Yesu Ovene Mvutu Kwa Toko Dia Mvuama

Yesu wakinu kaka muna nzil’a Pereia wau kekwendanga kuna Yerusaleme. Toko dia mvuama wizidi ntinu kwa Yesu, ofukamene vana malu mandi. Toko diadi “mosi muna afidi a Ayuda,” nanga mfidi a sambilu yovo kuna Mbazi a Nkanu kesadilanga. Oyuvuidi Yesu vo: “E Nlongi Ambote, adieyi mfwete vanga muna vua moyo a mvu ya mvu?”—Luka 8:41; 18:18; 24:20.

Yesu umvutwidi vo: “Ekuma ungikidi vo wambote? Ke vena muntu ambote ko, Nzambi kaka. Nanga e toko diadi osadidi o mvovo “ambote” kadi aki rabini i diau bevanganga. Kana una vo Yesu wambote muna longa, kansi ozolele vo e toko diadi kazaya wo vo Nzambi kaka i “wambote.”

Yesu unwondelele vo: “Kansi, avo ozolele vua o moyo, kwamanana lunda e nsiku.” E toko diyuvuidi Yesu vo: “Nkia nsiku?” Yesu umvutwidi vo: “Kuvondi ko, kute zumba ko, kuyiyi ko, kusie kimbangi kia luvunu ko, zitisa se diaku yo ngudi aku, yo zola nkw’aku wauna okuyizolelanga.”—Matai 19:17-19.

E toko divutwidi vo: “Omama mawonso ilundanga mo; adieyi diaka mfwete vanga?” (Matai 19:20) Edi kabenze vo, nanga mambu mambote makondelo muna yandi, malenda kunsadisa mu vua moyo a mvu ya mvu. O Yesu wau kabakwidi vo ye nsi a ntima kavovele, ‘unzolele.’ (Maku 10:21) Kansi vena ye diambu dikakididi e toko diadi.

E toko diadi mavua mandi kebundanga e vuvu. Dianu vo, Yesu umvovese vo: “Diambu dimosi okondelo: Wenda teka yawonso una yau yo vana nzimbu kw’asukami, okala yo lusalu kuna zulu; wiz’andandi.” Kieleka, e toko diadi wadi kaya e nzimbu kwa asukami, ana ke balendi kumvutulwila lekwa ko, yo kituka se nlongoki a Yesu. Kansi wau kakendalele muna mvutu zazi, wele ye ntantu zawonso, kadi nkwa mavua mayingi.” (Maku 10:21, 22) Yesu ovovele vo: Diampasi kw’awana bena ye nzimbu mu kota muna Kintinu kia Nzambi!”—Luka 18:24.

E mvovo mia Yesu misivikisi alongoki. Ovovele diaka vo: “Diasazu kwa samo kaviokela muna disu dia ntumbu, ke mu mvuama ko kakota muna Kintinu kia Nzambi.” Alongoki banyuvuidi vo: “Nani olenda vuluzwa?” Nga o muntu kalendi vuluza nkwandi ko? Yesu ubatadidi, ovovele vo: “Mana ke malendakana ko kwa wantu, malendakana kwa Nzambi.”—Luka 18:25-27.

Petelo osongele vo e nzengo zau zaswaswana ye za toko dia mvuama, ovovele vo: “Oyeto tusisidi yawonso yo kulanda; ozevo, nki tutambula?” Yesu ubavutwidi vo: “Kieleka inuvovese vo, vava lekwa yawonso ivangwa se yampa, o Mwan’a muntu ovuanda vana kunda kiandi kia nkembo, oyeno nundende nuvuanda mpe vana kunda 12, nwafundisa makanda 12 ma Isaele.”—Matai 19:27, 28.

Dialudi vo, Yesu ovovele o mambu mevangama muna lumbu ikwiza, vava e lekwa yawonso yikitulwa se yampa, wauna yakala muna mpatu ya Edene. Petelo ye alongoki ankaka betambula o nsendo vava beyala yo Yesu, yo twasa e nsambu mu Paradiso ova ntoto. O nsendo wau usundidi mawonso balenda vanga!

Kansi ke mu lumbu ikwiza kaka ko betambula o nsendo wawonso. Kana nkutu owau, alongoki mu tambula bena e nsambu zankaka. Yesu ubavovese vo: “Ke vena ona wasisa nzo ko yovo nkaz’andi yovo mpangi zandi yovo se ye ngudi, yovo wana, muna diambu dia Kintinu kia Nzambi, kalembi tambula yayingi omu kolo kiaki, muna tandu kikwiza, moyo a mvu ya mvu.”—Luka 18:29, 30.

Kieleka, konso fulu alongoki bekuenda, besongwa o zola kwa mpangi zau Akristu, bekala ye ngwizani ambote lutila nkutu e ngwizani bekalanga yau o wantu bawutuka vumu kimosi. Dia nkenda mu zaya vo, e toko dia mvuama ovidisi e nsambu zazi kumosi mpe yo nsendo wa kota muna Kintinu kia Nzambi kuna zulu.

Yesu ovovele diaka vo: “Kansi, ayingi bavita besukinina, ana basukinina bevita.” (Matai 19:30) Aweyi disongele?

E toko dia mvuama una muna buka “kiantete,” kadi oyandi mpe mosi muna mfumu za Ayuda. Wau vo nkanikinu mia Nzambi kelundanga, dimonekene vo olenda sadila Nzambi yo vanga mambu mayingi mambote. Kansi osidi mavua mandi vana fulu kiantete muna zingu kiandi. Vo i wantu ana bavezuanga, babakula vo malongi ma Yesu ma ludi, i mau mefilanga ku nzil’a moyo. Tulenda vova vo yau “basukinina,” kansi owau “bavitidi.” Bevingilanga yo ntim’a mosi e ntangwa bevuanda vana kunda yau kuna zulu kumosi yo Yesu, ekolo beyala e nza ikituka se Paradiso.