“Zola Nkw’aku Konso Un’okuzolela”

1, 2. (a) Aweyi i nkanikinu wazole usundidi o nene kayika Yesu? (b) Nkia yuvu tubadika?

MUNA tonta Yesu, Mfarisi mosi wanyuvula vo: ‘E Nlongi, nkia nkanikinu usundidi o nene muna nsiku?’ Nze una twamwene mun’elongi diaviokele, Yesu wavutula vo: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe.” Yesu wakudikila vo: “Una wezole ufwananini, i wau wuwu, zola nkw’aku, konso un’okuzolela.”—Mat. 22:34-39.

² Yesu wavova vo tufwete zola akw’eto nze una tukuyizolelanga. Muna kuma kiaki, diambote twakiyuvula: Nani kikilu i nkw’eto? Aweyi tulenda songela zola muna akw’eto?

3, 4. (a) Nkia kingana kasadila Yesu muna vana e mvutu za kiuvu: “Nani i nkw’ame?” (b) Aweyi Nsamaria kasadisila muntu ona wawandwa yo siswa vana nzila wafw’e kiambu? (Tala e fwaniswa ova ntandu.)

³ Tulenda yindula vo nkw’eto yovo mfinangani eto i muntu ozingilanga lukufi yo yeto yovo nkundi eto. (Nga. 27:10) Kansi, badika dina Yesu kavova vava yakala dimosi ona wakibadikilanga vo nkwa unsongi kanyuvula vo: “Nani i nkw’ame?” Muna kumvana e mvutu, Yesu wayika kingana kia Nsamaria. (Tanga Luka 10:29-37.) Yakala dimosi wa Nyuda wayiywa e lekwa yandi yo wandwa, i bosi wafw’e kiambu yo siswa vana nzila. Nganga mosi wa Nyisaele yo Nlevi ana bafwana kala mfinangani zambote, bamona muntu ndioyo kansi ke bavanga diambu ko muna kunsadisa. Kansi, Nsamaria wansadisa. Muna kolo kiakina, ndonga mun’Ayuda y’esi Samaria ke bazolananga ko.—Yoa. 4:9.

⁴ Muna kunsadisa, o Nsamaria wayitila mazi ye vinyo muna mputa zandi. I bosi wansia vana bulu kiandi, wanata kuna nzo a mawuku yo futa mpanza zole. E mpanza zole i mfutu katambulanga o muntu mu salu kia lumbu yole. (Mat. 20:2) Diasazu mu bakula nani kikilu i mfinangani a muntu ndiona wawandwa. E kingana kia Yesu kitulongele o mfunu wa songa nkenda yo zola kwa mfinangani zeto.

 5. Selo ya Yave aweyi basongela zola kwa mfinangani zau vava vabwa e sumbula?

⁵ Mu “lumbu yambaninu” tuzingilanga ina vo wantu ayingi ke besonganga nkenda ko. Wantu ayingi bena vo akwa nsoki, ke bezolanga mfinangani zau ko. (2 Tim. 3:1-3) Kasikil’owu, muna ngonde a Okutoba, 2012 kuna mbanz’a Nova York kwabwa tembwa kiangolo kiayikilwa vo Sandy. Wantu ayingi ke bakala ye kura ko ye lekwa yakaka ina bavwang’o mfunu. Diankenda kikilu vo e mivi bayendanga yiya lekwa ya wantu ana bamonanga e mpasi. Kansi Mbangi za Yave baswaswana bakala. Bavanga e nkubika mu sadisa mpangi zau ye wantu ankaka muna zunga kiakina, kadi Akristu akieleka bezolanga mfinangani zau. Ayeyi i mpila yankaka tulenda songela zola kwa mfinangani zeto?

 6. Nkia lusadisu lutukanga muna Nkand’a Nzambi tulenda vana kwa mfinangani zeto?

⁶ Vana lusadisu lwa mwanda kwa wantu. Muna salu kieto kia umbangi, tuvananga lufiaulwisu kwa mfinangani zeto lutukanga muna sono. (Roma 15:4) Tukubasonganga o zola vava tusadilanga Nkand’a Nzambi muna kubazayisa nsangu zambote za Kintinu. (Mat. 24:14) Ekwe lau diampwena tuvwidi dia samuna e nsangu za Kintinu zitukanga kwa ‘Nzambi ona ovananga e vuvu’!—Roma 15:13.

