Nki i Vita ya Armangedo?

Armangedo i vita yansuka vana vena ayadi a nza yo Nzambi. Ayadi awaya ye awana bekubayikamanga kana nkutu owau, betelamenanga Nzambi muna lembi tambulwila luyalu lwandi. (Nkunga 2:2) E vita ya Armangedo isukisa emvimba ayadi a nza yayi.—Daniele 2:44.

E mvovo “Armangedo” umonekanga kaka nkumbu mosi muna Bibila muna nkand’a Lusengomono 16:16. Ungunza wa Lusengomono usonganga vo ntinu mia nza yawonso ‘belunganeswa vana fulu kiyikilwanga muna Kiyibere vo Armangedo,’ “muna vit’a lumbu kianene kia Nzambi a Mpungu-ngolo.”—Lusengomono 16:14.

Nani onuana muna Armangedo? Yesu Kristu otwadisa e vu kia zulu muna sunda mbeni za Nzambi. (Lusengomono 19:11-16, 19-21) E mbeni zazi i awana betelamenanga wisa kia Nzambi ye awana bekumvezanga.—Yezekele 39:7.

Nga vita ya Armangedo inuaninua kuna Oriente Médio? Ve, e vita ya Armangedo ke ivangama kaka mu nsi imosi ko, kansi mu nza yamvimba.—Yeremiya 25:32-34; Yezekele 39:17-20.

Mvovo Armangedo ezak’e ntangwa usekolwanga vo “Har–Mangedo,” (Muna Kiyibere Har Meghiddohnʹ), una ye nsasa vo “Mongo a Mengido.” Mengido mbanza ya Isaele yankulu yakala. Lusansu lusonganga vo vita zayingi zanene zanuanua muna mbanza yayi kumosi ye vita zankaka zasonama muna Bibila. (Afundisi 5:19, 20; 2 Ntinu 9:27; 23:29) Kansi, Armangedo ke kilendi kala fulu ko kina lukufi ye Mongo a Mengido wankulu. Ke muna mongo wanene ko kana nkutu ubundakeso ye Ndimba wawonso wa Yizerele, ke ulendi fwana mbeni zawonso za Nzambi ko.

Aweyi ukala e vita ya Armangedo? Kanele vo ke tuzeye ko una Nzambi kesadila nkum’andi, kansi ovuidi nuaninua yayingi ina kasadila muna ntama nze matadi ma mvula, nzakama za ntoto, mvula zampwena, tiya ye lengo, miandazi ye yimbevo. (Yobi 38:22, 23; Yezekele 38:19, 22; Kabakuke 3:10, 11; Zakariya 14:12) Mavuanga mekala vana vena mbeni za Nzambi, akaka bevondana kansi kuna kulanda bebalula vo Nzambi una kubanuanisa.—Yezekele 38:21, 23; Zakariya 14:13.

Nga vita ya Armangedo i mbaninu a nza? O ntoto ke ufwaswa ko kadi i fulu Nzambi kavana kwa wantu kimana bazingila mo yakwele mvu. (Nkunga 37:29; 96:10; Kimpovi 1:4) E vita ya Armangedo ke ifwasa wantu awonso ko, kadi “ndong’ayingi” bena vo selo ya Nzambi bevuluka.—Lusengomono 7:9, 14; Nkunga 37:34.

Kanele vo Bibila kisadilanga e mvovo “nza” muna yika e ntoto, kansi ezak’ e ntangwa e mvovo wau uyikanga wantu ambi ana betelamenaga Nzambi. (1 Yoane 2:15-17) Muna mpila yayi e Armangedo ikala se ‘mbaninu a nza.’—Matai 24:3.

Nkia ntangwa e Armangedo ivangama? Vava Yesu kayika “mpasi zayingi” zisukila muna Armangedo, wavova vo: “Mu kuma kia lumbu kiakina ye ola, ke vena muntu ko ozeye kio, kana nkutu mbasi za zulu yovo Mwana, kansi Se kaka.” (Matai 24:21, 36) Kansi, Bibila kisonganga vo Armangedo iyantika muna ngiz’a ilembi moneka ya Yesu, ina yayantika muna mvu wa 1914.—Matai 24:37-39.