Nga Tulenda Kieleka Yangidika Nzambi?

Nkand’a Nzambi uyikilanga Yobi vo “nkwa ziku yo unsongi.” (Yobi 1:1) O Loti wayikilwa vo “nsongi a muntu.” (2 Petelo 2:8) Davidi wayikilwa vo wavanga “owu wasonga” vana meso ma Nzambi. (1 Ntinu 14:8) Kansi, yambula twatoma fimpa e zingu ya wantu awaya. Muna lufimpu lwalu tubakula vo (1) vilwa bavanga, (2) tulenda longoka mayingi muna mbandu au, (3) wantu alembi lunga balenda kwau yangidika Nzambi.

Yobi wanwana ye mpasi zayingi zamonekenanga vo zakondwa kuma. Wayima ngindu zabendomoka, wayindulanga vo kana nkutu osikidi ye kwikizi, Nzambi ke kumvuanga mfunu ko. (Yobi 9:20-22) Yobi wayilungisa, muna mpila yayi wasonga vo o unsongi wandi wasunda unsongi wa Nzambi.—Yobi 32:1, 2; 35:1, 2.

Loti wakatikisa mu baka e nzengo zakala vo ke zampasi ko. Wakendalalanga mu kuma kia mavangu ma zumba mavangwanga muna mbanza Sodomo ye Ngomora, mavangu mama ‘mabangikanga o moyo andi ansongi.’ (2 Petelo 2:8) Nzambi wazayisa vo ofwasa e mbanza zazi, kansi wavana Loti e lau dia vuluka kumosi ye esi nzo andi. Nanga olenda yindula vo Loti i muntu antete wadi vayika muna mbanza. Vana fulu kia vayika mu nzaki, Loti wazingila. E mbasi zasimba Loti muna koko kumosi ye esi nzo andi yo kubavaikisa kuna mbazi a mbanza kimana bavuluka.—Etuku 19:15, 16.

Lumbu kimosi, Davidi kasonga volo ko, watá zumba yo nkento angani. Muna vava sweka e mbi andi, wavondesa o yakala dia nkento ndioyo. (2 Samuele, kapu kia 11) Nkand’a Nzambi uvovanga vo “e diambu kavang’o Davidi diayiva muna meso ma Yave.”—2 Samuele 11:27.

Yobi, Loti yo Davidi vilwa bavanga, o waka vilwa bavanga wampwena kikilu. Kansi, nze una tumona, bakala yo luzolo lwa sadila Nzambi ye nsi a ntima wawonso yo kunlemvokela. Bakendalala mu kuma kia bi wau yo singika konso diambu diavuanga o mfunu. Muna kuma kiaki, Nzambi wabasonga e dienga, nkumbu miayingi Nkand’a Nzambi ukubayikilanga vo akwa kwikizi.

Wau vo tu asumuki, ke tulendi venga vilwa ko. (Roma 3:23) Kansi avo tuvangidi vilwa, tufwete viluka ntima yo vanga dina tulenda mu singika wo.

Yobi, Loti yo Davidi, aweyi basingikila o vilwa wau? Muna nsi a ntima, Yobi nkwa kwikizi kakala. Vava Nzambi kamokena yandi, Yobi wasingika ngindu zandi zambi yo kuyibanza mu kuma kia mana kavova. (Yobi 42:6) E ngindu za Loti mu kuma kia mavangu mambi ma esi Sodomo ye Ngomora ngwizani zakala ye nkanikinu mia Nzambi. O lembi vaika mu nswalu i vilwa kavanga. Kuna kwalanda, Loti wakatuka muna mbanza zatumbwa yo vuluka muna mfundisa a Nzambi. Kuna lemvo wawonso, Loti katala kunima ko mu kuma kia ina kasisa. Kanele vo Davidi wavanga vilwa wampwena muna kulula nsiku a Nzambi, wasonga dina diakala kikilu muna ntim’andi muna waviluka o ntima yo lomba ndoloki kwa Nzambi.—Nkunga 51.

E mpila ina Yave kasongela e dienga kwa wantu awaya, isonganga vo kevavanga mayingi ko kwa wantu alembi lunga. Nzambi ‘otomene zaya una twavangilwa; osungamenanga vo tu ntoto.’ (Nkunga 103:14) Wau vo Nzambi ozeye wo vo ke tulendi venga vilwa ko, adieyi kevavanga oku kwa yeto?

E longi dia Davidi kwa mwan’andi Solomo disonganga una tulenda yangidikila Nzambi. Wavova vo: ‘O ngeye Solomo wa mwan’ame, zaya Nzambi wa se diaku, unsadila yo ntim’asikila.’ (1 Tusansu 28:9) Nki i ntim’asikila? I ntima uzolanga Nzambi, zaya yo vanga luzolo lwandi. Ke ntima alunga ko, kansi ntima una yo luzolo lwa lemvokela Nzambi yo tambulwila e longi. Muna kuma kia zola yo nlemvo wau muna Nzambi, Yobi oyikilwanga vo “nkwa ziku,” Loti vo “nsongi,” vo i Davidi ‘wavanga kaka owu wansongi’ vana meso ma Nzambi. Kana una vo bavanga vilwa, bayangidika Nzambi.

Avo ngindu zambi zitulwakidi, vilwa tuvangidi yovo diambu tuvovele lembi wo kana, tulenda vua lukasakeso muna nona tufimpidi. Nzambi ozeye wo vo tu wantu alembi lunga. Kana una vo i wau, ovavanga vo twanzola yo kunlemvokela. Avo tukala yo ntim’asikila muna mambu mama, tukala ye ziku vo tuyangidika Nzambi.