 7. Nkia nkanikinu kavana Yesu? Nkia nsambu tuvwa avo tulemvokele wo?

⁷ Lemvokelanga Nkanikinu a Yesu. E nkanikinu wau una muna mvovo mia Yesu vava kafila Elongi diandi vana Mongo: “Dianu vo, konso una nuzolele o wantu vo banuvanga, i nuvanga mpe kwa yau: kadi i nsiku ye ngunza wuwu.” (Mat. 7:12) O “Nsiku” wau, i nkanda Etuku yakuna Nsiku. E “Ngunza” i nkanda mia ungunza mina muna Sono ya Kiyibere. Yave wavana e “Nsiku” ye “Ngunza” kwa nkangu andi kadi wabazolanga ye wazola mpe vo bazolaziananga. O unu, Yave ovavanga mpe vo twazola mfinangani zeto. Muna Yesaya wa ngunza, Yave wavova vo: “Nulunda ndungidi, nusonga unsongi . . . Nkwa nsambu o muntu ovanga diadi.” (Yes. 56:1, 2) Avo tusonga zola muna mfinangani zeto yo lemvokela nkanikinu a Yesu, tukala ye kiese.

 8. Ekuma tufwete zolelanga atantu eto? Adieyi dilenda bwa avo tuvangidi wo?

⁸ Zola atantu aku. Yesu wavova vo: ‘Zola nkw’aku yo saula ntantu aku: Kansi omono inusamunwini vo, nuzol’atantu eno, nubasambil’ana bekunubangika; nwakala nu wan’Es’eno wina kun’ezulu.’ (Mat. 5:43-45) Paulu wa ntumwa wavana elongi diau adimosi vava kavova vo: “O ntantu aku, ovo nzala kefwa, undika; ovo’vwina kefwa, unwika.” (Roma 12:20; Nga. 25:21) Kuna Isaele yankulu, Yave wavana nsiku kwa nkangu andi muna kubalonga vo basadisanga atantu au kumosi ye bulu yau. (Luv. 23:5) Vava balemvokelanga nsiku wau, akaka mun’awana ke bazolaziananga ko bakituka se akundi. Nze Akristu, vava tusonganga zola kw’atantu eto, balenda soba e mpila bekutubadikilanga. Akaka muna atantu awaya bekitukanga selo ya Yave.

 9. Yesu adieyi kavova mu kuma kia vanga ungudi ye mpangi zeto?

⁹ “Nutatidil’o ungudi yo wantu awonso.” (Ayib. 12:14) Wau vo divavanga vo twatatidila ungudi yo wantu awonso, tufwete mpe tatidila ungudi ye mpangi zeto. Yesu wavova vo: “O lukau luaku, ovo se’tambikila lo van’eziku, vana vau wayindula vo mbunzi aku, diambu kàvwidi, osala sisa lukau luaku van’eziku, wenda, wabákanin’ekulu yo mbunzi aku, i bosi wiza tambik’o lukau.” (Mat. 5:23, 24) Nzambi okutusambula avo tusonga zola muna mpangi zeto yo vanga mawonso tulenda mu kadila yau mu luvuvamu.

10. Ekuma katufwete fundisila akaka ko?

¹⁰ Kufundisa ko. Yesu wavova vo: “Ke nufundisa ko, nwalembi fundiswa. Kadi muna mfundisa nufundisa i nufundisilwa: muna nzongo nuzongela mpe i kikunuzongelwa. Adieyi omwenene kiti kin’omo disu dia mbunzi aku, walembi mona mwangu un’omo diaku disu? Ovo, nkia mpoves’ovovesa mbunzi aku vo, yambula yakatul’e kiti kin’omo disu diaku; wau, o mwangu un’omo diaku disu? U mpuki, teka katwil’ekulu o mwangu un’omu disu diaku, i bosi otoma mona, wakatula kiti kin’omo disu dia mbunzi aku.” (Mat. 7:1-5) Elongi diamfunu tulongokele i diadi: Ka tufwete fundisa akaka ko mu kuma kia vilwa bevanganga kadi yeto kibeni mpe vilwa wayingi tuvanganga.

11, 12. Ayeyi i mpila yambote tulenda songela zola muna mfinangani zeto?

