“Kieleka, Ndioyu I Mwan’a Nzambi”

Eyayi i “ola ya sambanu,” yovo e midi mibudidi. O kuma kubukamene tombe kiangolo, “muna nsi yawonso yamuna ola yevua,” i sia vo, ola ya 15. (Maku 15:33) Ke disongele ko vo ngonde ifukidi ntangwa, i dianu o kuma kubukamene tombe. Ditomana vangamanga mu lumbu kiantete kizangamanga e ngonde. Kansi owau divangamene muna nsungi a Nduta, e ngonde izangamene yamvimba. Nswaswani ye tombe kia ngonde ifukidi ntangwa, e tombe kiaki ola zayingi kizingidi. Yave wa Nzambi otwese tombe kiaki.

Se yindula o wonga bamwene o wantu besevanga Yesu yo kunsakanena. Muna tombe kiaki, akento yá bafinamene vana nti ampasi a Yesu. I Salome wa ngudi a Yesu, Maria Mandala yo Maria wa ngudi a ntumwa Yakobo wa Nleke.

Yoane wa ntumwa una vamosi yo ngudi a Yesu, odilanga “vana ndambu a nti ampasi.” Maria otadidi o mwana kawuta yo sansa, omanikinu vana nti, mu kunga kena ye mpasi. Kuna kwa Maria dina nga yandi otompwelo mu “nsosolo ampwena.” (Yoane 19:25; Luka 2:35) Kana una vo mu kunga kena ye mpasi, Yesu kavilakene ngudi andi ko. Kuna kikesa kiawonso, ovangidi e sinsu kwa Yoane, i bosi ovovese ngudi andi vo: “E nkento, tala mwan’aku!” I bosi, Yesu otadidi Maria, ovovese Yoane vo: “Tala ngudi aku!”—Yoane 19:26, 27.

Yesu oyekekele Yoane wa ntumwa ona ketoma zolanga e mbebe ya lunga-lunga ngudi andi, nanga yakala diandi wafwa. Yesu otomene dio zaya vo aleke andi, i sia vo, wan’a Maria, ke bakwikidi mu yandi ko. Dianu kasolele Yoane kalunga-lunga ngudi andi muna mwanda ye muna nitu. Ekwe mbandu ambote!

E tombe vava kifokokele, Yesu ovovele vo: “Vuina ngina diau.” Muna diadi, Yesu olungisi unguza wa Nkand’a Nzambi. (Yoane 19:28; Nkunga 22:15) Yesu omwene vo Se diandi kena kunsadisa diaka ko, kimana o lukwikilu lwandi lwatoma tontwa kikilu. Kristu obokele muna nding’angolo, oku vo: “Elì, Elì, lamà sabaktanì?” i sia vo, “E Nzambi ame, e Nzambi ame, ekuma ungiambulwidi?” Ankaka ke batomene kumbakula ko bavovele vo: “Wa! Eliya kabokele.” Mosi muna yau otikwini, obongele vusu, ovungidi dio muna vinyu ya ngani, osomekene dio vana ntu a tutu, umvene dio kanua. Kansi, ankaka bavovele vo: “Nunyambula! Twatala kana vo Eliya okwiza kunkatula.”—Maku 15:34-36.

Yesu okazidi vo: “Dilunganene!” (Yoane 19:30) Dialudi, Yesu olungisi mawonso o Se diandi kankanikina kavanga ova ntoto. Yesu ofokwele vo: “E Tata, ngiekwele mwand’ame muna moko maku.” (Luka 23:46) Muna mvovo miami, Yesu otambikidi o moyo andi vana moko ma Yave, ye vuvu vo o Nzambi okumvutulwila wo. Wau vo Yesu obundidi e vuvu kiandi kiawonso muna Yave, ovumbikidi o ntu andi, ofwidi.

Vana vau vakedi nzakama yangolo ya ntoto, matadi mabâsukini. Wau vo e ngolo zingi, e ziami ina kuna mbazi a Yerusaleme iziukidi, mavimbu mavaikidi ku mbazi. O wantu bamwene mavimbu mama bakotele muna “mbanz’avauka” basamuni mana bamwene.—Matai 12:11; 27:51-53.

Vava Yesu kafwidi, o nlele a ngumbu wandá, uvambanesanga e fulu Kiavauka ye fulu Kisundidi Vauka muna tempelo a Nzambi, utiazukini vana kati, tuka kuna ntandu yamuna yanda. E diambu diadi diasivi divangamene mu songa o makasi ma Nzambi mu kuma kia wantu bavondele Mwan’andi. Disongele mpe vo, iziukidi e nzila yakotela muna fulu Kisundidi Vauka, i sia vo, kuna zulu.—Ayibere 9:2, 3; 10:19, 20.

O wantu bamwene wonga wayingi. O mfumu a makesa ona waveno e mbebe ya vonda Yesu, ovovele vo: “Kieleka, ndioyu i Mwan’a Nzambi.” (Maku 15:39) Dilenda kala vo e kesa diadi vana kawanuka vava Pilato kafundisa Yesu yo kunyuvula kana vo yandi i Mwan’a Nzambi. E kesa diadi obakwidi vo Yesu nkwa unsongi, yandi kikilu i Mwan’a Nzambi.

O wantu ankaka bamwene wonga wa mambu mavangamene, bele vutuki muna nzo zau, “babundidi tulu yau” muna songa e ntantu zau ye nsoni zasaka. (Luka 23:48) O wantu ankaka mu tala bena kuna vala. Akaka muna yau i akento ayingi ana bakala alongoki a Yesu yo kangala yandi. Oyau mpe bamwene ntantu zayingi mu kuma kia mambu mawonso mavangamene.