Nkuni Olele

13, 14. (a) Yika e kingana kia Yesu mu mvovo miankufi mu kuma kia muntu omwangang’e mbongo. (b) Nani i nkuni? Nki i mbongo?

¹³ Muna sono kia Maku 4:​26-29, tumonanga kingana kiakaka mu kuma kia nkuni: “Ovovele vo, e kintinu kia Nzambi kiau akimosi yo muntu omwenge mbongo vana ntoto; kaleka yo sikama, yo fuku yo mwini, e mbongo itumbuluka, yo kula, e mbena kazeye yo ko. O ntoto ukuyimina mbongo; eki kiantete, lulembe, i bosi, disa, okalokala, e mbwaza zibwekele muna disa. E mbongo, ovo iyebokele, vana vau ovaikisa sakilwa, kadi e nsungi a nsâlu ilueke.”

¹⁴ Nani i nkuni oyikwang’o vava? Akaka muna Kikristu kia Kimpangila bevovanga vo nkuni ndioyo i Yesu. Kansi, nga tulenda vova vo Yesu okunini mbongo yo lembi zaya e mbena imena? Kieleka, Yesu ozeye e mbena a mbongo. Kansi, o nkuni ndioyo nze ndiona oyikilu kala, ateleki a Kintinu besonganga, awana bekunanga mbongo a Kintinu muna salu kiau kia samun’e nsangu zambote. E mbongo ina ibwanga vana ntoto i diambu dina besamunanga.b

15, 16. O Yesu nkia ludi kia diambu kavova muna kingana kiandi kia nkuni mu kuma kia mben’a mbongo a nitu ye ya mwanda?

¹⁵ Yesu wavova vo o nkuni ‘waleka mu fuku yo sikama mu mwini.’ Ediadi ke disonganga ko vo o nkuni, molo. Kansi, diambu diansongi disonganga dina ulolo wa wantu bevanganga. E mvovo misadilwanga muna sono kiaki, diambu divangamanga miyikanga, i sia vo, sala muna mwini yo leka mu fuku mu fikolo. Yesu wayika dina dibwanga mu fikolo fiafi. Wavova vo: “E mbongo itumbuluka, yo kula.” I bosi Yesu wakudikila vo: “E mbena kazeye yo ko.” Diambu dina vo i diadi: O ntoto ‘ukuyimina mbongo.’c

¹⁶ O Yesu nkia diambu kasia sungididi ovava? Zaya dio vo mben’a mbongo ye mpila imenenanga, i diambu disiwang’e sungididi. ‘O ntoto ukuyimina mbongo; eki kiantete, lulembe, i bosi, disa, okalokala, e mbwaza zibwekele muna disa.’ (Maku 4:​28) E nkul’a mbongo yayi mu malembe-malembe yivangama. Ka ilendi meneswa mu ngolo ko yovo mu nzaki. Diau adimosi mpe divangamanga ye mben’a mbongo a mwanda. Malembe-malembe imenanga vava Yave keyambulanga vo e ludi kiakota muna ntima mi’awana besonganga luzolo lwa wá e diambu.​—⁠Mav. 13:48; Ayib. 6:⁠1.

17. Aki nani bekembelanga vava e mbongo a mwanda iyimanga?

¹⁷ O nkuni aweyi kekutikilang’e mbongo ovo “iyebokele, vana vau”? Vava Yave kemenesanga e ludi kia Kintinu muna ntima mi’alongoki ampa, benungunukanga muna mwanda. O zola kwau muna Nzambi, kukubafilanga mu kunsadila. Besonganga vo bayiyekola kwa Nzambi mu vubwa muna maza. Ampangi ana bekwamananang’o nungunuka muna mwanda, malembe-malembe bekuyifwanisanga mu tambula kiyekwa kia salu muna nkutakani. Nkuni antete yandi okutikang’e mbongo a Kintinu kumosi y’ateleki akaka a Kintinu ana bena vo nanga ke yau ko bamwang’e mbongo eyi iyimini nlongoki. (Tanga Yoane 4:​36-38.) Kansi, ‘o nkuni, yo nsâdi bekembelanga kumosi.’