Kuyitumba “Umpelelesa Mun’esumu Diame”

E FU kia kuyitumba kilenda kutukosomona. Davidi wa Ntinu wasoneka vo: O “bi wame wampiokele e ntela; nze enatu diezitu wansundidi e zitu.” (Nkunga 38:4) Akristu akaka besundwanga kwa ntantu zasaka yo yindula vo Yave kalendi kubaloloka ko. (2 Korinto 2:7) Nga e ngindu zazi zansongi? Kana nkutu vo sumu diampwena wavola, nga Yave wavavuka kikilu ye kalendi kuloloka ko? Ve, Yave kavavuka ko!

Yave ke bembolanga asumuki ko ana bevilukanga o ntima. Kansi okubavavanga. Muna kingana kia mwan’a nkolami, Yesu watezanesa Yave yo se dia nzodi ona wakala yo mwana wabembola esi nzo andi yo kuyisia muna zingu kia umpumbulu. Kuna kwalanda, o mwana wabaka e nzengo za vutuka ku nzo. “Wau [mwana] kakedi o vala, o s’andi umwene, umfwidi nkenda, olundumukini, umbimbakene muna nsingu, umfibulwidi.” (Luka 15:11-20) Nga una ye tima dia finama Yave kansi oyindulanga vo “vala” wina yo yandi? Nze se oyikilu muna kingana kia Yesu, Yave okusonga walakazi yo kufwila e nkenda. Ozolele vo wavutuka kwa yandi.

Kansi, adieyi tuvova avo obanzanga vo masumu maku masundidi yo yindula vo Yave kalendi kuloloka ko? Dodokolo diaku, badika e mbok’a Yave yasonama muna Yesaya 1:18: “Nwiz’owau, twabalulaziana, i kavovele o Yave; o masumu meno kana mabwaka, mepemba nze mvul’ampembe.” Elo, kana nkutu masumu mana memonekanga nze tona dia mbwaki muna nlele ampembe, Yave ololoka mo.

Yave kazolele ko vo wakwamanana mona e mpasi mu kuma kia ntona zayiva. Aweyi olenda tambulwila luvevoko lutukanga muna luloloko lwa Nzambi yo kala ye ntona zavelela? Badika mambu mole kavanga Davidi wa Ntinu. Diantete, wavova vo: ‘Ifunguna masumu mame kwa Yave.’ (Nkunga 32:5) Sungamena dio vo Yave okubokelanga wamfinama muna sambu yo singika mambu yo yandi. Tambulwila e mboka yayi. Funguna masumu maku kwa Yave, ziula o ntim’aku kwa yandi. Mu kuna kia mana mambwila muna zingu kiandi, Davidi wasamba ye ziku kiawonso vo: “Umpelelesa mun’esumu diame . . . o ntim’abudika yo kosomoka, e Nzambi, kuveza wo ko.”—Nkunga 51:2, 17.

Diazole, Davidi watambula lusadisu lwa tuka kwa Nzambi muna nzil’a Natani wa ngunza. (2 Samuele 12:13) O unu, Yave osadilanga akuluntu muna nkutakani ana betoma longwanga kimana basadisanga awana bevilukanga o ntima mu vutulwisa e ngwizani au yo Yave. Vava omokena ye akuluntu, oyau besadila Nkand’a Nzambi yo samba ye ziku kiawonso kimana wavelelesa o ntima yo katula konso ngindu zalembi songa yo kusadisa wayeloka muna mwanda.—Yakobo 5:14-16.

Dialudi, olenda mona vo o funguna masumu maku kwa Yave wa Nzambi yo mokena ye akuluntu i dimosi muna mambu masundidi e mpasi olenda vanga. Davidi mpe wakala ye ngindu zazi. Vakala ye ntangwa ina ‘kabutama’ mu kuma kia masumu mandi. (Nkunga 32:3) I bosi, wayangalela nluta katambula muna funguna masumu mandi yo singika e mpil’a zingu kiandi.

E diambu diasunda o mfunu kwa Davidi, i vutukila e kiese kiandi. Wasoneka vo: “Nkwa nsambu on’oyambulwilu ekuzuka, on’ofukilu esumu.” (Nkunga 32:1) Wasamba mpe vo: “E [Yave], batuna befo yame; o nu’ame wateleka nkembelelw’aku.” (Nkunga 51:15) O vevoka muna fu kia kuyitumba yo lolokwa kwa Nzambi, diafila Davidi mu zayisa kwa akaka oma ma Yave.

Yave ozolele vo ongeye mpe wabaka nluta mia kala ye ntona zavelela. Ozolele vo wazayisanga kwa akaka oma ma yandi ye makani mandi ke mu kuyitumba ko, kansi muna ntim’avelela ye kiese. (Nkunga 65:1-4) Sungamena e mboka kekutuvananga, ‘o masumu meno mevunzunwa, kimana iza nsungi ya mvutulu a moyo, ituka kwa Yave.’—Mavangu 3:19.

Ediadi i diau diavangama kwa Martha. Wavova vo: “O mwan’ame wantwikilanga Eyingidilu ye Despertai!. Malembe-malembe, yayantika vutulwisa e ngwizani ame yo Yave. E diambu diasunda e mpasi muna vutuka, i lomba e ndoloki muna masumu mawonso yavola. Kansi, kuna kwalanda yafinama Nzambi muna sambu yo kunlomba e ndoloki. Diampasi mu kwikila vo mvu 40 yakala ku mbazi a nkutakani i bosi yavutuka kwa Yave. E nona kiame kisonganga vo kana nkutu vo muntu mvu miayingi kayivambula ye nkutakani, olenda kala ye lau dia vutukila sadila Nzambi yo tambula o zola kwandi.”