E Nduta Yansuka Ya Yesu Ifinamene

Yesu ofokuele e moko kiandi ye ntumwa ziya vana Mongo a Olive. Ovene mvutu za kiuvu kiau mu kuma kia ngiz’andi kuna sentu ye mbaninu a tandu kiaki.

Ekwe salu kiayingi kakele kiau o Yesu muna lumbu kia 11 kia Nisani! Nanga dilenda kala vo, vava bevutukanga kuna Betania mu kwenda leka, Yesu ovovese antumwa vo: “Nuzeye wo vo owau lumbu yole isidi, e Nduta ikala, o Mwan’a muntu oyekolwa, kavondelwa vana nti.”—Matai 26:2.

Yesu oviokese e lumbu Kiatatu kiawonso kumosi ye ntumwa zandi. Muna lumbu Kiazole, Yesu watumba mfumu za mabundu yo senzeka o bi wau vana meso ma ndonga. I dianu bazolele kumvonda. Kansi, o Yesu kamonekene kwa wantu ko muna lumbu kia 12 kia Nisani kimana valembi kala diambu dilenda kunsimba kalembi dia e Nduta ye ntumwa zandi muna nkokela, kuna ndimbuk’a ntangwa ya lumbu kilanda, kuna lubantiku lwa lumbu kia 14 kia Nisani.

Kansi nganga zambuta ye mbuta za nkangu ke bazolele kanga nua miau ko vitila e Nduta. Bavuende mfulu vana yanzala kia Kayafa wa ngang’a mbuta. Ekuma? Bafungidi makasi kadi Yesu osenzekele mavangu mau. Bawizanene vo, “babaka Yesu kuna ndekwa yo kumvonda.” Nkia ntangwa ye aweyi bavangila wo? Bavovele vo: “Ke muna kolo kia nkinzi ko, kimana valembi bwa e nkindu vana vena nkangu.” (Matai 26:4, 5) Wonga bena wau kadi Yesu otoma zolwangwa kwa wantu ayingi.

Wau bemokenanga, mfumu za mabundu batambwidi nzenza. Basivikidi kikilu, kadi i mosi muna antumwa za Yesu, Yuda wa musi Kereote. Satana osidi Yuda e ngindu za yekola Mfumu andi. Yuda ubayuvuidi vo: “Nki nuzolele kumpana kimana yanyekola kwa yeno?” (Matai 26:15) Batondele e ngindu zandi, “bawizanene vo bamvana nzimbu za palata.” (Luka 22:5) Ntalu kwa? Batondele kumfuta palata 30. Nzimbu zayingi, kadi o ntaudi 30 ma sekele kefutwanga. (Luvaiku 21:32) Muna vanga wo, mfumu za mabundu bavezele Yesu, basongele vo kena kwandi mfunu ko. Owau Yuda, “ovavidi ntangw’ambote muna kunyekola kwa yau, vana ke vekala ndonga ko.”—Luka 22:6.

E lumbu kia 13 kia Nisani kiyantikidi mu ndimuk’a ntangwa ya lumbu Kiatatu, o wau i fuku wasambanu ye wansuka kwa Yesu muna Betania. Muna lumbu kilanda, bafwete kubika mawonso masidi kimana badia e Nduta. Bafwete vava mwan’a meme, bamvonda yo kunyoka wamvimba vitila e lumbu kia 14 kia Nisani kiayantika. Akweyi bekubikila e lambu? Nani olamba? Yesu kavovele mambu mama ko. Dianu vo, o Yuda ka lendi mo vovesa kwa nganga zambuta ko.

Nanga, kina Kiayá ku masika, Yesu otumini Petelo ye Yoane tuka muna Betania, ubavovese vo: “Nwenda kubik’e Nduta, twadia kweto.” Bamvovese vo: “Akweyi ozolele twakubikila yo?” Ubavovese vo: “Vava nukota muna mbanza, nuwanana yo muntu onete mvungu a maza. Nunlanda yamuna nzo ina kekota. Nusamunwina mfumu a nzo vo, ‘O Nlongi uvovese vo: “Akweyi dina e seka dia nzenza muna mfwete dila e Nduta ye alongoki ame?”’ Okunusonga seka diampwena dia ntandu diakubikwa. Mûna nukubikil’e Nduta.”—Luka 22:8-12.

Ke dialukatikisu ko vo, mfumu a nzo yayi nlongoki a Yesu. Nanga wazaya dio vo Yesu okunlomba vo e Nduta yavangamena muna nzo andi. Petelo ye Yoane vava balueke muna Yerusaleme, bawene yawonso nze una o Yesu kabavovesele. Mwan’a meme wayokwa, e fulu kikubikilu kimana wantu 13 badia e Nduta, i sia vo, Yesu ye ntumwa zandi 12.