Vuanga Nluta Muna Nkubika Zawonso za Yave

1, 2. (a) Aweyi e Mbangi za Yave bebadikilanga Nkand’a Nzambi? (b) Nkia nkanda otoma yangalelanga muna Nkand’a Nzambi?

WAU vo tu Mbangi za Yave, tutoma zolanga Nkand’a Nzambi. Ukutuvananga lufiaulwisu, vuvu ye malongi tulenda bund’e vuvu. (Roma 15:4) Ke nkanda wa ngindu za wantu ko, kansi “diambu dia Nzambi.”​—1 Tesalonika 2:13.

² Nanga yeto awonso tuna ye sono ya Nkand’a Nzambi tutoma yangalelanga. Akaka bezolanga tanga nkanda mina ye nsangu zambote mu kuma kia Yesu, kadi misonganga kiwuntu kia Yave. (Yoane 14:9) Akaka bezolanga tanga e nkanda nze Lusengomono, owu usonganga “mambu mevangama ke kolo ko.” (Lusengomono 1:1) Akaka befiaulwiswanga vava betanganga nkand’a Nkunga, akaka beyangalelanga tanga malongi mena muna nkand’a Ngana. Kieleka, Nkand’a Nzambi wasonekwa mu kuma kia wantu awonso.

3, 4. (a) Aweyi tubadikilanga nkanda mieto? (b) Nkia nkanda tutambulanga mivaikiswanga mu kuma kia buka kimosi kia wantu?

³ Wau vo tuzolanga Nkand’a Nzambi, tuzolanga mpe nkanda mieto mitukanga muna Diambu dia Nzambi. E nkanda miawonso tutambulanga i nkubika kevanganga o Yave muna wete dieto. E nkanda miami mikutusadisanga mu kala ye ngwizani ambote yo Yave yo kumika lukwikilu lweto.​—Tito 2:2.

⁴ Miayingi muna nkanda mieto mivaikiswanga mu kuma kia Mbangi zawonso za Yave. Kansi, vena ye nkanda mivaikiswanga mu kuma kia buka kimosi kaka kia wantu, nze aleke yovo mase. Malongi mayingi ye video zivaikiswanga muna nzil’eto ya Internete zikubikwanga mu kuma kia wantu bena vo ke Mbangi za Yave ko. E nkanda mia mpila mu mpila mivaikiswanga misonganga vo Yave olungisanga nsilu andi wa vana ulolo wa madia kwa wantu awonso.—Yesaya 25:6.

 5. Nkia diambu keyangalelanga o Yave?

⁵ Ayingi mu yeto tuzolanga vo twakala ye ntangwa yafwana mu tanga Nkand’a Nzambi ye nkanda mieto. Kansi, e ntangwa tuvaulanga mu longoka konso nkanda tutambulanga ilenda swaswana. Tuna ye vuvu vo Yave oyangalalanga vava tutoma sadilanga e ntangw’eto muna tanga yo longoka Nkand’a Nzambi ye nkanda mieto. (Efeso 5:15, 16) Kansi, vena ye vonza tufwete venga. Nkia vonza?

 6. Adieyi dilenda kutukakidila mu lembi vua nluta muna nkubika za Yave?

⁶ Avo ke tuyikebele ko, tulenda banza vo yaka sono ya Nkand’a Nzambi yovo e miaka nkanda mieto ke mina mfunu ko kwa yeto. Kasikil’owu, adieyi tuvova avo vena ye sono ya Nkand’a Nzambi tumonanga vo ke ina mfunu ko kwa yeto? Yovo adieyi tuvova avo nkanda kingandi ke wavaikiswa mu kuma kieto ko? Nga tutanganga nkanda miami mu nzaki-nzaki yovo lembi mio tanga nkutu? Avo i wau, vena ye mambu mayingi ke tuzaya ko malenda kutusadisa. Aweyi tulenda vengela vonza kiaki? Tufwete sungamena vo malongi mawonso tutambulanga kwa Yave metukanga. Muna Nkand’a Nzambi tutanganga vo: “Omono i Yave wa Nzambi aku, on’okulong’oma ma mfunu.” (Yesaya 48:17) Mu longi diadi, tubadika tuludiku tatu tulenda kutusadisa mu vua nluta muna nkubika zawonso kevanganga o Yave muna wete dieto.

