LONGI DIA 15
Nani i Yesu?
Yesu i muntu otomene zayakana muna lusansu lwa wantu. Wantu ayingi bazeye nkumbu a Yesu, kansi ke bazeye mayingi ko mu kuma kiandi. Ayingi mpe bena ye ngindu zaswaswana mu diambu ditadidi Yesu, kana nani kikilu kena. Adieyi Bibila kivovanga mu kuma kia Yesu?
1. Nani i Yesu?
Yesu i mbasi osundidi o nkuma kuna zulu. Yave wa Nzambi wamvanga vitila kavanga lekwa yawonso. Ekiaki i kuma keyikilwanga vo “mwan’antete muna nsema wawonso.” (Kolosai 1:15) E Bibila kiyikilanga Yesu vo ‘Mwana mosi kaka’ a Nzambi, kadi Yave yandi kibeni wasema Yesu. (Yoane 3:16) Yesu wasadisa Yave wa Se diandi mu vanga lekwa yankaka. (Tanga Ngana 8:30.) Yamu wau, Yesu una ye kiese kiakala ye ngwizani ambote yo Yave. Ye kwikizi kiawonso, Yesu osalanga se nati a nsangu za Nzambi, kadi nsangu ye tuludiku twa Nzambi kesamunanga. Ekiaki i kuma keyikilwanga vo “Diambu.”—Yoane 1:14.
2. Ekuma Yesu kayizila ova ntoto?
Vioka 2000 ma mvu, tuka Yave kasadila mwand’andi avelela mu fila moyo a Yesu tuka kuna zulu yamuna vumu kia mwenze ona wakala ye nkumbu Maria. Muna mpila yayi, Yesu wawutuka se muntu. (Tanga Luka 1:34, 35.) Yave watuma Yesu ova ntoto kakala Masia yovo Kristu ona wasilwa o nsilu yo vuluza wantu.a Ungunza wawonso wa Bibila wavovelanga Masia walungana muna yandi, ediadi diasadisa wantu mu zaya vo Yesu i “Kristu, wa Mwan’a Nzambi amoyo.”—Matai 16:16.
3. Akweyi Yesu kena owau?
Vava Yesu kafwa, Nzambi wamfutumuna se mbasi yo vutuka kuna zulu. I bosi, “Nzambi wantundidika yo kumvana fulu kisundidi.” (Filipi 2:9) Owau, Yesu i mbasi osundidi o nkuma. Yave kaka osundidi Yesu muna nkuma.
ZAYA DIAKA MANKAKA
Zaya kana nani kieleka i Yesu ye kuma dinina diamfunu mu toma kunzaya.
4. Yesu ke Nzambi Mpungu-ngolo ko
Bibila kilonganga vo Yesu i mbasi a nkuma kuna zulu. Kana una vo i wau, olemvokelanga Yave wa Nzambi andi ye Se diandi. Ekuma tuvovele wo? Tala e VIDEO mu zaya e nswaswani ina vana vena Yesu yo Nzambi wa Mpungu-ngolo.
E sono ilende ikutusadisa mu bakula e nswaswani ina vana vena Yave yo Yesu. Tanga konso sono, i bosi, vana e mvutu za yuvu ilende.
Tanga Luka 1:30-32.
Mana mbasi kavova, aweyi mesongelanga vo Yesu yo Yave wa Nzambi a “Mpungu-ngolo” baswaswana?
Tanga Matai 3:16, 17.
Vava Yesu kavubwa, e ndinga yatuka kuna zulu adieyi yavova?
E ndinga yayina ya nani?
Tanga Yoane 14:28.
Muna nzo, nani i mbuta ye nani osundidi e wisa, se yovo mwana?
Yesu wayikila Yave vo Se diandi, ediadi adieyi ditulongele?
Tanga Yoane 12:49.
Nga Yesu oyindulanga vo yandi yo Se diandi muntu mosi bena? Azeyi i ngindu zaku muna diambu diadi?
5. Nkia mambu mesonganga vo Yesu i Masia?
Bibila kiyikanga ungunza wayingi wasadisa wantu mu zaya Masia, ona wasolwa kwa Nzambi muna vuluza wantu. Tala e VIDEO mu zaya ungunza walungana muna Yesu vava kayiza ova ntoto.
Tanga ungunza wau wa Bibila, i bosi, vana e mvutu za yuvu ilende:
Tanga Mika 5:2 mu zaya e mbanza ina Masia kawutukila.b
Nga luwutuku lwa Yesu lwalungisa ungunza wau?—Matai 2:1.
Tanga Nkunga 34:20 ye Zakariya 12:10 mu zaya mana masakulwa muna Bibila mu kuma kia lufwa lwa Masia.
Nga ungunza wau walungana kikilu?—Yoane 19:33-37.
Nga obenze vo Yesu diambu kavanga kimana ungunza wau walungana?
Ediadi adieyi dilongele mu kuma kia Yesu?
6. Olongoka mambu matadidi Yesu dilenda kututwasila nluta
Bibila kisonganga o mfunu walongoka mambu matadidi Yesu ye mana Nzambi kazolele vo Yesu kavanga. Tanga Yoane 14:6 ye 17:3, i bosi vana e mvutu za kiuvu eki:
Ekuma dinina o mfunu mu longoka mambu matadidi Yesu?
Yesu waziula e nzila kimana twakala akundi a Nzambi. Walonga e ludi mu kuma kia Yave. Muna nzil’a Yesu tulenda vuila moyo a mvu ya mvu
AVO MUNTU UVOVESE VO: “Mbangi za Yave ke bekwikilanga mu Yesu ko.”
Nkia mvutu okumvana?
MAMBU MASINA MA LONGI DIADI
Yesu i mbasi osundidi o nkuma. Yandi i Masia ye Mwan’a Nzambi.
Nkia Mambu Olongokele?
Ekuma Yesu keyikilwanga vo “mwan’antete muna nsema wawonso”?
Vitila Yesu keza ova ntoto, nkia salu kasalanga?
Aweyi tuzayidi wo vo Yesu i Masia?
TALA MPE OMA MALENDE
Zaya diaka mambu mankaka mesonganga vo Yesu i Masia.
“Nga Ungunza wa Bibila Usonganga vo Yesu i Masia?” (Longi dina muna jw.org)
Tanga muna Bibila mu zaya mu nkia mpila Nzambi kenena Se dia Yesu.
“Ekuma Yesu Keyikilwanga vo Mwan’a Nzambi?” (Longi dina muna jw.org)
Tala e kuma e longi dia Nzambi mu Ntatu ke dinina muna Bibila ko.
Zaya una e zingu kia nkento mosi wa Nyuda kiasobela vava kalongoka dina Bibila kilonganga mu kuma kia Yesu.
“Uma Judia Explica por que Reavaliou sua Fé” (Sikama! Mayu 2013)
a Muna longi dia 26 ye 27, tulongoka e kuma wantu bavuididi luvuluzu o mfunu ye una Yesu katuvuluzila.
b Tala Mvovo Misasilu 2 mu zaya ungunza wasakula e ntangwa o Yesu kadi moneka ova ntoto.