Nga wakala kala yo luzolo lwa tanga Nkand’a Nzambi, kansi kuna kwalanda wayoya nze una diavangama kwa Yovy, Queennie ye Ezekiel? Ndonga beyindulanga vo ke belenda tanga Nkand’a Nzambi ko. Kansi adieyi ovanga avo ozeye vo Nkand’a Nzambi ulenda kusadisa mu kala ye zingu kiambote ye kia kiese? Adieyi ovanga avo basongele e ndekwa zambote olenda sadila kimana wayangalela e ntangilu aku ya Nkand’a Nzambi? Nga olenda tanga Nkand’a Nzambi kimana wavua e nluta mina mo?

Yambula twazaya mana bavova o wantu ana bavua e nluta vava bayantika tanga o Nkand’a Nzambi.

Ezekiel, oviokele kala mvu 20, wavova vo: “Vitila yayantika tanga o Nkand’a Nzambi, yavangilanga o mambu kivangi-kivanga. Kansi vava yayantika wo tanga, wansadisa mu kala ye zingu kiambote. Nkand’a Nzambi uvuidi malongi mambote mana mvuidi o mfunu konso lumbu.”

Frieda, oviokele kala e mvu 20, wavova mpe vo: “Omono makasi mayingi yafunganga, kansi vava yayantika tanga o Nkand’a Nzambi, yayantika lembama. Yayantika toma wizana yo wantu, owau akundi ayingi ngina yau.”

Eunice, oviokele kala mvu 50, wavova mu kuma kia Nkand’a Nzambi vo: “Wansadisa mu soba e fu yame yambi yo kituka se muntu ambote.”

Wantu ayingi besobanga e mpila zingu kiau muna tanganga o Nkand’a Nzambi. Ongeye mpe olenda wo vanga avo oyantikidi tanga o Nkand’a Nzambi. (Yesaya 48:17, 18) Nkand’a Nzambi ulenda kusadisa mu (1) baka nzengo zambote, (2) sola akundi ambote, (3) lembi tokana kwayingi muna zingu, ye (4) zaya e ludi mu kuma kia Nzambi, ediadi i diambu disundidi o mfunu muna mawonso. Yave wa Nzambi yandi wasonekesa o malongi mena muna Nkand’a Nzambi. Avo olemvokele mo, ke mekutwasila mpasi ko. O Nzambi malongi mambote kaka kevananga.

Ozevo, baka e nzengo wa yantika tanga o Nkand’a Nzambi. Nki kilenda kusadisa mu yantika tanga Nkand’a Nzambi? Yambula twavovela o mambu malenda kusadisa.

Nkia diambu dilenda kusadisa mu yangalela e ntangilu aku ya Nkand’a Nzambi yo vua e nluta? Yambula twavovela ndekwa zitanu zisadisanga wantu ayingi.

Sola fulu kiambote. Sola fulu kia vuvama, kia kondwa mazu. Ku kadi vana fulu kilenda vunzanesa ngindu zaku ko. Toma sia e sungididi muna mambu otanganga. Tangila vana fulu kina o ntemo kimana wavua e nluta muna mambu otanga.

Kala ye ngindu zambote. Wau vo o Se dieto kuna zulu yandi wasonekesa o Nkand’a Nzambi, muna vua e nluta ofwete kukikulula nze kingiana-ngiana olongwanga kwa se dia nzodi. Avo ngindu zambi okalanga zau mu kuma kia Nkand’a Nzambi, katula zo kinumana Nzambi katoma kulonga.—Nkunga 25:4.

Samba vitila watanga. Muna Nkand’a Nzambi ngindu za Yave zasonama mo. Muna kuma kiaki, lusadisu lwa Nzambi tuvuidi o mfunu muna bakula wo. Nzambi osianga nsilu vo ovana “mwand’avelela kwa awana bekunlombanga.” (Luka 11:13) Mwand’avelela ulenda kusadisa mu bakula e ngindu za Nzambi. Usinga kuziula o ntima kimana watoma bakula “kana nkutu oma masina ma Nzambi.”—1 Korinto 2:10.

Yindula mambu otanganga. Kutangi kaka tini yayingi ko. Kansi yindulanga mana otanganga. Ukiyuvula: ‘Nkia fu yambote ndenda tanginina muna lusansu lwa muntu ndioyo ovovelwanga mu Nkand’a Nzambi? Aweyi Ndenda sadila muna nzingu kiame o mambu ntangidi?’