 7. Ekuma tufwete ziulwilanga o ntima vava tutanganga Nkand’a Nzambi?

⁷ Ziulanga o ntima vava otanganga. Dialudi vo e yaka sono ya Nkand’a Nzambi yasonekwa mu kuma kia muntu mosi yovo buka kia wantu. Kansi, Nkand’a Nzambi uvovanga vo e “sono yawonso yavumunwinwa kwa Nzambi, yamfunu.” (2 Timoteo 3:16) E kiaki i kuma tufwete ziulwilanga o ntima vava tutanganga Nkand’a Nzambi. Mpangi mosi osungamenanga vo mambu mayingi kelongokanga muna lusansu lumosi kaka. Diadi dikunsadisanga mu longoka mambu mena vo mampasi mu bakula mo vana vau. Muna kuma kiaki, vitila twayantika tanga Nkand’a Nzambi, tufwete samba kwa Yave katuziula o ntima yo kutuvana ngangu kimana twabakula malongi kazolele vo twazaya.​—Ezera 7:10; tanga Yakobo 1:5.

8, 9. (a) Vava tutanganga Nkand’a Nzambi, nkia yuvu tufwete kiyuvulanga? (b) Adieyi tulenda longoka mu kuma kia Yave vava tutanganga nkanikinu mina bafwete lungisa akuluntu?

⁸ Ukiyuvulanga: Vava otanganga o Nkand’a Nzambi, ningamanga yo kukiyuvula: ‘Adieyi ndongokele mu kuma kia Yave? Aweyi ndenda sadila diambu diadi muna zingu kiame? Aweyi ndenda dio sadila muna sadisa akaka? Avo tubadikidi yuvu yayi, tubaka nluta muna ntangilu eto ya Nkand’a Nzambi. Yambula twabadika nona kimosi. Nkand’a Nzambi uyikanga nkanikinu mina akuluntu Akristu bafwete lungisa. (Tanga 1 Timoteo 3:2-7.) Kansi, ayingi muna yeto ke tu akuluntu ko. Muna kuma kiaki, tulenda banza vo e mambu mama ke mekutusadisa ko. Yambula twabadika yuvu tatu ina tuyikidi kala mu zaya una mambu mama malenda kutusadisila yeto awonso.

⁹ “Adieyi ndongokele mu kuma kia Yave?” Yave watuzayisa mambu mana akuluntu bafwete lungisa. Wasikidisa nsiku mu kuma kia mpangi z’akala bevitang’o ntu muna nkutakani. E diadi disongele vo e nkutakani mfunu kikilu ina kwa Yave. Nkand’a Nzambi uvovanga vo Nzambi wasumba e nkutakani “muna menga ma Mwan’andi.” (Mavangu 20:28) Muna kuma kiaki, Yave ovavanga vo akuluntu bakala mbandu ambote, kadi mbalu besinga tá muna mpila bekadilanga ye mpangi za nkutakani. Yave ozolanga vo akuluntu batoma kutulunga-lunga. (Yesaya 32:1, 2) Vava tutanganga e nkanikinu mu kuma kia akuluntu, tubakulanga vo Yave otoma kutuzolanga.

10, 11. (a) Vava tutanganga e nkanikinu mu kuma kia akuluntu, aweyi tulenda sadila mambu mama muna zingu kieto? (b) Aweyi tulenda sadila mambu mama mu sadisa akaka?

¹⁰ “Aweyi ndenda sadila mambu mama muna zingu kiame?” Avo u nkuluntu, ofwete fimpululanga nkanikinu miami yo vanga nsobani zivuilu o mfunu. Avo ‘kinkengi ovavanga,’ ofwete vanga mawonso olenda muna lungisa nkanikinu miami. (1 Timoteo 3:1) Kansi, Akristu awonso balenda longoka diambu muna nkanikinu miami. Kasikil’owu, Yave ovavanga vo yeto awonso twakala akwa unleka yo lulungalalu. (Filipi 4:5; 1 Petelo 4:7) Vava akuluntu bekalanga se “mbandu kwa kambi,” tulenda longoka mayingi muna mbandu au yo ‘tanginina lukwikilu lwau.’ —1 Petelo 5:3; Ayibere 13:7.

