Nkia Salu Kifwene Salwa Muna Lumbu Kia Vundu?

Muna lumbu kiankaka kia Vundu, Yesu okingwidi sambilu dimosi, nanga muna Ngalili. Owene mo muntu una yo koko kwalunene kwayuminina. (Luka 6:6) Asoneki ye Afarisi batungunwini Yesu. Ekuma? Ekani diau dizayakene vava bayuvuidi vo: “Nga diansongi mu wuka muna lumbu kia Vundu e?”—Matai 12:10.

E mfumu za nsambil’a Kiyuda bekwikilanga vo muntu olenda wukwa mu lumbu kia Vundu, avo zingu kiandi mu vonza kina. Muna bonga e nona, bevovanga vo muna lumbu kia Vundu, ke diansongi ko mu singika e visi kia muntu otolokele yovo kunkanga e basa, kadi e zingu kiandi ke kina mu vonza ko. E kiuvu kia Asoneki ye Afarisi kisonganga vo ke betokanenanga wete dia mbevo ndioyo ko. Ozevo, kuma bevavanga kimana batumba Yesu.

Kansi, Yesu ozeye wo vo makani mambi bena mau. Ozeye wo mpe vo e ngindu zau mu kuma kia sala mu lumbu kia Vundu, ke zina ngwizani ko ye Sono. (Luvaiku 20:8-10) Yesu watumbilu kala kondwa kuma muna diambu dia vanga o wete mu lumbu kia Vundu. Owau Yesu ovangidi diambu dilenda kubafungisa makasi mayingi. Ovovele kwa muntu una ye koko kwayuminina vo: “Telama, wiza ova kati.”—Maku 3:3.

Yesu ovilukidi kwa Asoneki ye Afarisi, ovovele vo: “Nani vovo nwina una ye meme dimosi, avo dibwidi mu wulu muna lumbu kia Vundu, kalembi dio simba, katombola dio e?” (Matai 12:11) E meme nzimbu difwanga, muna kuma kiaki, avo bayambwidi dio muna wulu yamuna lumbu kilanda, dilenda fwa yo twasa mfwilu. Kansi, e Sono kivovanga vo: “O nsongi osungamena moyo a bulu kiandi.”—Ngana 12:10.

Muna songa vo mambu mau mole ngwizani mena, Yesu ovovele diaka vo: “O muntu nga kasundidi e meme ko e? Dianu vo, diansongi mu vanga edi diambote mu lumbu kia Vundu.” (Matai 12:12) Ozevo vo, Yesu kakulwidi lumbu kia Vundu ko wau kawukidi muntu ndioyo. Wau kavovele ye ziku yo walakazi, mfumu za nsambil’a Kiyuda ke balendele kumfidisa diaka mpaka ko. Muna kuma kiaki, ke balendele diaka vova konso diambu ko.

Wau kakendalele mu kuma kia ngindu zau zabendomoka, Yesu otatidi oku y’oku. I bosi, ovovese muntu ndioyo vo: “Lambul’o koko kwaku.” (Matai 12:13) Vava kalambwidi o koko kwandi kwayuminina, kuvutukìdi o vimpi. O muntu ndioyo oyangalele kikilu. Kansi aweyi bavangidi awana bazolele kanga Yesu?

Vana fulu kia yangalala mu kuma kia koko kwa muntu kusasukidi, Afarisi bavaikidi, bele kumvuandila e mfulu kumosi “y’alandi a Erodi kimana bamvonda [Yesu].” (Maku 3:6) E buka kiaki kia mbumba kia alandi a Erodi kisangane ye buka kia asambidi beyikilwanga vo Asaduki. Asaduki ye Afarisi kitantu bekalanga kiau, kansi mu kolo kiaki, bawizane mu telamena Yesu.