Nki Kifunzulanga Muntu?

E Nduta ya mvu wa 32 wa tandu kieto ifinamene, Yesu mu longa kena muna Ngalili. Muna lemvokela Nsiku a Nzambi, Yesu wele ku nkinzi a Nduta kuna Yerusaleme. Kansi, wendele kuna sweki, kadi Ayuda mu kumvava bena kimana bamvonda. (Yoane 7:1) Vava e Nduta ifokokele, Yesu ovutukidi kuna Ngalili.

O Yesu nanga muna Kafanau kawanukini vava Afarisi ye asoneki batukidi kuna Yerusaleme bezidi kwa yandi. Ekuma bezidi? Diambu bevavanga kimana bafunda Yesu vo ke lemvokelanga nsiku mia dibundu ko. Banyuvuidi vo: “Ekuma alongoki aku ke bezitisilanga lusansu lwa akulu ko? Kadi ke besukulanga moko ko avo se bedia.” (Matai 15:2) Nzambi kasidi lomba kwa asambidi andi ko vo balemvokelanga e fu kia sukula ‘moko mau yamuna kongonia.’ (Maku 7:3) Kansi kuna kwa Afarisi, olembi wo vanga vilwa wampwena kikilu.

Vana fulu kia kubavana kaka mvutu, Yesu ubasongele vo Nsiku a Nzambi bekululanga kuna lukanu. Ubayuvuidi vo: “Oyeno mpe, ekuma ke nuzitisilanga nkanikinu mia Nzambi ko mu kuma kia lusansu lweno?” Muna bonga e nona, “Nzambi wavova vo, ‘Zitisa se diaku yo ngudi aku,’ ye ‘Ndiona olevola se diandi yovo ngudi andi, yambula kavondwa.’ Kansi, oyeno nuvovele vo, ‘Konso ona ovovesa se diandi yovo ngudi andi vo: “Eki ngina kiau kiadi kusadisa, i lukau ivana kwa Nzambi,” kafwene sadisa diaka se diandi ko.’”—Matai 15:3-6; Luvaiku 20:12; 21:17.

Afarisi bevovanga vo e nzimbu, mavua yovo konso lekwa kitambikilu se lukau kwa Nzambi, kwa tempelo kivuilu. Ke kilendi sadilwa mu mambu mankaka ko. Kansi tu, e lekwa o muntu katambikidi se lukaku kibadikilwanga vo kiandi. Muna bonga e nona: O mwana olenda vova vo, e nzimbu ye mavua mandi i “lukau,” katambikidi kwa Nzambi yovo kwa tempelo, disongele vo tempelo isundidi o mfunu ke mu mase mandi ko. O mwana yandi ovuidi e nzimbu ye mavua, kansi kalendi mo sadila ko mu sadisa mase mandi manunu bena mu mpasi. Muna vanga wo, otinini e mbebe andi ya sadisa mase mandi.—Maku 7:11.

O Yesu olungidi kwandi mu funga makasi, kadi Afarisi bebendomonanga o Nsiku a Nzambi, ubavovese vo: “Dianu vo, nuvezele diambu dia Nzambi mu kuma kia lusansu lweno. Akwa kivunina, Yesaya watoma sakula mu kuma kieno,” wau kavova vo: ‘Wantu awaya muna nua kaka bekunzitisilanga, kansi e ntima miau miavavuka oku ngina. “Mu nkatu bekunsambilanga, kadi malongi mau mu nkanikinu mia wantu metukanga.’” Afarisi ke bena yedi bavova ko mu kuma kia mvovo mia nkuma mia Yesu. Yesu obokele ndonga yamfinama, ubavovese vo: “Nuwá, nwazaya e nsas’a diambu edi: Ina ikotele muna nua ke yau ko ifunzulanga muntu, kansi mana mavaikidi muna nu’andi i mau mekumfunzulanga.”—Matai 15:6-11; Yesaya 29:13.

Vava balweke mu nzo imosi, alongoki bayuvuidi Yesu vo: “Nga ozeye wo vo Afarisi batele sakuba wau bawidi dina ovovele?” Yesu ubavutwidi vo: “Konso nkuna ilembi kunwa kwa Se diame una kuna zulu, vuzwa ivuzwa. Nubayambula. Mfidi miafwa meso. Avo mpofo ofididi nkw’andi mpofo, yau wole muna wulu bebwa.”—Matai 15:12-14.

Yesu nanga osivikidi vava Petelo kevovelanga muna nkumbu alongoki yo lomba kwa Yesu vo kasonga nki kifunzulanga o muntu. Yesu ovutwidi vo: “Nga ka nuzeye wo ko vo konso kina kikotele muna nua kikwendanga muna vumu, yo vaikiswa kuna mfuta e? Kansi, mana mevaikanga muna nua mu ntima metukanga, i mau mefunzulanga o muntu. Kadi muna ntima i mutukanga makani mambi, vonda, zumba, mvukana za usafu, wivi, umbangi waluvunu yo lutiangu. Omama i mefunzulanga o muntu; kansi o dia lembi sukula moko ke kufunzulanga muntu ko.”—Matai 15:17-20.

Yesu kayikidi ko vo, muntu kalendi sukula moko ko vitila kalamba madia yovo vitila kadia. Kansi umpuki wa mfumu za mabundu katumbidi, kadi ke belemvokelanga nsiku mia nsongi mia Nzambi ko, tusansu twa wantu belandanga. Dialudi vo, mavangu mambi metukanga muna ntima, i mau mefunzulanga o muntu.