¹¹ “Aweyi ndenda sadila mambu mama mu sadisa akaka?” Tulenda sadila e nkanikinu miasikidiswa mu kuma kia akuluntu Akristu mu sadisa alongoki a Nkand’a Nzambi ye akaka mu zaya e nswaswani vana vena akuluntu ye mfumu za mabundu. E nkanikinu miami milenda mpe kutusungamesa e salu besalanga akuluntu muna nkutakani eto. Vana ntandu, mikutufila mu zitisanga mpangi zazi. (1 Tesalonika 5:12) Avo tubazitisi, belungisa kiyekwa kiau kuna kiese.​—Ayibere 13:17.

12, 13. (a) Nkia mambu tulenda vavulula muna nkanda tuna miau? (b) Yika nona kisonganga una lusansu lulenda kutusadisila mu bakula mambu mena vo mampasi mu bakula vana vau.

¹² Vavululanga. Vava tulongokanga Nkand’a Nzambi, tulenda vava e mvutu za yuvu eyi:

• Nani wasoneka nkanda wau?

• Akweyi ye nkia ntangwa wasonekwa?

• Nkia mambu mavangamanga vava nkanda wau wasonekwa?

E mvutu za yuvu yayi zilenda kutusadisa mu longoka mambu mana ke tulendi bakula vana vau ko.

¹³ Kasikil’owu, e sono kia Yezekele 14:13, 14 kivovanga vo: “E mwan’a muntu, e nsi ovo insumukini muna kuzuka, ndambwidi mo o koko kwame yo tolola nkau andi a madia, yatwika mo mvengele, yo kendona mo muntu ye bulu; kana una vo wantu tatu awaya, Noa yo Daniele yo Yobi bakedi mo, bakôla kaka mioyo miau, muna unsongi wau, i kavovele o Mfumu Yave.” Avo tuvavulwidi, tuzaya vo Yezekele wasoneka mvovo miami muna mvu wa 612 vitila Kristu. Noa yo Yakobo bayifwila kala se vioka mvu miayingi, kansi Yave wakinu sungamena kwikizi kiau. Kansi, muna kolo kiakina Daniele moyo kakala. Nanga kimbuta kia mvu 20 kakala vava Yave kavova vo nkwa unsongi kakala nze Noa yo Yobi. Adieyi tulongokele? Yave omonanga yo yangalela selo yandi yakwikizi, kumosi ye aleke.​—Nkunga 148:12-14.

14. Aweyi e nkanda mivaikiswanga mu kuma kia aleke mikubasadisilanga? Aweyi nkanda miami milenda sadisila mpe akaka? (Tala fwaniswa kuna lubantiku lwa longi.)

¹⁴ Nkanda mu kuma kia aleke. Tulongokele vo tulenda vua nluta muna sono yawonso ya Nkand’a Nzambi. Diau dimosi mpe, tulenda vua nluta muna nkanda miawonso tutambulanga. Yambula twavovela nona yakete. Mu lumbu yeto, Yave ovananga malongi ma mpila mu mpila kwa aleke.^[1] (Tala mvovo miansuka.) Malongi mama malenda kubasadisa mu zizidila ntonta kuna sikola ye mpasi benuananga zau muna mvu mia kileke. Kansi, aweyi yeto awonso tulenda vuila nluta avo tutangidi e nkanda miami? Avo tutangidi nkanda miami, tuzaya e mpasi benuananga zau aleke, tukala twakubama mu kubasadisa yo kubakasakesa.

