Tufwete Lolokanga

Petelo owidi e longi dina Yesu kavene disongele una tulenda singikila e mambu mebwanga vana kati kwa mpangi. Kansi o wau, Petelo ozolele zaya kana nkumbu kwa o muntu kafwete loloka nkwandi.

Oyuvuidi Yesu vo: “E Mfumu, o mpangi ame nkumbu kwa kafwete kunsumukina, omono yanloloka e? Yamuna nkumbu nsambwadi e?” Akaka muna mfumu za mabundu belonganga vo o muntu kafwete loloka nkwandi nkumbu tatu kaka. Nanga, i dianu Petelo kayindwidi vo osonga e nkenda zayingi kwa mpangi andi avo unlolokele “yamuna nkumbu nsambwadi.”—Matai 18:21.

Kansi tu, e fu kia tanga o vilwa wa akweto ke kina ngwizani ko ye longi dia Yesu. Dianu vo, Yesu osingikidi Petelo, oku vo: “Kivovese ko vo yamuna nkumbu nsambwadi, kansi yamuna nkumbu 77.” (Matai 18:22) E diadi disongele vo tufwete lolokanga ntangwa zawonso. O Petelo kafwete sikidisa ko kana nkumbu kwa keloloka mpangi andi.

I bosi muna songa o mfunu wa loloka akweto, Yesu otele kingana kimosi kwa Petelo yo nkangu. I kingana kia ntaudi ona walembi tanginina e nkenda za mfumu andi. O mfumu ozolele lomba e mfuka kwa ntaudi zandi. Bantwasidi ntaudi wandia mfuka yayingi, 10.000 ma talanta [yovo 60.000.000 ma denali]. Kalendele futa e mfuka yayi ko. O mfumu okanikini vo ntaudi ndioyo, nkaz’andi yo wana, batekwa kimana kafuta e mfuka. O ntaudi wau kawidi wo, ofukamene vana ntwala malu ma mfumu andi, undodokele, oku vo: “Umpana e ntangwa, ikufuta yawonso.”—Matai 18:26.

O mfumu ofwididi ntaudi ndioyo e nkenda, unyambulwidi e mfuka yawonso. I bosi o ntaudi ovaikidi, wele kwandi. Wau kekwendanga owananene yo nkwandi ntaudi, ona wandia e mfuka ya 100 denali. Umbakidi, unsimbinini vana laka, umvovese vo: “Futa e mfuk’ame yawonso.” O ntaudi ndioyo umfukamene, undodokele vo: “Umpana e ntangwa, ikufuta.” (Matai 18:28, 29) O ntaudi ndioyo kazolele tanginina mfumu andi ko ona unyambulwidi e mfuka yawonso. Obakidi nkwandi ntaudi, wele kunsia muna pelezo yavana kefuta e mfuk’andi.

I bosi, Yesu ovovele vo, e ntaudi zankaka wau bamwene vo o ntaudi ndioyo kazolele fwila nkwandi nkenda ko, bele dio zayisa kwa mfumu au. O mfumu ofungidi makasi, obokelese ntaudi ndioyo, umvovese vo: “Ntaudi ambi, omono yayambulwidi e mfuka yawonso wau wandodokele. Ongeye, kulendi fwila ntaudi wa nkw’aku e nkenda ko nze una omono yafwila e nkenda?” Kuna makasi mawonso o mfumu andi unyekwele kwa ayingidi a pelezo yavana kefuta e mfuka yawonso. I bosi, Yesu ofokwele kingana muna mvovo emi: “O Se diame una kuna zulu i wau mpe kevanga kwa konso muntu mu yeno olembi loloka mpangi andi muna ntima.”—Matai 18:32-35.

E kingana kiaki kitulongele vo tufwete lolokanga akweto. Nzambi wayambulwila e mfuk’eto yanene, i sia vo, masumu meto. Konso sumu yovo diambu diambi mpangi eto Nkristu katuvangidi, diakete kwandi avo tutezanese dio yo masumu meto. O Yave ke kutulolokanga nkumbu mosi kaka ko, kansi ntangwa zawonso. Oyeto mpe tufwete lolokanga mpangi zeto ntangwa zawonso, kana nkutu vo dina batuvangidi diampasi kikilu. Muna longi diandi vana Mongo, Yesu wavova vo Nzambi ‘okutuyambulwila e mfuka zeto, nze una oyeto tuyambulwilanga ana bena ye mfuka zeto.’—Matai 6:12.