Finama Nzambi

Mfundisi On’ovanganga edi Diansongi

Etuku 18:22-32

UNSONGI ye fu kialembi sia mpambula. Nga kuyangalelanga fu yayi ko? Yeto wantu tuna ye luzolo lwa kingutukila lwa vava vo twavangwa edi diansongi. Diankenda kikilu vo unsongi ke una diaka ko mu nza yayi. Kansi, vena ye mfundisi ona tufwete bund’e vuvu, Yave wa Nzambi. Unsongi kevanganga ntangwa zawonso. Ediadi diatoma kieseswa muna moko kia Yave yo Abarayama, nze una tutanganga mun’Etuku 18:22-32.a

Vava Yave kavovesa ekani diandi kwa Abarayama mu kuma kia mavangu ma esi Sodomo ye Ngomora, Abarayama watokana kana vo Yave ofwasa mpe asongi ana bakala mo, kumosi ye Loti wa mwan’andi a nkazi. Abarayama wayuvula Yave vo: “Ng’ovempwel’asongi kumosi ye yimpumbulu e? Munkwa kala y’asongi makumatanu mun’evata; ng’ovempola yo lembi vûkisil’e fulu muna diambu dia makumatanu m’asongi mena mo e?” (Tini kia 23, 24) Nzambi wavova vo kefwasa ko e mbanza kele vo 50 m’asongi bena mo. Abarayama wakwamanana yuvula Nzambi nkumbu ntanu mu zaya kana vo ofwasa e mbanza kele vo ekumi dia wantu ansongi kaka bena mo. Muna nkumbu ntanu kayuvula Abarayama, Nzambi wamvovesa vo ovuluza e mbanza mu kuma kia asongi bena mo.

Nga Abarayama Nzambi katantana yandi? Ve! Kele vo i wau, nga diasonga vo kakala ye luzitu ko. Kansi, e zú dia ndinga kasadila Abarayama, diasonganga luzitu yo lembama kwandi. Yandi kibeni wakisakidika yo kibadikila nze “mbundukutu yo ntoto ampolo.” Kuna lembama kwawonso wasadilanga mvovo wau, “kumbakila makasi ko.” (Tini kia 27, 30-​32) Vana ntandu, e mvovo mia Abarayama miasonga vo wabundang’e vuvu muna unsongi wa Yave. Abarayama wakwikilanga vo Nzambi kalendi fwasa asongi kumosi ye yimpumbulu ko, kadi nkumbu miole kavova vo: “Kufwani dio vanga” ko. Abarayama wa nkwa kwikizi, wakala ye ziku vo ‘o Mfundisi a nza yawonso, ovang’owu wansongi.’​—⁠Tini kia 25.

Nga Abarayama ndungidi kakala yau mu dina kavova? Elo wakala ye ndungidi, kansi ke mu mawonso ko. Kakala ye ndungidi ko vava kayuvula mu kuma kia asongi muna Sodomo ye Ngomora. Kansi, wakala ye ndungidi vava kavova vo Nzambi kalendi ‘vempol’asongi kumosi ye yimpumbulu ko.’ Vava Nzambi kafwasa yimpumbulu muna mbanza, wavuluza Loti wa muntu ansongi ye wan’andi wole a makento muna lusadisu lwa mbasi.​—⁠2 Petelo 2:​7-9.

Adieyi tulongokele muna lusansu lwalu mu kuma kia Yave? Vava Yave kavovesa e nzengo Zandi kwa Abarayama mu kuma kia lufwasu lwa mbanza, edi kavavanga vo Abarayama kasonga e ngindu zandi. I bosi, wawunikina kuna luzindalalu lwawonso vava Abarayama wa nkundi andi kamvovesa dina diantokanesanga. (Yesaya 41:⁠8) Ekwe kiese kia zaya vo Yave, Nzambi a nsakaladi on’ovananga zitu kwa selo yandi ova ntoto! Kieleka, tuvwidi kuma yayingi mu bund’e vuvu kieto kwa Yave wa mfundisi on’ovanganga edi diansongi.

[Mvovo Vana Yand’a lukaya]

[Foto ina muna lukaya lwa 20]

Abarayama wadodokela Yave mu kuma kia Sodomo ye Ngomora