Badikanga oma Kevanganga Yave mu Kuma Kiaku

KE VAVIOKA kolo ko vava Yesu kafulwa, awole mun’alongoki andi bavanga nkangalu tuka kuna Yerusaleme yakuna Emau. Lusansu lwa Luka lusonganga vo: “Wau bamokenanga yo yuvuziana, o Yesu yandi kibeni ofinamene, wele yau. Kansi meso mau mavilakeswa, ke bakuntonena.” I bosi, Yesu wabavovesa vo: “Nkia mambu mama numokenena wau nukwenda? Badingalele, bayindalele.” Ekuma bayindalela? Edi bayindulanga alongoki vo Yesu mu ntangwa yayina kevevola Isaele muna luyalu lwa Esi Zula. Kansi luvevoko lwalu ke lwayiza ko. Vana ntandu, o Yesu wavondwa. Ekiaki i kuma bakendalela.—Luka 24:15-21; Mav. 1:6.

Yesu wayantika mokena y’alongoki andi. Tutanganga vo: “Tuka muna Mose, yo muna ngunza zawonso, osimbidi kubabâkila muna sono yawonso o mambu mena muna yandi.” Kieleka, mambu mayingi mamfunu mavangama vava Yesu kasalanga salu kiandi ova ntoto. Ekolo alongoki bawanga e mvovo mia Yesu, e nkenda bakala zau zafokoka, bayantika mona kiese. Muna lumbu kialanda, bavova vo: “Nga mioyo mieto ke mizinininge ko, una kakutumokesenge muna nzila, yo kututendwel’e sono?” (Luka 24:27, 32) Adieyi tulenda longoka mun’evangu dia alongoki a Yesu?

Vuvu Kilembi Lungananga Aweyi Kilenda Vanga Muna Yeto?

Alongoki awole bayendanga kuna mbanza Emau bakendalala wau vo e vuvu bakala kiau ke kialungana ko. Bamona e ziku kia dina diasonama muna Ngana 13:12, oku vo: “E vuvu kikululwa, ntima kiyelesa.” Diau adimosi, akaka muna yeto besadilanga Yave se mvu miayingi, bebanzanga vo e ‘mpasi zayingi’ zifwete kwiza kala. (Mat. 24:21; Lus. 7:14) Dialudi vo e vuvu kilembi lungananga, kilenda kubakendeleka.

Kansi, sungamena vo alongoki wole awaya bavutukila e kiese kiau vava Yesu kabasadisa mu badika ungunza una walungana kala. Wakaka muna ungunza wau walungana muna zingu kiau. Oyeto mpe tulenda si’e ngolo mu lembi vidisa kiese kieto yo sunda lukendalalu. Nkuluntu mosi wa Nkristu una ye nkumbu vo Michael, wavova vo: “Ka tusienge sungididi ko mu dina Yave kavangidi ko. Kansi, tufwete badikanga oma kevanganga.” Elo, ediadi elongi diamfunu kikilu.

Oma Kevanganga o Yave

Badika maka mambu mamfunu kalungisi kala o Yave. Yesu wavova vo: “On’okwikil’omu mono, o mavangu mvanga, oyandi mpe ovanga mo; mana masundidi i kevanga.” (Yoa. 14:12) O unu, selo ya Nzambi bevanganga mambu mayingi, oma ke masidi vangama ko muna lusansu lw’Akristu. Vioka mazunda nsambwadi ma mazunda ma wantu bena ye vuvu kia sala yo moyo muna mpasi zayingi. Yindula edi: O unu, lutila tandu yakaka, vena ye selo yayingi ya Yave bekuyivananga ye kwikizi kiawonso muna salu kiandi mu nsi zayingi ova nza. Elo, Yave osadisanga selo yandi mu ‘vanga mana masundidi oma’ kavanga o Yesu nze una yandi kibeni kavova.

Adieyi diaka kevanganga o Yave mu kuma kieto? Oziulanga nzila kimana akwa ntima miambote bavaika mu nza yambi yo kota muna Paradiso ya mwanda ina kakubika. (2 Kor. 12:1-4) Vaula ntangwa mu badika e nsambu tulenda vwa muna paradiso yayi. Muna bong’e nona, tala mun’elundilu diaku dia nkanda yovo edi dina mun’Eseka dia Kintinu. Olenda ziula Índice das Publicações da Torre de Vigia yovo muna Biblioteca da Torre de Vigia. Vanga luzolo lwa wunikina e CD yovo Cassete yabandulwa fukwa kia Nkand’a Nzambi. Teza yindula mana wawa yo mona mu lukutakanu lwa mvivu lwaviokele. Vana ntandu, yindula mpe kikundi tuna kiau ye mpangi zeto z’akala ye z’akento. Yave osonganga kikilu vo mvani amvevo mu kutuvana ulolo wa madia ma mwanda ye mpangi zanzolwa. Kieleka, mu paradiso ya mwanda kikilu twina.

Davidi wa ntozi a nkunga wavova vo: “Owokesa mo, ongeye Yave wa Nzambi ame, o masivi maku ye ngindu zaku oku twina.” (Nku. 40:5) Elo, avo tubadika mambu mambote kevanganga o Yave mu kuma kieto, yo yindula e ngindu zambote kena zau muna yeto, tukala yo nkuma wa zindalala ye kwikizi kiawonso muna salu kia Yave w’Es’eto ezulu.—Mat. 24:13.

[Foto ina muna lukaya lwa 31]

Yesu wasadisa alongoki andi babadikanga oma kavangidi kala o Yave mu kuma kiau

[Mafoto zina muna lukaya lwa 32]

Yindula mana wawá yo mona mu lukutakanu lwa mvivu lwaviokele