Nani i Nkw’ame?

 4. Muna Fuka kapu kia 19, Ayuda kwa nani bafwana songa o zola?

⁴ Vava kavovesa Afarisi vo e nkanikinu wanene una wezole, i zola nkw’aku konso un’okuzolela, o Yesu nsiku wavewa kwa Aneyisaele kayika, wasonama muna Fuka 19:18. Muna Fuka 19:​34, Ayuda bavoveswa vo bazola e nzenza zakala vo ke Aneyisaele ko. Tutanganga vo: ‘O nzenza on’okunangina okala nga mungutukila, okunzola konso un’okuzolela: kadi nzenza nwakala muna Engipito: mono i Yave wa Nzambi eno.’ Muna kuma kiaki, kana nkutu awana ke bakala Ayuda ko, musungula minkwikila a kiyuda, bafwana songwa o zola.

O Zola Nkw’eto Aweyi Disongele?

 8. E Fuka kapu kia 19, aweyi kivovanga mu kuma kia mpila tufwete songela o zola?

⁸ Nze una tuzolelanga Nzambi, o zola nkw’eto ke mpasi ngindu kaka ko; kansi tufwete wo songela muna mavangu. Diamfunu twabadika e tini yakaka iyikanga nkanikinu ina muna Fuka 19, ina yilonganga nkangu a Nzambi vo bazola o nkw’au nze yau kibeni. Muna sono kiokio tutanganga vo Aneyisaele bafwana yambula asukami ye nzenza babaka e mbongo muna mpatu zau. Ke bakala ye kuma kia yiya ko yovo vuna ngatu vunginika akaka. Aneyisaele ke bafwana sia mpambula ko muna diambu dia fundisa. Kana una vo basembanga akaka, bavoveswa vo “kusawila mpangi aku omo ntima ko.” E nkanikinu miami ye miakaka mpe milenda kufikwa mu mvovo wau: “Ozola nkw’aku konso una okuzolela.”​—⁠Fuka 19:​9-11, 15, 17, 18.

 9. Ekuma Yave kakanikina Aneyisaele mu vambuka e zula yakaka?

⁹ Kana una vo Aneyisaele bafwana songa o zola kw’akaka, bafwete mpe kuyivaula y’awana basambilanga nzambi zaluvunu. Yave wabalukisa mu kuma kia vonza ye mfwilu kilenda twasa kikundi kiambi. Kasikil’owu, muna kuma kia zula ina badi yalula Aneyisaele, Yave wakanikina vo: “Ke nusompaziana yau ko; o mwan’aku ankento kuvani kwa mwan’andi eyakala ko, ngatu bonga mwan’andi ankento kwa mwan’aku eyakala. Kadi ovilula mwan’aku muna kundanda, basadila nzambi zakaka; i mfusukila mekunufusukil’o makasi ma Yave.”​—⁠Nsiku 7:​3, 4.