Wantete wa Yoane

1 Ndiona okalanga tuka kuna lubantiku, ona twawá, ona twamona muna meso meto, ona twatala yo simba muna moko meto, una vo i diambu dia moyo,+ 2 (elo, o moyo wasengomonua, tumwene wo, tusilanga wo kimbangi+ yo kunusamunuina o moyo wa mvu ya mvu+ una wakala yo Se ye wasengomonua kwa yeto), 3 tukunusamunuinanga mana twamona yo wá,+ kimana nuakala yeto entwadi. E kintwadi kieto kiaki i kina vana vena o Se yo Mwan’andi Yesu Kristu.+ 4 Tunusonekene mambu mama kimana e kiese kieto kialunga.

5 Ezazi i nsangu twawá kwa yandi, tukunusamunuinanga: O Nzambi i ntemo,+ muna yandi ke muna nkutu tombe ko. 6 Avo tuvovele vo, “Tuna yandi entwadi,” ekolo tukangalelanga muna tombe, luvunu tuvovele, ke tusadilanga ludi ko.+ 7 Kansi, avo tukangalelanga muna ntemo wauna yandi kibeni Nzambi kenina mu ntemo, tuna entwadi muntu yo nkwandi, menga ma Yesu wa Mwan’andi mekutuvelelesanga muna masumu mawonso.+

8 Avo tuvovele vo: “Ke tuna ye sumu ko,” vuna tukukivunanga,+ e ludi ke kina mu yeto ko. 9 O Nzambi nkwa kwikizi ye nsongi, i dianu avo tufunguni masumu meto, ololoka masumu meto yo kutuvelelesa muna vilwa wawonso.+ 10 Avo tuvovele vo: “Ke tusumukanga ko,” tukitwidi Nzambi se nkwa luvunu, e diambu diandi ke dina mu yeto ko.