10, aweyi kilenda kutusadisila mu sambanga mu kuma kia alongoki eto a Bibila?

⁸ Ekolo okubikanga e longi ofila, samba kwa Yave mu kuma kia nlongoki ye mambu mekuntokanesanga. Samba mpe kwa Yave kimana kasadisa walonga e Bibila muna mpila isimba o ntim’a nlongoki. (Tanga Kolosai 1:9, 10.) Ukiyuvula kana vo vena ye diambu dilenda kala diampasi kwa nlongoki mu bakula yovo tambulwila. Zaya dio vo e kani diaku i sadisa o nlongoki kanungunuka yo vubwa.

 9. Aweyi o nlongi kalenda sadisila o nlongoki mu kubika e longi? Sasila.

⁹ Tuna ye vuvu vo avo nlongoki olongokanga e Bibila konso lumingu, ediadi dikunsadisa mu yangalela mawonso Yave yo Yesu bevanganga yo wokesa o luzolo lwandi lwa longoka diaka mayingi. (Mat. 5:3, 6) Muna vua e nluta mia longi, o nlongoki kafwete sianga e sungididi muna mambu kelongokanga. Muna kuma kiaki, unsasila vo diamfunu kakubikanga e longi diandi vitila nualongoka. Unsasila mpe o mfunu wa tanganga e longi kelongoka yo yindula una kalenda sadila e longi diadi muna zingu kiandi. Aweyi olenda sadisila o nlongoki kakubika e longi diandi? Nukubika entwadi longi dimosi muna kunsonga una kalenda wo vangila.d Unsasila una kalenda sololwela e mvutu zasina muna tini yo kunlonga una kalenda sila e sinsu muna mvovo miasina kimana kasungamena e mvutu. I bosi, unlomba kavana e mvutu muna mvovo mia yandi kibeni. Avo nlongoki ovangidi mambu mama, ediadi dikusadisa mu zaya kana vo otomene bakula e longi. Kansi, vena mpe ye mambu mankaka olenda kasakesa o nlongoki mu vanga.

10. Ekuma dinina diamfunu kwa nlongoki mu tanganga e Bibila lumbu yawonso? Adieyi kafwete vanga muna vua nluta muna ntangilu andi ya Bibila?

¹⁰ Vana ntandu a longokanga konso lumingu yo nlongi andi, vena ye mambu mankaka o nlongoki kalenda vanga yandi kibeni lumbu yawonso. Kafwete mokenanga yo Yave. Mu nkia mpila? Muna wanga e nding’a Yave yo mokenanga yandi. O nlongoki olenda wá e nding’a Nzambi muna tanganga e Bibila lumbu yawonso. (Yos. 1:8; Nku. 1:1-3) Songa kwa nlongoki una kalenda sadila e “Programa ya Ntangilu a Bibila” ina muna nzil’eto ya internete jw.org.e Kieleka, muna kunsadisa kavua e nluta muna ntangilu andi ya Bibila, kasakesa nlongoki kabadikanga mana ketanganga. Umvovesa vo ekolo ketanganga e Bibila, kafwete kukiyuvula: ‘E diambu diadi, adieyi dindongele mu kuma kia Yave? Aweyi ndenda dio sadila muna zingu kiame?’—Mav. 17:11; Yak. 1:25.

11. Aweyi o nlongoki kalenda longokela o samba? Ekuma dinina o mfunu kasambanga kwa Yave lumbu yawonso?

¹¹ Kasakesa nlongoki aku kamokenanga yo Yave muna sambanga lumbu yawonso. Muna kuma kiaki, sambanga ye nsi a ntima yawonso kuna lubantiku ye kuna mfoko a konso longi yo yika e nkumbu andi ekolo osambanga. Ekolo kewanga e sambu yaku, o nlongoki olenda longoka una kalenda vangila e sambu ya nsi a ntima kwa Yave wa Nzambi muna nkumbu a Yesu Kristu. (Mat. 6:9; Yoa. 15:16) Yindula una o nlongoki aku kalenda toma finamena Nzambi muna tanganga e Bibila lumbu yawonso (wá e nding’a Yave) yo samba (mokena yo Yave). (Yak. 4:8) Avo ovangidi wo, o nlongoki onungunuka yo lwaka yamu tezo kia kukiyekola kwa Yave yo vubwa. Nkia diambu diankaka dilenda kunsadisa?

