Longi Diamfunu Mu Kuma Kia Lulembamu

Vava kiavioka e mona-meso kia nkituk’andi, Yesu ovaikisi nkuya wakala muna mwan’a toko kuna zunga kia Kaisaria-Filipi. Owau, wele kuna Kafanau. Yesu ye alongoki andi bendele kuna sweki, kadi kazolele ko vo wantu “bazaya wo.” (Maku 9:30) E diadi dimvene lau kazayisa diaka o lufwa lwandi kwa alongoki ye salu kina besinga sala. Ubavovese vo: “O Mwan’a muntu oyekolwa vana moko ma wantu, bekumvonda, ye muna lumbu kietatu ofulwa.”—Matai 17:22, 23.

Alongoki ke bafwete dio sivika ko. Kadi Yesu wateka kubazayisa vo vondwa kevondwa. Kansi o Petelo kakwikila ko vo vangama divangama. (Matai 16:21, 22) Alongoki atatu bamona e mona-meso kia nkituk’a Yesu yo wá e moko kia “ngiend’andi.” (Luka 9:31) Alongoki “bakendalele kikilu” wau bewanga Yesu ekolo kevovanga, kansi ke babakwidi mvovo miandi ko. (Matai 17:23) Babakamene kwa wonga ye ke balendele kunyuvula diambu ko, bele kwau.

Balueke muna Kafanau, i vata dina Yesu ketoma sadilanga e salu kiandi, ayingi muna ntumwa zandi esi vata diadi mpe. I bosi, wantu bevakulwisanga mpaku a tempelo bezidi kwa Petelo. Nanga bezidi funda Yesu wau vo kefutanga mpaku ko. Bayuvuidi Petelo vo: “Nga o nlongi eno ke futanga mpaku a tempelo ko e?”—Matai 17:24.

Petelo ovutwidi vo: “Futa kefutanga.” Vava Petelo kakotele muna nzo, Yesu ozeye kala mana maviokele kuna mbazi. Dianu vo, vana fulu kiavingila vo Petelo kanzayisa e diambu diadi, Yesu unyuvuidi vo: “Adieyi oyindwidi e Simone? Kw’aki nani atinu a nza betambulanga e vaku yovo mpaku? Kwa wan’au yovo kwa nzenza?” Petelo ovutwidi vo: “Kwa nzenza.” Yesu umvovese vo: “Kieleka, o wana bavevokele muna mpaku.”—Matai 17:25, 26.

Se dia Yesu yandi i Mfumu a nsema, Yandi osambilwanga muna tempelo. Dianu vo, mun’owu wa nsiku, o Mwan’a Nzambi kalendi futa mpaku a tempelo ko. Yesu ovovese Petelo vo, “muna lembi kubatesesa e sakuba, wenda kuna mbu, tuba o luvaku, bong’e mbizi antete otakula, vava oziula o nu’andi osolola mo palata mosi [stater, yovo tetradrakima]. Bonga yo, futa e mpaku mu kuma kia mono yo ngeye.”—Matai 17:27.

Ke kolo ko, alongoki balungalakene vamosi, bazolele yuvula Yesu kana nani osunda onene muna Kintinu kia Nzambi. Kuna batukidi, alongoki mu kuma kia wonga, ke balendele yuvula Yesu diambu ko mu kuma kia lufwa lwandi, kansi owau ke bena yo wonga ko muna yuvula ndiona osunda onene muna Kintinu kia Nzambi. Yesu ozeye dina beyindulanga. I diambu dina bafilanenenge mpaka kuna nim’a Yesu muna nzil’a Kafanau. Yesu ubayuvuidi vo: “Nkia diambu nufilaneneng’e mpaka muna nzila?” (Maku 9:33) Alongoki bafwidi e nsoni, badingalele kaka, kadi mpaka bafilanenenge kana nani muna yau osundidi onene. I bosi, bazayisi Yesu e diambu befilanenenge mpaka: “Nani kieleka osundidi onene muna Kintinu kia zulu?”—Matai 18:1.

Diampasi mu kwikila vo alongoki bafilanene e mpaka mu kuma kia diambu diadi, kadi mvu ntatu miviokele kala tuka bayantika o mwena e salu ya Yesu yo wá malongi mandi. Dialudi vo, alongoki asumuki. Basansukila mpe mu mabundu mana o wantu bevavanga e tunda ye fulu kiantete. Vana ntandu, Yesu wavovese Petelo vo “nsabi” za Kintinu kenkumvana. Nga i dianu o Petelo kayinduidi vo osundidi akwandi e? Nanga Yakobo yo Yoane mpe beyindulanga vo basundidi akwau, kadi yau bamwene e mona-meso kia nkituk’a Yesu.

Diakala vo i wau kikilu beyindulanga yovo ve, Yesu osingikidi e ngindu zau. Obakidi kingiana-ngiana, unsidi vana kati kwau, ovovese alongoki andi vo: “Avo ke nuvilukidi ko yo kituka nze yingiana-ngiana, muna Kintinu kia zulu ke nukota mo ko. Dianu vo, konso ona okuyikulula nze kingiana-ngiana kiaki i yandi osundidi onene muna Kintinu kia zulu; konso ona otambwidi kingiana-ngiana nze kiaki muna nkumbu ame, mono katambwidi.”—Matai 18:3-5.

Ekwe mpila yambote ya longela! Yesu kafungidi alongoki andi makasi ko, ngatu kubavovesa vo kimfumu bazolele yovo tunda. Kansi ubalongele longi dia mfunu. E yingiana-ngiana ke bevavanga tunda ko. Muna nona kiaki, Yesu osongele vo alongoki andi bafwete kala nze yingiana-ngiana. Muna fokola e moko kiandi, Yesu ovovese alongoki andi vo: “ndiona okuyisakidika vovo nwina yeno awonso, i yandi yuna wanene.”—Luka 9:48.