Ekuma nkumbu za wantu akaka zalembi sonekenwa muna Nkand’a Nzambi?

Nkanda Rutu uyikanga yakala dimosi wayikilwa vo nengandi ona kalungisa ko dina kalombwanga muna Nsiku una Nzambi kavana kwa Mose. (Rutu 4:1-12) Nga diadi disongele vo awana bena vo nkumbu zau ke zasonekwa mu Nkand’a Nzambi ko wantu ambi bakala yovo ke bakala mfunu ko? Ve.

Badika e nona ilende. Muna kubika Nduta a nsuka, Yesu wavovesa alongoki andi vo: “Nwenda muna mbanza, kuna kwa nengandi” yo kubika nduta muna nzo andi. (Matai 26:18) Nga diadi disongele vo o “nengandi” oyikilu mu sono kiaki muntu ambi kakala yovo kakala mfunu ko? Ve, kadi “muntu ndioyu” nlongoki a Yesu kakala. Nkumbu andi ke yasonekwa ko muna lusansu, kadi ke diakala mfunu ko.

Vana ntandu, Nkand’a Nzambi uyikanga nkumbu za wantu ayingi bakala yimpumbulu ye mpe uyikanga nona yayingi ya wantu akwikizi ana bena vo nkumbu zau ke zasonekwa ko. Muna bonga e nona, nkumbu ya Eva wa nkento antete yatoma zayakana. Kansi, eloko yo ukolami wandi wafila Adami mun’esumu yo twasa e mpasi kwa yeto awonso. (Roma 5:12) Kuna diak’esambu, e nkumbu a nkaza Noa ke yasonekwa ko muna Nkand’a Nzambi, kansi kuna lemvo yo mvevo wawonso wayikama yakala diandi mu salu kiamfunu. Wau vo nkumbu andi ke yasonama ko, ediadi ke disongele ko vo kakala mfunu ko yovo kavwa dienga dia Nzambi ko.

Vena yo wantu akaka bena vo nkumbu zau ke zasonama mu Nkand’a Nzambi ko, kansi salu kiamfunu basala muna lungisa ekani dia Yave. Yindula dumbelele kia Isaele ona wakala ntaudi muna nzo a Namani wa nkuluntu a makesa ma Suria. Kuna unkabu wawonso, wazayisa nkaza Namani oma ma ngunza a Yave wakala kuna Isaele. Ediadi diasadisa Namani mu sasuka muna kimbevo kiandi. (2 Ntinu 5:1-14) Mwana Yefeta wa mwisi Isaele mpe wasisa mbandu ambote ya lukwikilu. Vana fulu kia sompa yo wuta wana, wasonga luzolo lwa lungisa ndofi ina se diandi kadia. (Afundisi 11:30-40) Vena mpe ye 40 ma asoneki a nkunga kumosi ye ngunza zakaka za kwikizi ana bena vo nkumbu zau ke zasonekwa ko, kansi balungisa mbebe yampwena.—1 Ntinu 20:37-43.

E nona kisundidi kia wantu balembi yikwa nkumbu muna Nkand’a Nzambi i nona kia mbasi za kwikizi. Vena ye nkama za mafunda ma mbasi kun’ezulu, kansi nwole kaka zayikwa nkumbu zau mu Nkand’a Nzambi, i sia vo Ngambiele yo Mikaele. (Daniele 7:10; Luka 1:19; Yuda 9) Akaka nkumbu zau ke zasonekwa ko muna lusansu lwa Nkand’a Nzambi. Muna bonga e nona, Manoa wa se dia Samesone wayuvula mbasi mosi vo: “E nkumbu aku nani, o mambu maku vo malungidi, twàzitisa?” Nkia mvutu kamvana? “Mu nkia diambu oyuvulwidi nkumbu ame, wau vo yesivi?” Kuna lusakalalu lwawonso, mbasi ndioyu katambulwila ko nkembo ufwanukini kwa Nzambi.—Afundisi 13:17, 18.

Nkand’a Nzambi ke usasilanga ko e kuma nkumbu za wantu akaka zasonekenwa ye z’akaka ke zasonekwa ko. Kana una vo i wau, tulenda longoka mayingi kwa selo yakwikizi ana basadila Nzambi bena vo nkumbu zau ke zayikwa ko muna Nkand’a Nzambi.