¹¹ Vena ye mpila zayingi tulenda songela zola muna mfinangani zeto. Kansi, Yesu watulonga mpila yambote tulenda wo vangila, i sia vo, samuna e nsangu zambote za Kintinu. (Luka 8:1) Wavovesa alandi andi vo: ‘Nukitula wantu a zula yawonso s’alongoki.’ (Mat. 28:19, 20) Vava tulemvokelanga Yesu, tulenda sadisa mfinangani zeto mu katuka muna nzila yasanzuka ya lubukumuku yo kubasonga e nzila yamfinangani ina ifilanga ku moyo. (Mat. 7:13, 14) Ka lukatikisu ko vo Yave osambulanga e ngolo tuvanganga.

¹² Nze Yesu, tusadisanga o wantu babakula vo Yave bavwidi o mfunu. (Mat. 5:3) Tulungisanga e nsatu z’awana besonganga luzolo lwambote muna kubasamunwina e “nsangu zambote za ­Nzambi.” (Roma 1:1) Tukubalonganga vo kimenga kia Yesu kiaziula nzila kimana bavwa edienga dia Yave yo vanga yandi kikundi. (2 Kor. 5:18, 19) O samuna e nsangu zambote, i mpila yambote tusongelanga o zola muna mfinangani zeto.

13. Aweyi omonanga vava olonganga wantu oma ma Yave?

¹³ Vava tutoma kubamanga muna vutukila kingula o wantu yo longoka yau Nkand’a Nzambi, tulenda kubasadisa balemvokela Yave. Ediadi dilenda fila akaka mu soba e mpil’a zingu kiau. (1 Kor. 6:9-11) Diakiese mu mona una Nzambi kesadisilanga awana ‘bena y’etima dia vwa moyo a mvu ya mvu’ mu soba e zingu kiau yo kituka akundi andi. (Mav. 13:48) Vava belongokanga Nkand’a Nzambi, wantu ana ke bakala ye vuvu ko bemonanga e kiese. Vana fulu kia kala ye ntelamw’a moyo, bebundanga e vuvu kiau muna Yave. Tuvwidi elau diampwena dia songa zola kwa ­mfinangani zeto muna salu kiaki kiamfunu.

14. Aweyi Paulu kayikila zola muna 1 Korinto 13:4-8?

¹⁴ Avo tusonga zola muna mfinangani zeto nze una Paulu kayika, tuyangidika Yave yo venga ntantani zayingi ye mfinangani zeto. Ediadi dikututwasila kiese kiayingi. (Tanga 1 Korinto 13:4-8.) Tubadika dina Paulu kayika mu kuma kia zola yo zaya una tulenda sadila e mvovo miandi muna mpila tukadilanga ye mfinangani zeto.

15. (a) Ekuma tufwete songela luzindalalu yo walakazi? (b) Ekuma tufwete vengela kimpala yo lulendo?

¹⁵ ‘O zola kusonga luzindalalu yo walakazi.’ Wau vo Yave osonganga luzindalalu yo walakazi muna mpila kekadilanga yo wantu alembi lunga, yeto mpe tufwete songanga luzindalalu yo walakazi vava akaka bevanganga mpilakanu. ‘O zola ke kuna ye kimpala ko.’ Muna kuma kiaki, o zola kwakieleka ke kulendi kutufila ko mu lokokela mavwa mangani yovo mwena awana bena ye kiyekwa muna nkutakani e kimpala. Vana ntandu, avo tuna yo zola, tuvenga fu kia kuyisana yo lulendo. Kadi, “o meso ma umvwania yo ntim’a lulendo, e mini kia yimpumbulu, esumu.”—Nga. 21:4.

16, 17. Aweyi tulenda zingila e ngwizani ye sono kia 1 Korinto 13:5, 6?

¹⁶ O zola kukutufilanga mu kadila ye mfinangani zeto mu mpila yambote. Kukutufilanga mu lembi vuna mfinangani zeto, yiya lekwa yau yovo vanga konso diambu dilenda kulula nsiku ye nkanikinu mia Yave. O zola kukutufilanga mpe mu lembi vava kaka wete dieto, kansi mu vava mpe wete di’akaka.—Fili. 2:4.

