Akweyi Kutukanga e Nzimbu Zisadilwanga e Salu kia Mbangi za Yave?

Tukau twa mvevo Mbangi za Yave bevananga, i twau tusadilwanga e salu kieto omu nza yawonso.a Katula e nkela za tukau zikalanga muna fulu yeto yawonso ya nsambila, e mpila zankaka za vanina tukau zina muna nzil’eto ya internete Donate.jw.org. Muna nzila yayi, o muntu olenda vana nkayilu mu kuma kia salu kieto kia nz’amvimba, nkayilu mu kuma kia nsatu za nkutakani yovo mu kuma kia mambu mau mole.

E Mbangi za Yave ke bevananga tini kia kumi ko, ke bevananga mpe ntalu yasikididi ko ngatu kunku kiasikididi kia mfutu au kuna salu. (2 Korinto 9:7) Ke tulombanga nkubidi-nkubidi ko, ke tulombanga mpe nzimbu ko muna kota muna tukutakanu tweto. Akuluntu eto ke betambulanga mfutu ko muna fila e longi dia luvubu, longi dia luziku, longi dia lukazalu yovo salu yankaka ya nsambila. Ke tukubikanga fulu ya tekela ko muna kombola e nzimbu, ngatu kubika nsaka za bingo, nkinzi, malambu, nsaka za rifa yovo lomba nzimbu muna nkubika zankaka. E nkumbu za wantu bevananga e nkayilu ke zizayiswanga ko kwa nkangu. (Matai 6:2-4) Muna nzila zeto za internete ye muna nkanda mieto, ke musiwanga tuzayisu twa yinkita ko.

Konso ngonde, e nkutakani zawonso za Mbangi za Yave zivananga luzayisu lwa mbalu a nzimbu za nkayilu muna tukutakanu twau, muna tukutakanu twatu mukalanga yo wantu bena vo ke Mbangi za Yave ko. E nkanda miawonso mia nzimbu mia konso nkutakani, mifimpululwanga (yovo vangwa e auditoria) ntangwa ke ntangwa muna kala ye ziku vo e nzimbu za nkayilu mu mpila yambote zina sadilwa.—2 Korinto 8:20, 21.

• Nkela za tukau: Olenda kobola e nzimbu yovo cheque muna nkela za tukau muna Maseka ma Kintinu, Maseka ma Tukutakanu Twampwena yovo muna fulu yankaka ivangamenanga tukutakanu tweto.

• Muna nzil’eto ya internete: Muna nsi zayingi, olenda sadila “Nzil’a Internete ya Mbangi za Yave muna vana tukau,” kiakala muna cartão multicaixa, vanga transferência muna Iban yovo muna mpila zankaka.b Akaka muna Mbangi za Yave ‘belundanga e lekwa’ kina bevana se nkayilu konso ngonde ye besadilanga e ndekwa zazi ziyikilu.—1 Korinto 16:2.

  

• Nkayilu mia teka kubika mu kolo kiandá: E nkayilu miankaka mivavanga vo miateka kubikwa mu kolo kiandá yovo miateka wizaneswa ye nsiku mia luyalu (i sia vo, miavangwa assessoria jurídica). O kubika mambu mu mpila yayi dilenda sadisa o muntu mu toma sadila e nluta ketambulanga muna nsi andi muna diambu ditadidi mpaku (yovo benefícios fiscais). Ayingi babaka nluta muna toma vava zaya e mpila nkayilu balenda vana ekolo bena o moyo ye mina milenda vewa vava befwa. Dodokolo, mokena ye mpangi zeto kuna vula dia Mbangi za Yave dia nsi aku muna zaya una olenda vanina e nkayilu mitadidi:

  • contas bancárias

  • seguro ye planos de previdência privada

  • nzo ye lupangu

  • ações ye títulos

  • testamentos ye fideicomisso

Muna zaya e mpila zaswaswana za vanina e nkayilu zisadilwanga mu zunga kiaku, ziula e nzila eyi ya intenete: “Vana Lukau mu Kuma Kia Mbangi za Yave.”