Olongele Mu Kuma Kia Vonda Longo Yo Zola Wana

Yesu ye alongoki andi bakatukidi muna Ngalili, basaukidi Nkoko a Yodani, bele kuna Sude yo viokela muna Pereia. E nkumbu a nsuka Yesu kakala muna Pereia, wazayisa Afarisi o nkanikinu a Nzambi mu kuma kia vonda longo. (Luka 16:18) Owau, Afarisi babundumwini e diambu diadi muna tonta Yesu.

Mose wasoneka vo yakala olenda vonda longo yo nkaz’andi kele vo osolwele “owu wambi” muna nkaz’andi. (Nsiku 24:1) Vena ye ngindu zaswaswana yo mambu ma mpila mu mpila mefilanga wantu mu vonda longo. Akaka bekwikilanga vo longo lufwete fwa mu kuma kia yimambu-mambu yakondwa o mfunu. Dianu vo, Afarisi bayuvuidi Yesu vo: “Nga diansongi kwa yakala mu vonda longo yo nkaz’andi muna konso diambu e?”—Matai 19:3.

Vana fulu kia vova e ngindu za wantu, Yesu kuna ngangu zawonso ovovele e kani dia Nzambi mu kuma kia longo. Ubavutwidi vo: “Nga ke nwatanga wo ko vo ona wabasema tuka kuna lubantiku yakala yo nkento kabasema yo vova vo: ‘Muna kuma kiaki, o yakala osisa se diandi yo ngudi andi yo laminina nkaz’andi, yau wole bekala se nitu mosi e’? Dianu vo, ke nwole diaka ko, kansi nitu mosi. Muna kuma kiaki, kina kiayikakeswa kwa Nzambi, o muntu kavambanisa ko.” (Matai 19:4-6) Kieleka, vava Nzambi kasikidisa o longo lwa Adami yo Eva, kabavana o nswa wa vonda longo lwau ko.

Afarisi ke bakwikidi mvovo mia Yesu ko, bavovele vo: “Ozevo, ekuma Mose kakanikina vo yakala kavana nkand’a vonda longo kwa nkento yo kunsindika?” (Matai 19:7) Yesu ubavutwidi vo: “Mu kuma kia bâla kwa ntima mieno, Mose kanuyambulwila vo nwavondanga o longo ye akazi eno, kansi ke wau ko diakala kuna lubantiku.” (Matai 19:8) O “lubantiku” lwalu ke lwayantika mu lumbu ya Mose ko, kansi vava o Nzambi kasikidisa o longo lwantete kuna Edene.

I bosi Yesu ovovele diambu diamfunu, oku vo: “Omono inuvovese vo konso yakala ovonda longo yo nkaz’andi, avo ke mu kuma kia zumba ko, kasompa wankaka, zumba katele.” (Matai 19:9) E Sono ivananga o nswa wa vonda longo kele vo mosi zumba katele.

Alongoki vava bawidi wo, bavovele vo: “Avo i wau kwa yakala yo nkaz’andi, ke diambote ko muntu kasompa.” (Matai 19:10) Kieleka, ndiona ozolele sompa kafwete zaya wo vo longo i kangu diakwele mvu.

Mu kuma kia kimpumpa, Yesu osasidi vo vena ye ankaka bewutukanga nzimba, i sia vo, ke balendi sompa ko. Akaka mpe bekuyikitulanga nzimba, ke bekalanga diaka ye nsatu za vukana ko. Vo i ankaka bena ye nsatu za vukana, kansi ke bazolele kwau sompa ko. Bevanganga wo muna sia e salu kia Nzambi va fulu kiantete muna zingu kiau. Yesu okasakese o wantu bewanga e longi diandi, oku vo: “Ona olenda wo vanga, [kala mpumpa] yambula kavanga wo.”—Matai 19:12.

I bosi, o wantu bayantikidi nata o wan’au kwa Yesu. Kansi alongoki basimini o nkangu, ke bazolele ko vo batokanesa Yesu. Yesu vava kamwene wo, okendalele, ubavovese vo: “Nuyambula yingiana-ngiana yiza kwa mono; ke nubasimi ko, kadi e Kintinu kia Nzambi kia awana bena nze yingiana-ngiana yayi. Kieleka inuvovese vo, konso ona olembi tambula Kintinu kia Nzambi nze kingiana-ngiana, ke kota mo nkutu ko.”—Maku 10:14, 15; Luka 18:15.

Ekwe longi diamfunu! Muna kota mu Kintinu kia Nzambi tufwete kuyikulula yo kala yo luzolo lwa longoka nze mwan’akete. O Yesu osongele vo wan’akete kezolanga, ubasimbidi muna moko yo kubasambula. Yesu osonganga o zola kwa awonso ‘betambulwilanga e Kintinu kia Nzambi nze kingiana-ngiana.’—Luka 18:17.