Kala ye makani. Muna ntangilu aku ya Nkand’a Nzambi, vava longoka diambu dikutwasila e nluta muna zingu kiaku. Olenda kuyisila e kani dia longoka mu kuma kia ‘fu ya Nzambi, una olenda kadila yakala diambote yovo nkento ambote.’ I bosi, sola e tini ya Nkand’a Nzambi ilenda kusadisa mu lungisa e kani diaku.a

Mambu matanu tuvovele mekusadisa mu yantika tanga Nkand’a Nzambi. Kansi nki kilenda kusadisa watoma yangalela e ntangilu aku ya Nkand’a Nzambi? E longi dilende disonganga e ndekwa ofwete sadila.

Aweyi ukala e ntangilu aku ya Nkand’a Nzambi? Yampasi yovo ya kiese? Mawonso kwa ngeye mena. Yambula twavovela mana ofwete vanga muna wokesa luyangalalu lwaku muna tangilu aku ya Nkand’a Nzambi.

Sola nsekola yambote, yasekola o mambu mu mpila ina wantu bevovelanga. Avo otangidi nkanda wazala e mvovo mia mpasi yovo mina kuzeye ko, dia ludi vo kuyangalela diaka tanga nkanda wau ko. Muna diadi, sola Nkand’a Nzambi wasekolwa mu mvovo mia leboka kimana o mambu okala tanga masimba o ntim’aku. Vava e nsekola ina yatoma sekola o mambu mu mpila yambote.a

Sadila umbangu wampa. O unu, O Nkand’a Nzambi ke unietekwanga kaka ko kansi ukubikwanga mpe kimana watangilwa muna aparelho digital. Olenda tangila Nkand’a Nzambi muna internete, olenda wo kulumuna watangila wo muna komputadore, tablet yovo telefone digital. Vena ye nsekola zayingi zina ye sadilwa yayingi ilenda kusadisa mu solola sono yankaka ivovelanga e diambu diau adimosi yovo tezanesa nsekola za mpila mu mpila. Avo kuzolele kwaku tanga ko, olenda wa e ntangilu ya Nkand’a Nzambi. Ndonga bezolanga wa e ntangilu ya Nkand’a Nzambi ekolo bekalanga muna kalu, besukulanga mvuatu yovo salu yankaka ikubavananga e ntangwa ya wá e ntangilu ya Nkand’a Nzambi. Nga olenda teza e ndekwa zazi?

Vavulula mambu otanganga. Vena ye sadilwa yayingi ilenda kusadisa mu vua e nluta mia ntangilu aku ya Nkand’a Nzambi. Vena ye mapa mesonganga e zunga ye nsi ziyikwanga muna Nkand’a Nzambi, ilenda kusadisa mu zaya e zunga otanganga muna Nkand’a Nzambi. E diadi dilenda kusadisa mu yangalela e ntangilu aku ya Nkand’a Nzambi. O malongi mevaikanga muna zulunalu yayi yovo muna kunku kia “Malongi ma Nkand’a Nzambi” muna nzil’eto ya internete jw.org/kwy, malenda kusadisa mu toma bakula o Nkand’a Nzambi.

Sadila ndekwa zaswaswana. Avo kuyangalelanga tanga Nkand’a Nzambi kuna lubantiku ko yakuna nsuka, ekuma olembi solela e nkuku kina otoma yangalelanga? Avo ozolele zaya akwa tunda beyikwanga muna Nkand’a Nzambi, yantika tanga e nkanda miyikanga e nkumbu zau. Tanga e babu “Zaya Lusansu lwa Wantu Beyikwanga Muna Nkand’a Nzambi,” mu zaya e ndekwa zankaka. Olenda mpe tanga diambu dimosi-dimosi yovo tangila muna ndandani za mambu una mavangamena. Teza sadila e ndekwa zazi.

Nkand’a Nzambi nkanda wa mfunu kikilu. Una ye malongi matuka kwa Nzambi wa Mvangi eto. (2 Timoteo 3:16) O mambu masonama muna nkanda wau malenda soba e zingu kieto. Muna Nkand’a Nzambi tutanganga vo: “E diambu dia Nzambi diamoyo ye nkuma.” (Ayibere 4:12) Uvuidi o nkuma wa soba e zingu kieto muna mambu mole—ukutuvananga luludiku tuvuidi o mfunu muna zingu kieto kia lumbu ke lumbu, ukutusadisanga twazaya Nzambi ye nsilu miandi.—1 Timoteo 4:8; Yakobo 4:8.

