Nkia Mpila Muntu Yave Kena?

Aweyi oyindulwilanga Yave wa Nzambi? Nga obanzanga vo nkwa nkuma wayingi, kansi kwandá kena wauna e ntetembwa zinina kuna zulu? Yovo oyindulanga vo Yave ke muntu ko, kansi nkuma wankatu nze mwandazi? Ozevo, Yave nkia mpila muntu kena? E Bibila kiyikanga e yaka fu ya Nzambi, kivovanga mpe vo Yave mfunu kekuvuanga.

1. Ekuma ke tumwenanga Nzambi ko?

“Nzambi i Mwanda.” (Yoane 4:24) Yave kena ye nitu a kinsuni ko nze i yeto. Yandi i mwanda ona ozingilanga kuna zulu, kina vo i fulu ke tulendi mona ko.

2. Nkia fu Yave kena yau?

Dialudi vo ke tulendi mona Yave ko. Kansi vava tulongokanga mayingi mu kuma kiandi, tubakulanga vo Yave muntu akieleka ye una ye fu yambote. Bibila kivovanga vo: “Yave ozolanga unsongi, ke yambula minkwikizi miandi ko.” (Nkunga 37:28) Nzambi mpe “nkwa walakazi wayingi ye nkenda,” musungula kwa awana bemonanga e mpasi. (Yakobo 5:11) ‘Yave ofinamanga awana bawudika e ntima; ovuluzanga awana bakendalala.’ (Nkunga 34:18, mvovo vana yand’a lukaya) Nga ozeye wo vo mana tuvanganga malenda yangidika yovo kendeleka Yave? Konso ndiona obakanga nzengo za vanga mambu mambi, Yave kekendelekanga. (Nkunga 78:40, 41) Kansi, ndiona ovanganga mambu mambote, okumwesanga e kiese.—Tanga Ngana 27:11.

3. Aweyi Yave kesongelanga vo okutuzolanga?

E Fu kia Yave kisundidi i zola. Kieleka, “Nzambi i zola.” (1 Yoane 4:8) Tulenda mona zola kwa Yave muna mambu tutanganga muna Bibila ye muna lekwa ina kavanga. (Tanga Mavangu 14:17.) Yindula e mpila katuvangila. Watuvanga ye ngangu za mona se yambote-mbote, yangalela wá miziki ye dia madia mambote. Ozolele vo twakala ye zingu kiakiese.

ZAYA DIAKA MANKAKA

4. Mwand’avelela i nkum’a Nzambi

Nze una tusadilanga moko muna sala e salu, Yave osadilanga mwand’andi avelela. Wantu ankaka bevovanga vo mwand’avelela muntu, kansi Bibila kivovanga vo mwand’avelela i nkum’a Nzambi kesadilanga muna vanga konso kina kazolele. Tanga Luka 11:13 ye Mavangu 2:17, i bosi, vana e mvutu za yuvu eyi:

• Bibila kivovanga vo Nzambi ‘obungula mwand’andi’, kw’awana bekunlomba wo. Ozevo, muna ngindu zaku, mwand’avelela muntu yovo nkum’a Nzambi? Ekuma ovovele wo?

Yave osadilanga mwand’andi avelela mu lungisa mambu mamfunu. Tanga Nkunga 33:6 ye 2 Petelo 1:20, 21, i bosi vana e mvutu za kiuvu eki:

• Mu nkia mpila Yave kasadila kala mwand’andi avelela?

5. Yave fu yambote kena yau

Mose selo kia kwikizi kia Nzambi kakala. Kanele vo i wau, wakala ye luzolo lwatoma zaya Mvangi andi. Muna kuma kiaki, Mose wavova kwa Yave vo: “Unzayisa e nzila zaku, kimana yazaya.” (Luvaiku 33:13) Dianu vo, Yave wazayisa kwa Mose e yaka fu yandi. Tanga Luvaiku 34:4-6, i bosi, vana e mvutu za yuvu eyi:

• Nkia fu ya Yave Mose kalongoka?

• Nkia fu ya Yave otoma yangalelanga?

6. Yave ovuanga wantu o mfunu

Ayibere, nkangu a Nzambi bakala ye bakituka se abundu kuna Engipito. Aweyi Yave kamonanga vava nkangu andi wamweswanga e mpasi? Sika e AUDIO landa e ntangilu yovo tanga Luvaiku 3:1-10. i bosi, vana e mvutu za yuvu ilende.

AUDIO: Yave Wamonanga e Mpasi Zau (2:45)

• Aweyi Yave kemonanga vava wantu bemonanga e mpasi?—Tala e tini kia 7 ye 8.

• Adieyi obenze, nga Yave una kieleka yo luzolo lwa sadisa wantu? Nga una ye nkuma wa vanga wo? Ekuma ovovele wo?

7. O nsema ukutulonganga e fu ya Yave

Tulenda longoka e fu ya Yave muna talanga e lekwa kavanga. Tala e VIDEO. I bosi, tanga Roma 1:20 yo vana e mvutu za kiuvu kilende.

VIDEO: O Nsema Usonganga o Zola kwa Yave—Nitu a Muntu (1:57)

• Nkia fu ya Yave omonanga muna lekwa kavanga?

MAMBU MASINA MA LONGI DIADI

Ke tulendi mona Yave ko kadi yandi Mwanda. Una ye fu yayingi, kansi o zola i fu kiandi kisundidi.

Nkia Mambu Olongokele?

• Ekuma ke tulendi mwena Yave ko?

• Nki i mwand’avelela?

• Ayeyi i yaka fu ya Yave?

TALA MPE OMA MALENDE

Yave ovuidi fu yá eyi isundidi. Zaya mayingi mu kuma kia fu yayi mu longi diadi.

“Nzambi Nkia Mpil’a Muntu Kena?” (Eyingidilu No. 1 2019)

Tala ziku isonganga vo Yave kena mu fulu yawonso ko.

“Nga Nzambi una Muna Fulu Yawonso?” (Longi dina muna jw.org)

Tala e kuma Bibila kitezanesenanga mwand’avelela ye moko ma Nzambi.

“Nki i Mwand’avelela?” (Longi dina muna jw.org)

Muntu mosi wafwa meso wamonanga vo diampasi mu kwikila vo Nzambi mfunu kamvuanga. Tala una kasobela ngindu zandi.

“Owau Ndenda Sadisa Akaka” (Eyingidilu dia 1 dia Okutoba, 2015)