Yesu Odikidi Mafunda Ma Wantu Muna Mbolo Ye Mbizi Zakete

E ntumwa 12 bayangalele wau basamwini e nsangu zambote muna Ngalili, bazayisi Yesu “mawonso bavangidi yo longa.” Muna diadi, bayoyele. Ke bena nkutu ye ntangw’a dia ko, wantu ayingi mu kwiza bena kwa yau, vo i akaka mu vutuka bena. Muna kuma kiaki, o Yesu ovovese ntumwa zandi vo: “Nwiza, twenda vana fulu kia yeto kaka, kuna makanga, twavunda fiakete.”—Maku 6:30, 31.

Bakotele muna nzaza, nanga lukufi ye Kafanau, bele va fulu ke kina wantu ko, kuna este a Nkoko a Yodani, kuna simu dia Betesaida. Ndonga ibamwene vava bekwendanga, akaka bawidi e nsangu. Bele ntinu muna nlambu-nlambu a nkoko, bayiluakidi vitila Yesu ye ntumwa zandi.

O Yesu vava kakulumukini muna nzaza, omwene e ndonga, ubafwididi e nkenda, kadi bena nze mameme makondwa mvungudi. Oyantikidi “kubalonga mambu mayingi” mu kuma kia Kintinu. (Maku 6:34) Osaswidi “awana bavavang’o wukwa.” (Luka 9:11) O kuma vava kuyantikidi ofwa, alongoki bavovese Yesu vo: “Ovava va makanga, o kuma kufwidi; sindika e ndonga benda muna mavata bayisumbila madia.”—Matai 14:15.

Yesu ubavovese vo: “Ke bendi ko; oyeno nubavana má kia dia.” (Matai 14:16) Kana una vo Yesu ozeye edi kevanga, kansi muna vava zaya e ngindu za Filipo, Yesu unyuvuidi vo: “Akweyi tusumbila e mbolo bedia wantu awaya?” Yesu oyuvuidi Filipo, kadi lukufi kekalanga ye Betesaida. Kansi, kana basumbidi e mbolo, ke zifwana ko. Kadi tezo kia 5.000 ma akala bena vo. Avo tutangidi akento yo wana, o lutangu lulenda lwaka 10.000. Filipo ovutwidi Yesu vo: “E mbolo za nkama zole za denali ke zikubafwana ko kimana konso muntu kabaka fiakete-kete.”—Yoane 6:5-7.

Nanga muna songa vo ke dilendakana ko muna dikila ndonga yayi yawonso, Andere ovovele vo: “Kindende kimosi un’ovava, una ye mbolo tanu ye mbizi zole za maza. Kansi, nki kiokio vana vena ndonga yayi?”—Yoane 6:9.

E yayi i nsungi a masanza, vitila e Nduta ya mvu wa 32 wa tandu kieto. E titi imenene muna miongo. Yesu ovovese alongoki andi bavuandisa o wantu vana titi mu buka ya makumatanu-makumatanu ye nkama-nkama. Obongele mbolo zitanu ye mbizi zole, osambidi kwa Nzambi. I bosi, obukwini e mbolo ye mbizi. Ovene zo kwa alongoki andi bakayanesa kwa nkangu. Diasivi mu mona vo yau awonso badidi yo yukuta!

I bosi, Yesu ovovese alongoki andi vo: “Nuzonzeka nkesona zisuvidi, valembi vetwa lekwa.” (Yoane 6:12) Bazadisi yitunga 12 ye nkesona zisuvidi.