LONGI DIA 53

Aweyi Olenda Solela e Nsaka Ziyangidikanga Yave?

Wa Nieteka

Yave i “Nzambi a kiese.” (1 Timoteo 1:11) Ozolele vo twakala ye kiese muna zingu. Oyangalalanga vava tuvaulanga e ntangwa mu vunda. Mu longi diadi, tuzaya una tulenda sadila e ntangw’eto ya vunda mu mpila yambote ilenda yangidika Yave.

1. Nkia diambu tufwete sungamenanga vava tusolanga e nsaka?

Nkia mambu oyangalelanga vanga muna ntangw’a vunda? Akaka bezolanga kala muna nzo yo tanga nkanda, wá miziki, tala filme yovo vavulula muna internete. Vo i ankaka, bezolanga kwenda kangala ye akundi, siensia (tá mansa) yovo bula bale. Konso nsaka tusola, tufwete vanga mawonso kimana nsaka zozo ‘zayangidika Mfumu.’ (Efeso 5:10) Diamfunu twatoma bakula diambu diadi, kadi nsaka zayingi ziyangalelwanga o unu, zazala ye mambu o Yave kemenganga nze nsoki, mavangu ma zumba yovo ma mpandu. (Tanga Nkunga 11:5.) Adieyi dikutusadisa mu sola nsaka zambote?

Avo tusolele akundi ana bezolanga Yave, bekala se mbandu ambote kwa yeto yo kutusadisa mu sola nsaka zambote. Nze una twalongokele muna longi dia 48, “ndiona okangalanga ye nkwa ngangu okala ye ngangu.” Kansi, avo tuvangidi kikundi yo wantu ana ke bezolanga nkanikinu mia Nzambi ko, ‘mpasi tumona.’—Ngana 13:20.

2. Ekuma dinina diamfunu mu kala ye tezo muna ntangwa tuviokesanga muna nsaka?

Kana nkutu vo e nsaka tusolele zambote, tufwete kalanga ye tezo muna ntangwa tuviokesanga. Avo ke wau ko, tulenda fwasa ntangwa yayingi ina tulenda sadila muna mambu masundidi o mfunu. Bibila kikutukasakesanga vo ‘twatoma sadilanga e ntangw’eto.’—Tanga Efeso 5:15, 16.

ZAYA DIAKA MANKAKA

Tala una olenda bakila nzengo zambote mu diambu ditadidi nsaka.

3. Venga nsaka zambi

Ekuma tufwete toma solelanga e nsaka zeto? Tala e VIDEO, i bosi, vana e mvutu za yuvu ilende.

VIDEO: Nkia Mpila Nsaka Mfwete Sola? (4:39)

Aweyi e nsaka za lumbu yeto zifwananene ye nsaka zankaka o wantu basakananga kuna Roma?
Nze una omwene muna video, nkia diambu Danny kalongoka mu diambu ditadidi nsaka?

Tanga Roma 12:9, i bosi, vana e mvutu za kiuvu eki:

Aweyi e sono kiaki kilenda kusadisila mu sola nsaka zambote?

Nkia maka mambu Yave kemenganga? Tanga Ngana 6:16, 17 ye Ngalatia 5:19-21. Vava otanga konso sono, vana e mvutu za kiuvu eki:

Nkia mambu mayikilu mu sono yayi metoma monekanga muna nsaka za lumbu yeto?

Yuvu ilenda kusadisa mu sola nsaka zambote

Ukiyuvula:

Nga nsaka zazi zina ye mambu mana Yave kemenganga?
Nga nsaka zazi, ntangwa yayingi zikundia ina ndenda sadila mu mambu masundidi o mfunu?
Nga nsaka zazi, zikumfila mu vanga kikundi yo wantu ke bezolanga Yave ko?

Diambote twavanganga mawonso mu venga konso vonza. Avo lukatikisu tuna lwau mu kuma kia nsaka tuzolele sakana, diambote twavenga zo

Kalu diviokelanga vana ndambu a yenga. E pine dianima dikatukidi muna nzila.

4. Toma sadila e ntangw’aku

Tala e VIDEO, i bosi, vana e mvutu za kiuvu kilende.

VIDEO: Nkia Mambu Mekudianga e Ntangwa? (2:45)

Nze una omwene muna video, mpangi katalanga mambu mambi ko. Kansi, nkia mfwilu kabaka muna lembi kala ye tezo?

Tanga Filipi 1:10, i bosi, vana e mvutu za kiuvu eki:

E sono kiaki, aweyi kilenda kutusadisila mu zaya e tezo kia ntangwa tuviokesa muna nsaka?

5. Sola nsaka zambote

Kanele vo e nsaka zankaka ke ziyangidikanga Yave ko, vena ye mambu mayingi mambote tulenda vanga. Tanga Kimpovi 8:15 ye Filipi 4:8, i bosi, vana e mvutu za kiuvu kilende:

Nkia mpila nsaka oyangalelanga?

Fwaniswa: Wantu a ntela za mpila mu mpila besakananga nsaka zambote. 1. Mwan’a ndumba owanga miziki yo bandula fwaniswa. 2. Aleke tatu bebulanga basquete. 3. Aleke wole bekangalanga muna mvelo. 4. Nleke ovanganga kalu. 5. Muntu osikanga ngoma. 6. Nleke obulanga video game yo se diandi. 7. Nkento okatulanga mafoto. — Olenda sola yo yangalela nsaka zambote

AVO MUNTU UVOVESE VO: “Ke diambi kwandi ko mu tanga nkanda yovo tala filme zisonganga nsoki, mavangu ma zumba yovo mpandu wau vo kivanganga mo kwame ko.”