15. Ekuma Akristu bena vo se ambuta bafwete tangilanga e nkanda mivaikiswanga mu kuma kia aleke?

¹⁵ Akristu bena vo se ambuta ke bafwete yambula ko vo lulendo lwabakakidila mu tanga nkanda mivaikiswanga mu kuma kia aleke. Mambu mayingi mena muna nkanda miami matadidi Akristu awonso. Kasikil’owu, divavanga vo yeto awonso twatanina lukwikilu lweto, lunga-lunga ngindu zeto, zizidila ntonta yo venga yikundi ye nsaka zambi. Muna kuma kiaki, kana una vo nkanda miami mivaikiswanga mu kuma kia aleke, e malongi mena mo mu Nkand’a Nzambi metukanga, Akristu awonso balenda mo vuila nluta.

16. E nkanda mieto milenda mpe sadisa aleke mu vanga nkia diambu?

¹⁶ E nkanda mivaikiswanga mu kuma kia aleke milenda mpe kubasadisa mu siamisa kikundi kiau yo Yave. (Tanga Kimpovi 12:1, 13.) Ambuta mpe balenda vua nluta muna nkanda miami. Kasikil’owu, muna Despertai! ya Abidi 2009, muna ye longi dina yo ntu a diambu “Os Jovens Perguntam. . . Como tornar a leitura da Bíblia agradável?” Tuludiku twayingi tuna muna longi diadi. Muna mpe ye babu kilenda zengwa yo lundwa yo sadila kio muna longoka. Nga ambuta balenda vua nluta muna longi diadi? Ngudi mosi wavova vo diampasi diakala kwa yandi mu tanga Nkand’a Nzambi. Kansi, wasadila tuludiku twavewa muna longi diadi. Owau okalanga ye kiese kia tanga Nkand’a Nzambi. Wavova vo wayantika bakula e ngwizani ina muna sono ya Nkand’a Nzambila yo yindula mana ketanganga. Wakudikila vo: “Entete kiamonanga kiese kiaki ko.”

17, 18. Nkia nluta tulenda baka vava tutanganga nkanda mivaikiswanga mu kuma kia nkangu? Yika nona.

¹⁷ Nkanda mivaikiswanga mu kuma kia nkangu. Tuka muna mvu wa 2008, tuyangalelanga tambula Eyingidilu dia longoka. Eyingidilu diadi divaikiswanga mu kuma kia Mbangi za Yave. Kansi, tutambulanga mpe Eyingidilu dia nkangu. Aweyi tulenda vuila nluta muna Eyingidilu diadi? Yambula twabadika nona kimosi. Kiese tumonanga avo nlongoki tubokele wizidi muna Seka dia Kintinu. Ekolo mpovi kevovanga, tuyindwidi nlongi eto. Tuyantikidi kiyuvula una kemona mu kuma kia mambu kewanga ye una malenda sobela zingu kiandi. Ediadi dikutwasila kiese yo vutula matondo mu kuma kia longi diadi.

¹⁸ Diau dimosi mpe divangamanga vava tutanganga nkanda mivaikiswanga mu kuma kia nkangu. Kasikil’owu, Eyingidilu dia nkangu ye malongi mevaikiswanga muna nzil’eto jw.org, mesasilanga Nkand’a Nzambi mu mvovo mialeboka. Vava tutanganga malongi mama, tuwokesanga umbakuzi yo zola kweto muna ludi kia Nkand’a Nzambi kina tuzeye kala. Vana ntandu, tulenda longoka ndekwa zampa za sasila e ludi muna salu kia umbangi. Diau dimosi, e Despertai! ikumikanga lukwikilu lweto muna Mvangi. Ikutusadisanga mpe mu zaya una tulenda tanina lukwikilu lweto.​—Tanga 1 Petelo 3:15.

19. Aweyi tulenda songela vo tuvutulanga matondo kwa Yave muna nkubika zawonso kevanganga?

¹⁹ Kieleka, Yave okutuvananga malongi mayingi mekutusadisanga. (Matai 5:3) Yambula twakwamanana tanga yo sadila malongi kekutuvananga. Avo tuvangidi wo, nluta miayingi tuvua yo songa vo tuvutulanga matondo kwa Yave muna nkubika zawonso kevanganga muna wete dieto.​—Yesaya 48:17.