12. Aweyi o nlongi kalenda sadisila o nlongoki kakala ye ngwizani ambote yo Yave?

¹² Mana o nlongoki kelongoka muna Bibila ke mafwete kala kaka muna ntu andi ko, kansi mafwete kota mpe muna ntim’andi. Ekuma? Kadi o ntim’eto, i sia vo, zolela, makani ye ngindu zeto zikutufilanga mu vanga e diambu. Kasikil’owu, Yesu walonganga mambu mayingi kwa wantu, oyau mpe bayangalelanga malongi mandi. Kansi, o wantu balandanga Yesu kadi e malongi mandi masimbanga e ntima miau. (Luka 24:15, 27, 32) O nlongoki aku kafwete badikilanga Yave nze Muntu kemonanga kikilu, ona kalenda vanga yandi kikundi yo kumbadikila nze Se diandi, Nzambi andi ye Nkundi andi. (Nku. 25:4, 5) Ekolo ofilanga e longi dia Bibila kwa nlongoki, toma sasilanga e fu ya Nzambi. (Luv. 34:5, 6; 1 Pet. 5:6, 7) Vanganga wo muna konso longi ofila. Sadisa o nlongoki aku kayangalelanga e fu ya Yave nze zola, nkenda ye ngemba. Yesu wavova vo o “nkanikinu wanene ye wantete” i “zola Yave wa Nzambi aku.” (Mat. 22:37, 38) Muna kuma kiaki, sadisa o nlongoki aku kazola Yave muna ntim’andi wawonso.

13. Yika e nona kisonganga una olenda sadisila o nlongoki kalongoka mu kuma kia fu ya Yave.

¹³ Sasila kwa nlongoki aku e kuma ozolelanga Yave. Ediadi dilenda sadisa o nlongoki aku kazaya vo yandi kibeni mpe kafwete kala ye ngwizani ambote yo Nzambi. (Nku. 73:28) Muna bonga e nona, muna nkanda osadila mu fila e longi yovo muna sono otanga, nga vena ye diambu disonganga e fu ya Yave nze zola, ngangu, unsongi yovo nkuma? Nga e diambu diadi dilenda simba o ntim’aku? Zayisa dio kwa nlongoki aku. Yambula o nlongoki aku kazaya wo vo ekiaki i kimosi muna kuma ozolelanga Se dieto dia zulu. Kansi, vena ye diambu diankaka konso nlongoki kafwete vanga muna nungunuka yamuna luvubu.

14. Nkia mambu meyikwanga muna sono kia Ayibere 10:24, 25, malenda sadisa o nlongoki mu nungunuka?

¹⁴ Yeto awonso tuzolele vo alongoki eto banungunuka yamuna luvubu. Imosi muna mpila tulenda kubasadisila i kubakasakesa bendanga muna tukutakanu tweto. Alongi azikuka bavova vo alongoki ana bekwendanga muna tukutakanu benungunukanga mu nzaki. (Nku. 111:1) Alongi ankaka bevovesanga alongoki au vo vena ye mambu belongoka kuna nzo au ekolo belongokanga e Bibila, vo i mambu mankaka muna tukutakanu kaka belongokela mo. Muna kuma kiaki, olenda tanga Ayibere 10:24, 25 yo nlongoki aku yo kunsasila e nluta kalenda vua avo wele muna tukutakanu. Unsonga e video ina yo ntu a diambu Nkia Mambu Mevangamanga Muna Seka dia Kintinu?f Sadisa o nlongoki kakala ye kani dialembi kondwanga muna tukutakanu.

15. Adieyi tulenda vanga muna kasakesa o nlongoki kendanga mu tukutakanu?

¹⁵ Adieyi olenda vanga avo o nlongoki aku ke toma kwendanga mu tukutakanu ko yovo kayantikidi ntete lungana ko? Kuna kiese kiawonso unzayisa diambu diamfunu walongokele muna lukutakanu lwaviokele. Kalukatikisu ko vo ediadi dikasakesa o nlongoki mu kwenda mu tukutakanu. Umvana Eyingidilu yovo Nkand’a Malongi tuna longoka mu ngonde yayi. Unsonga mana mevovelwa muna lukutakanu lulanda yo kunyuvula kana nkia longi yovo nkia diambu dituntidi e sungididi kiandi. Mana o nlongoki kewá yo mona muna lukutakanu lwantete kekwenda, mekunyangidika kadi kasidi mo mona ko ngatu wá muna mabundu mankaka. (1 Kor. 14:24, 25) Ozayana ye mpangi zankaka bena vo mbandu ambote kalenda tanginina. E mpangi zazi balenda kunsadisa muna nungunuka yamuna luvubu.

16. Aweyi tulenda fidila e longi dia Bibila kwa muntu kimana kanungunuka yamuna luvubu? Adieyi tuvovela muna longi dilanda?

¹⁶ Aweyi tulenda fidila e longi dia Bibila kwa muntu kimana kanungunuka yamuna luvubu? Nze una tumwene mu longi diadi, ofwete sadisa nlongoki kazaya o mfunu wa longi dia Bibila muna kunkasakesa kalongokanga konso lumingu yo kubika konso longi kelongoka. Unkasakesa mpe kamokenanga yo Yave lumbu yawonso yo kala ye ngwizani ambote yo yandi. Ofwete mpe kasakesa o nlongoki kendanga muna tukutakanu. (Tala e babu “Mana Alongoki Bafwete Vanga Muna Nungunuka Yamuna Luvubu.”) Kansi, muna longi dilanda, tuvovela diaka mambu tanu bafwete vanga alongi a Bibila muna fila alongoki yamuna luvubu.