Nkand’a Nzambi ulenda soba e zingu kiaku owau. Nkand’a Nzambi ulenda kusadisa muna mambu mekubwilanga. Uvananga malongi mamfunu muna:

• Kala ye ngwizani ambote ye wantu.—Efeso 4:31, 32; 5:22, 25, 28, 33.

• Kala ye ngindu za vuvama yo vimpi wambote.—Nkunga 37:8; Ngana 17:22.

• Zaya wete yo bi.—1 Korinto 6:9, 10.

• Toma sadila nzimbu.—Ngana 10:4; 28:19; Efeso 4:28.a

Kuna Asia, yakala dimosi yo nkaz’andi betoma yangalelanga malongi ma Nkand’a Nzambi. Nze una divangamanga Ezak’e ntangwa muna longo lwampa, oyau mpe ke batoma wizananga ko yo mokena una ufwene. Kansi bayantika lemvokela mambu batanganga muna Nkand’a Nzambi. Nkia nluta diatwasa? Vicent una vo i yakala, wavova vo: “Mana yatanga muna Nkand’a Nzambi mansadisa mu sunda e mpasi yanuananga zau muna longo. O lemvokela malongi ma Nkand’a Nzambi dikutusadisanga mu kala ye zingu kia kiese muna longo.” Nkaz’andi Annalou, wakudikila vo: “O tanga tusansu twa wantu bevovelwanga muna Nkand’a Nzambi diatoma kutusadisa. Owau o longo lweto se lwa kiese, iyangalelanga mawonso tuvanganga muna nzo eto.”

Nkand’a Nzambi ulenda kusadisa mu zaya Nzambi. Vana ntandu a mambu ma longo, Vicent wavova diaka vo: “Muna tanganga o Nkand’a Nzambi itoma finamanga Yave ke mu mvu miavioka ko.” Mvovo mia Vicent misongele vo Nkand’a Nzambi ulenda kusadisa mu zaya Nzambi. Avo ovangidi wo kubaka kaka nluta mia malongi mena mo ko, kansi omona mpe vo e kikundi kiaku yo Nzambi kiwokela kikilu. Se walongoka mambu mayingi mu kuma kia zingu kina Yave kasila nsilu, e ntangwa ina okala ye ‘zingu kia sikila,’ zingu kia kwele mvu. (1 Timoteo 6:19) Ke vena nkanda wankaka ko uyikanga mambu mama mawonso.

Nze una Vicent ye Annalou bavanga, ongeye mpe olenda soba e zingu kiaku owau yo longoka mayingi mu kuma kia Nzambi. Muna vanga wo, ofwete yantika tanga Nkand’a Nzambi yo lembi yoya. Ekolo okala tanga e Diambu dia Nzambi, nanga yuvu yayingi ovava bakila e mvutu. I diau diavangama kwa muntu mosi wazinga kala se mafunda mole ma mvu miviokele kala. Nkwa wisa kakala kuna Etiopia, yuvu yayingi kakala yau mu kuma kia mambu katanganga muna Nkand’a Nzambi. Lumbu kimosi muntu mosi wanyuvula kana wabakulanga mana katanganga, wavutula vo: “Aweyi ndenda mo zayila, wau vo ke vena muntu ko olenda mo kunsasila?”b (Mavangu 8:30, 31, 34) I bosi watambula lusadisu lwa Filipo wa nlongoki a Yesu ona wakala yo zayi wasikila wa Nkand’a Nzambi. Diau adimosi mpe, avo ozolele zaya mayingi mu kuma kia Nkand’a Nzambi, tuwondelele wasoneka e ndomba muna nzil’eto www.jw.org yovo sonekena Mbangi za Yave muna nzila ziyikilu muna nkanda wau. Olenda mpe mokena ye Mbangi za Yave muna zunga kiaku yovo olenda kwenda kuna Seka dia Kintinu dina muna zunga okalanga. Bonga o Nkand’a Nzambi wayantika wo tanga o unu yo yambula vo watomesa e zingu kiaku!