NTU A DIAMBU WA FUKWA | ADIEYI OLENDA VANGA AVO OFWIDILU?
Nga Diambi mu Mona Ntantu?
Nga wayela kala? Avo i wau, nanga mu nzaki wasasuka yo vilakana e mpasi wamona. Kansi, ke diau ko divangamanga avo ofwidilu. Dotolo dimosi, Alan Wolfelt wasoneka muna nkand’andi (Healing a Spouse’s Grieving Heart) vo: “Diampasi muna sunda e ntantu za fwilwa, kansi muna lusadisu lw’akaka e ntantu zilenda kuluka malembe-malembe.”
Muna bonga e nona, tala dina kavanga Abarayama wa selo kia Nzambi kuna nz’ankulu vava nkaz’andi kafwa. Nkand’a Nzambi uvovanga vo: ‘Abarayama [oyantikidi] dila Sara, yo kumbokomokena.’ O mvovo ‘oyantikidi,’ usonganga vo kolo kiayingi kadila.a E nona kiankaka i kia Yakobo ona wavunwa vo mwan’andi Yosefe bulu kiansisi kiandia. “Lumbu yayingi” kadila o mwan’andi, esi nzo andi ke balendanga kumfiaulwisa ko. Vioka mvu miayingi, Yakobo wamona e ntantu mu kuma kia lufwa lwa mwan’andi.—Etuku 23:2; 37:34, 35; 42:36; 45:28.
Abarayama wadila mu kuma kia lufwa lwa nkaz’andi Sara
Diau dimosi mpe divangamanga kwa awana bekendalalanga mu kuma kia lufwa lwa muntu bazolanga. Tala e nona ilende.
“Nkaz’ame Robert wafwa kina kia 9 kia ngonde a Yuli, 2008. E lumbu kiakina kiayantika nze lumbu yankaka. Vava twadia muna nsiuka, vitila kenda kuna salu twavovaziana vo ‘ikuzolanga, twabimbana, twafibana yo kanana.’ Se vioka mvu sambanu, yamu wau ikendalalanga mu kuma kia lufwa lwandi. E ntantu monanga mu kuma kia lufwa lwa Robert nanga ke zifokoka ko.”—Gail, 60 ma mvu kena miau.
“Kana una vo 18 dia mvu miviokele kala tuka nkaz’ame kafwila, yakinu kendalala. Konso ntangwa imonanga lekwa kiambote muna nsema, iyindulanga nkaz’ame yo kiyuvula kana vo aweyi kadi mona kele vo yandi mpe kamona kio.”—Etienne, 84 lwa mvu kena miau.
Kieleka, ke diambi kwandi ko mu kendalala kolo kiayingi mu kuma kia lufwa lwa muntu tuzolanga. Konso muntu una ye mpila andi kemwenanga e ntantu. Ozevo, ke diambote ko mu fundisa o muntu mu kuma kia ntantu kemonanga vava kebwilanga sumbula. Ke diambote mpe ko mu kuyitumba avo tukendalalanga kwayingi mu kuma kia lufwa lwa muntu tutoma zolanga. Aweyi tulenda sundila e ntantu?
a Isaki wa mwana Abarayama wakendalala mpe mu kolo kiayingi. Nze una usonganga e longi dina yo ntu diambu, “Tanginina Lukwikilu Lwandi,” Isaki wakwamanana kendalala mu kuma kia ngudi andi Sara ona wafwa se vioka mvu ntatu.—Etuku 24:67.