¹⁷ O zola ‘ke kufunga makasi ko, ke kubadika diambi ko.’ Avo muntu utuvangidi e mbi, ke tukadi ye nzaki za funga makasi ko. Ka tufwete tanganga ko e nkumbu mina muntu katuvangidi e mbi. Avo tulundidi makasi, o makasi mama malenda lema nze tiya yo kutuvanga e mpasi kumosi y’akaka. (Fuka 19:18) Vana fulu kia lunda makasi, tufwete lolokanga yo vilakana. O zola “ke kumwena vilwa wete ko.” Avo ndiona okutumenganga ovangilu e mbi, ke tuyangalela mpasi zandi ko.—Tanga Ngana 24:17, 18.

18. Adieyi tulongokele mu kuma kia zola muna sono kia 1 Korinto 13:7, 8?

¹⁸ Badika diambu diakaka kayika Paulu mu kuma kia zola. Wavova vo zola “kuzizidila mawonso.” Avo muntu utuvangidi e mbi yo lomba ndoloki, o zola kukutufila mu kunloloka. O zola “kukwikila mawonso” mena muna Diambu dia Nzambi yo kutufila mu vutula matondo muna madia ma mwanda tutambulanga. O zola “kusilanga mawonso e vuvu” kina muna Nkand’a Nzambi yo kutufila mu sadisa akaka bakala mpe ye vuvu kiaki. (1 Pe. 3:15) Vava tunwananga ye mambu mampasi, tufwete sambanga yo kala ye vuvu vo mambu mesinga soba. O zola “kuzizidila mawonso,” kana nkutu vo akaka batuvangidi e mbi, kutubangika yovo mambu mankaka mampasi. Vana ntandu, “o zola ke kusuka nkutu ko.” Awana belemvokelanga Yave bekwamanana songa zola muna mfinangani zau yakwele mvu.

19, 20. Nkia luludiku lwa Nkand’a Nzambi lufwete kutufila mu kwamanana zola mfinangani zeto?

¹⁹ Avo tusadila luludiku lwa Nkand’a Nzambi, tukwamanana zola mfinangani zeto. Ediadi dikutufila mu zola wantu awonso, kana nkutu awana bena ye fu ya kisi nsi yaswaswana. Diambote twasungamenanga mpe dina Yesu kavova: “Zola nkw’aku, konso un’okuzolela.” (Mat. 22:39) O Nzambi yo Kristu bevavanga vo twazola mfinangani zeto. Vava dikalanga diampasi mu songa zola kwa mfinangani zeto, tulenda samba kwa Yave mu lomba mwand’andi avelela. Avo tuvangidi wo, Yave okutusambula yo kutusadisa mu songa o zola.—Roma 8:26, 27.

²⁰ O nkanikinu wa zola mfinangani zeto nze una tukuyizolelanga uyikilwanga vo “nsiku akintinu.” (Yak. 2:8) Vava kayika miaka nkanikinu mina muna Nsiku a Mose, Paulu wavova vo: ‘Vena ye nsiku miakaka mpe, miawonso miakufikwa muna mvovo emi: Zola nkw’aku nze ngeye kibeni. Ndiona ozolanga ke vanganga nkw’andi mbi ko; kadi o zola i lungisa nsiku.’ (Ro 13:8-10) Muna kuma kiaki, tufwete kwamanana zola mfinangani zeto.

21, 22. Ekuma tufwete zolelanga Nzambi ye mfinangani zeto?

²¹ Ekolo tubadikanga e kuma tufwete songela o zola muna mfinangani zeto, diambote twasungamenanga e mvovo kayika Yesu mu kuma kia S’andi vo “odungumunanga ntangw’andi vana vena wantu ambi yo wantu ambote, yo nokesanga mvula vana ven’asongi, y’ana balembi songa.” (Mat. 5:43-45) Tufwete songanga o zola muna mfinangani zeto, kiakala ansongi yovo ana balembi songa. Nze una tuyikidi kuna lubantiku, e mpila yambote tulenda kubasongela zola i kubasamunwina e nsangu za Kintinu. Ekwe nsambu bevwa e mfinangani zeto avo betambulwila e nsangu zambote ye kiese kiawonso!

²² Tulongokele e kuma tufwete zolela Yave ye nsi a ntim’eto yawonso, fulumwinu yo nyindu. Tulongokele mpe una tulenda songela zola muna mfinangani zeto. Avo tuzola Yave ye mfinangani zeto, tulemvokela nkanikinu miole misundidi o nene. Vana ntandu, tuyangidika Yave wa S’eto anzodi.